Ndikana Ndie Tiniɛ
20
O Tafun Nyiɛkpɔɔ na yo Moses pan mbo, 2 “Yo Israel leele pre pan na, na Israel ndro, ndee na fuŋu ŋmba u yiri waŋgra ka nu mu pan mu tni e nu waa u pɔ tɛɛ mu sɛɛn Molech pɛɛri, ki fna mbe chia kre leele kro ufun wre waari na dnɛ ni mbe gbo. 3 Ndro ŋmba we u pɔ pɛɛri sɛɛn Molech na, mbe ni Sumindoo kre tɔ nɛɛrɛ ni, mbe ni mɛɛ cheche kre kla kre, mbe nyibie sisaa kna u na, a mba jaa u wru mbe pe ni leele pre wa na. 4 La, na ndro waa u pɔ pɛɛri sɛɛn Molech na, a chia kre leele waa nyiɛlɛ ka mu wa kee kre na, a pe n shia ndro wrefun waari dnɛ ni mu gbo, 5 mbe ni nyibie sisaa kna ndro wre, na u sele leele na, a mba ja mbe pe wa wru mbe pe ni leele na. Pre na ayɛtefɛɛnlɛ mblɛ pie taa u kro mbe sɛ sɛɛn kre na kre kro. 6 Ndro ŋmba we sɛ chlɛfɛɛnlɛ, na gboolo yeerifɛɛnlɛ pan kpan, mbe ni nyibie sisaa kna u na, a mba u wru mbe pe ni leele pre wa na. 7 Ŋga e pe ni wolo kre ndra na, e pe cheche, ŋgi na hin? Mi wi e Tafun Nyiɛkpɔɔ. 8 E li ni mbra na, ŋgi na hin? Mi wi e Tafun Nyiɛkpɔɔ ŋmba ni e pini cheche. 9 Ndro ŋmba we u lo, ndee u lɛ sun kre, ki fna mbe pe u gbo. Ŋga ufun wre kre kee kre pe kre ndra na, wre titi u u kumu cha.10 Na blɔ waa u ŋmbrɔ chɔ cha, ki fna mbe pe blɔ wre na chlɔ wre kro gbo. 11 Blɔ ŋmba we sni na u lɛ chɔ ni, kena u u lɛ yiɛ le nyumu. Na ki pan ma, ki fna mbe pe chlɔ wre na blɔ wre kro gbo, a pre titi pe pe kumu cha. 12 Na ndro waa sni na u pɔ blɔ chɔ ni, ki fna mbe pe pe kro shiin pre gbo. Pe afuŋgo kee pe, a na ki pan ma, pre titi pe peyɛ kumu cha. 13 Na blɔ waa sni na u ŋmbrɔ blɔ ni na chlɔ wi kre, ki pe afuŋgo kee, a ki fna mbe pe pe kro shiin pre gbo. A na ki pan ma, kena pre titi pe pe kumu cha. 14 Na blɔ waa chlɔ, na u lo wru mu leŋge, sisam kpɔɔ titi yi, leele pre kro taarɛ fna mbe pe pe sro mbe gbo, mbe kre sisam kee kre wa kro e nu. 15 Na blɔ waa sni na yurɔ ni, wre na yurɔ wre kro fna mbe pe pe gbo. 16 Na chlɔ waa tia yurɔ sni na u ni, chlɔ wre na yurɔ wre kro fna mbe pe pe gbo. Kena pre titi pe pe kumu cha.
17 Na blɔ waa sni na u jaa titi ni, ndee u jaa ŋmba u lo sɛ se blɔ fɔŋgɔ na, ndee u lɛ sɛ se chlɔ fɔŋgɔ na kre, ki pe yɛkuuro kee. Ki fna pe pe kro shiin ni, mbe yili leele pre nu. Blɔ wre u jaa wre yiɛ le nyumu, a ki fna mbe u ki kanyana nya. 18 Na blɔ waa chlɔ ŋmba u paari cha, kena pe kro shiin afuŋgo kee pe, mu le nɛɛrɛ nu, na ki pan ma, ki fna mbe pe pe kro shiin pre ni mbe yili pe leele nu. 19 Na blɔ waa sni na u lechɔ ni, kena u u sele ndro titi le yɛkuuro nu, leele pre kro shiin fna mbe ki ndie tiniɛ ta. 20 Na blɔ waa sni na u nalɔ chɔ ni, kena u u nalɔ wre yiɛ le nyumu, pe kro shiin pre fna mbe ki fɔtɔɔrɔ ta, pia se mbe ku. 21 Na blɔ waa u nyjɔ, ndee u chunu chɔ shɔ mu leŋge, blɔ wre nɛɛrɛ kee pe, mu ŋmba chɔ u shɔ wre yiɛ le nyumu. Na ki pan ma pia se mbe ku.”
22 O Tafun Nyiɛkpɔɔ na yo mbo, “E li ni mbra na ni kee nyjɛ ni e nyina yire kro na, imi kie pe mbe Canaan tra ŋga nu ni shie na e ni kre wa e je. 23 Yaa shia taa leele mblɛ mbe ni e yiɛ pre paala kee nyjɛ pe pini kre na. Ŋgi na hin? Kee nyjɛ praa pini yire krɛrɛ ni yi fun. 24 La, ni yuu e pan na, ee pe tra kre ta mbe tni. Tra taan titi yi, mbe e ŋga ki yi na krɔyira yi. Mi wi e Tafun, na e Nyiɛkpɔɔ ŋmba ni e wɔ mu tia e yili eyɛ na waŋgrɛ yire ni. 25 Kena ki fna mbe e jaa yurɔ ŋmba u n pe nɛɛrɛ yurɔ, na ŋmba u pe nɛɛrɛ yurɔ lalaa chin. Mbe hanyiɛlɛ mblɛ pe n pe nɛɛrɛ wolo, na pe mblɛ pe pe nɛɛrɛ wolo pre lalaa chin. Yaa shia hanyiɛlɛ, ndee puɛ yurɛ, ndee yurɛ mblɛ pe fulo tra, a ni yo na pe pe nɛɛrɛ yurɛ pre wa tɛɛ mbe eyɛ tɔ na nɛɛrɛ ni. 26 Ki fna mbe e pe cheche mbe ni ŋga. Ŋgi na hin? Mi e Tafun Nyiɛkpɔɔ, ni pe cheche. A ni e wɔ, a e yili eyɛ na waŋgrɛ hɛnyi yire ni, mbe e pe ni leele. 27 Kena chlɔ, ndee blɔ ŋmba we na chlɛ, ndee mbra gboolo yeeri e nu wre fna mbe e u gbo. Pre leele pre nyini fna mbe e pe waari dnɛ ni mbe gbo. Ŋgi na hin? Pre titi pe pe kumu cha.”