3 Ndro kro fna mbe u lo na u lɛ ŋga buuro, mbra ni Wuuble kre lii. Ŋgi na hin? Mi wi e Tafun Nyiɛkpɔɔ wre. 4 Yaa shia sɛ sɛɛnlɛ jaara, a yaa shia tɔɔnrɔ tɛɛ mbe sɛɛlɛ pe mbra sumi, ŋgi na hin? Mi wi e Tafun Nyiɛkpɔɔ wre.

5 Na ndro chaa mbe yurɔ tɛɛ mbe wejinyiŋge sra wɔ mbe o Tafun Nyiɛkpɔɔ ŋga, u le na we ki wɔ kolo ŋga na sra kre we shɔ. 6 Yurɔ wre kaara fna mbe pe ki ka ki ble kre lam, ndee mbe ki haŋa ka ki nyisee na. Na kaara kre ka waa da ble taarɛ, ki fna mbe e ki sro. 7 Na ndro waa kaara kre ka ka ble taarɛ wo na kre, ki n pe cheche, a mba sra kre shɔ. 8 A ndro ŋmba we kaara kre ka ka kpan, kena u kala cha mu uyɛ ŋga. Ŋgi na hin? Ufun yira ŋga ki pe cheche mu o Tafun Nyiɛkpɔɔ ŋga le na yira waara ka yi, a ufun wre wa pe ni leele pre wa na.

9 Na ndro u see yirɛ kuun, waa shia shɔlɔ nyjɛ yii wa mu yire see jenu na yire kun. A waa shia nyjɛ yi kro see lam yire yaa. 10 Na ndro tre see pe, maa yi kun waashia yi yaa, a yi nyjɛ yie knumu mbe wo yire, waa shia yi yoori. Ki fna u yi ti shianfɛɛnlɛ na fumblɔ pan. Mi wi e Tafun Nyiɛkpɔɔ.

11 Ndro waashia ju, ndee mbe kala fnɛ, ndee mbe u ŋmbrɔ dnumu.

12 Yaa na danyi wɛɛ dani na ni mɛɛ ni, mbe ni yiɛ le nyumu. Mi wi e Tafun Nyiɛkpɔɔ wre.

13 Ndro waashia u ŋmbrɔ dnumu, ndee mbe u ju kachindɛ kolo na. A na wa ndro wru a u u tnumu tun, waashia ti mbe nyiŋge se u fɔtɔɔrɔ na.

14 Ndro waa shia nyu nyaa mbe kpo sun, ndee mbe yira wru mbe tɛɛ fuun kolo mbe u gbro ki na, la, e Nyiɛkpɔɔ fiɛ. Mi wi e Tafun Nyiɛkpɔɔ wre.

15 Yaa na kpra fɛɛlɛ, a yaa shianfun le mbe chiin u kala yo, ndee mbe swafun yiɛ fiɛ, la, e na kala lii kpra kolo na. 16 Yaa na e ŋmbilɛ mɛɛ klai mbra tro, a ndro waashia u ŋmbrɔ pe kee ŋga kie ti mbe u ŋmaa yili u kɛɛ. Mi wi e Tafun Nyiɛkpɔɔ wre. 17 Wa waashia loŋgooro yii na u ŋmbrɔ ni, la, mu ŋmbrɔ yiɛ kee yo u pan nyaanyaa, mbe ma kɔɔ to pimi ŋga u li kre ka nu. 18 Na ndro kala fɔɔn pe mu na, maashia ka pe u na mbe fɔlɔ tɔ, ndee mbe krɔ yii na u ni. La, e e tnifɛɛnlɛ kori, imi na e eyɛ kori kre. Mi wi e Tafun Nyiɛkpɔɔ.

19 E li ni mbra na. Yaashia ti mbe yurɛ mblɛ pee peyɛ, peyɛ nduu. A yaa yirɛ shiin chaa mbe luu tra nunu kre nu. A yaashia jese ŋga pe pe na mbayooro ni chaa kɔdɔli jese ni mbe yoŋgo tin mbe tɔ. 20 Na blɔ waa tnichlɔ ŋmba pe wru mu blɔ ŋga cha, na blɔ ŋmba pe u wru mu ŋga wre n ta mu chlɔ wre ndra fɔlɔ tɔ, kena ki fna mbe pe blɔ ŋmba u u cha wre gbun na fɔlɔ ni. La, pia shia pe kro shiin gbo, ŋgi na hin? Na chlɔ wre n ta mu uyɛ ta u tnibim kre nu tun. 21 Na ki pan ma, blɔ ŋmba u u cha wre fna mbe mbaplɔ wɔ, mbe sɛ na u ni Yoŋgo Nyuŋgo kre jlonwee nyu na, mbe u tɛɛ mbe pimi lie sra wɔ mbe o Tafun Nyiɛkpɔɔ ŋga. 22 Mbe srawɔfun mbaplɔ wre shɔ mbe u tɛɛ mbe blɔ wre ndra lɔ o Tafun Nyiɛkpɔɔ yiɛ, sisam ŋga u pe kre ndra na, mbe ki ti u sisam tinkɛɛ ta.

23 Na e waa le Canaan tra kre nu, maa tinyi li wee luu, a yi waa na sɛni, yaashia yi kun mbe li, fɔna yɛlɛ taarɛ tro tun, e yi le na yi pe afunyi yirɛ. 24 Yɛlɛ jijirɛ wo kre na, kre yie pe cheche, mbe e yi kun mbe yi tɛɛ mbe sra wɔ mbe mi e Tafun Nyiɛkpɔɔ wre ŋga mɛɛ. 25 La, yɛlɛ kunɔ wo kre na rɛ, ee jaa yi kun mbe li. Kre kolo ŋga na ee yire mbe e yirɛ na sɛni nɛɛrɛ. Mi wi e Tafun Nyiɛkpɔɔ wre.

26 Yaashia yurɔ ka na u nyimi ni. A yaa na chlɛ, ndee mbra dobodobo kee pini. 27 A yaashia e ndra knumu, ndee mbe e nyutanyooro knumu mbe yɛ ti, 28 ndee mbe tɔɔnrɔ tɛɛ mbe nyunɔ mbe le e wejiŋge nu, ndee mbe e wejinyi knumu yira ni, mbe tɛɛ mbra gboo nyɛni. Mi wi e Tafun Nyiɛkpɔɔ.

29 Blɔ waa shia ti mbe u bichlɔ tiɛri mbe uyɛ yiɛ le nyumu, na kre ma tiɛrɛɛ, na sisam we tra kre shɔ mbe ta. 30 E na ni Wuuble kre lii, e na ni Suminyuŋgo kre kaan buuro. Mi wi e Tafun Nyiɛkpɔɔ wre. 31 Yaa na shie chlɛfɛɛnlɛ, ndee mblɛ pe gboolo yeeri pre pan, na kre ma pie e tɔ na nɛɛrɛ ni. Mi wi e Tafun Nyiɛkpɔɔ wre. 32 E na blɛlɛɛlɛ na chalɛɛlɛ kaan yiɛ, e na yɛkɔɔnlɔ kaan buuro. E mi Nyiɛkpɔɔ fiɛ, ŋgi na hin? Mi wi e Tafun Nyiɛkpɔɔ. 33 Na fumblɔ plɛ yiri waŋgra ka nu mu pan mu tni e tra nu, yaa na jaŋga fɔɔn lii pe na. 34 Na fuŋu pan mu tni mu jaara, u pe na ŋu titi ndro wi, mbe mu u kori imi mu muyɛ kori kre, ŋgi na hin? E sɔɔnri na fumblɔ na le yire Egypt tra nu. Mi wi e Tafun Nyiɛkpɔɔ.

35 Ndro waa shia u ŋmbrɔ dnumu yira lɔhaa. Na maŋa ŋga ni pe yira kra yi o, ndee na yira snamu kra yira yi o, ndee na yirɛ nɛɛmu kra yira yi o, le na ma ndro wre dnumu. 36 Yira ŋga mu kra mbe lɔ kro, ki kra na kpra ni. Mi wi e Tafun Nyiɛkpɔɔ, a mi ndaa e wɔ mna yili Egypt tra nu. 37 E li ni mbra, na ni kee nyjɛ ni e nyina kro na, ŋgi na hin? Mi wi e Tafun Nyiɛkpɔɔ.”