6 Mi wi e Tafun Nyiɛkpɔɔ wre, ni yuu e pan na lewo waa shia sni na u nyimi ndro titi ni. 7 Lewo blɔ waa shia u lo cha mbe u lɛ na u lo yiɛ le nyumu, ŋgi na hin? Mu lo wi, kena maa shia sni na u ni. 8 Lewo blɔ waa shia u lɛ chɔ ŋmba u n pe u lo titi cha, na kre ma we u lɛ yiɛ le nyumu. 9 Lewo blɔ waa shia u jaa cha, na mu lɛ bichlɔ wi, ndee na mu lo bichlɔ wi, ndee na katoo wa pe u se, ndee na haka pe u se, maa shia sni na u ni. 10 Blɔ waa shia sni na u biblɔ pɔ chlɔ ni, ndee mbe sni na u bichlɔ pɔ chlɔ ni, na kre ma kie mu yiɛ le nyumu. 11 Blɔ waa shia sni na u lɛ chɔ bichlɔ ni. Ŋgi na hin? Mu jaa wi. 12 Blɔ waa shia u lɛ jaa cha, ŋgi na hin? U lɛ nyimi ndro soo wi. 13 Blɔ waa shia sni na u lechɔ, ndee u lelɔ ni, ŋgi na hin? U lo nyimi ndro soo wi. 14 Blɔ waa shia sni na u nalɔ chɔ ni, na ki pan ma nyifɛɛrɛ we u nalɔ wre gbo, ŋgi na hin? Mu chɔ wi. 15 Blɔ waa shia sni na u pɔ chɔ ni, ŋgi na hin? U nafun wi ŋu. 16 Blɔ waa shia sni na u nyjɔ, ndee u chunu chɔ ni, na kre ma kie ŋmba chɔ wi wre yiɛ le nyumu. 17 Blɔ waa shia chlɔ na u pɔ cha, a maa shia chlɔ wre na u pɔ blɔ bichlɔ cha, ndee mbe u bichlɔ pɔ chlɔ cha. Pre krɛrɛ chlɔ wre nyimi leele titi lɛ. Na ki pan ma kena sisam kee titi yi. 18 Blɔ waa shia u chɔ chunu, ndee u chɔ nyjɔ leŋge mbe ya u na, nyjila ŋga ni u chɔ wree wa ŋmaa ni. 19 Blɔ waa shia chlɔ cha u paari nyjila, ŋgi na hin? Kre nyjila kre, na u n pe cheche paala kolo na. 20 Blɔ waa shia sni na u ŋmbrɔ chɔ ni, na kre na ma, kie u tɔ nɛɛrɛ ni.

21 Ndro waa shia ti pe u pɔ sro sɛɛn Molech sragbunu na, na kre ma, kie mi Nyiɛkpɔɔ mɛɛ kla, a mi wi e Tafun Nyiɛkpɔɔ. 22 Lewo blɔ waa shia sni na u ŋmbrɔ blɔ ni na chlɔ ni u sni, ŋgi na hin? Nyiɛkpɔɔ ki fun titi. 23 Lewo blɔ waa shia sni na yurɔ ni. A chlɔ waa shia ti mbe yurɔ sni na u ni, na ki pan ma, ki pe afuŋgo kee kpɔɔ.

24 Ndro waa shia uyɛ tɔ na nɛɛrɛ ni yire kolo nyjɛ ka na, ŋgi na hin? Yire kolo nyjɛ na leelee mblɛ mbe ni e yiɛ pre troi, na peyɛ toni na nɛɛrɛ ni. 25 Pe kepele tia nɛɛrɛ tra kre tɔ, a ki tia ndaa tra kre ndie tinii pe sisam ndra na, a tra kre leele mblɛ pee wa mu tni ki na pre je. 26 La, yire rɛ, e taa ni mbra, na ni kee nyjɛ ni e nyina na. Yire Israel leele pre, na fumblɔ mblɛ pee wa mu tni e nu pre kro, wa waa shia yire afunyi kee nyjɛ ka pe. 27 Ŋgi na hin? Yire kaalɛɛ yire leele mblɛ pee wa tra ŋga kii wa e yiɛ ŋga naa pini, mna tra kre tɔ na nɛɛrɛ ni. 28 A na yire waa sɛ tra kre tɔ na nɛɛrɛ ni naa, pan tra kie we e je, imi na kra leele mblɛ praa wa ki na pre je kre. 29 Ndro ŋmba we yire afunyi kee nyjɛ ka pe kpan, wa jaa pe ni leele pre wa na. 30 E li kaalɛɛ nyjɛ ni yo e na pini yire na, a yaa shia afunyi paala kolo nyjɛ leele pre naa pini, a e na chin mu pan tra kre nu yire ka pe. A yaa shia yi tɛɛ mbe eyɛ tɔ na nɛɛrɛ ni. Mi wi e Tafun Nyiɛkpɔɔ wre.”