Lawee Ŋga Nu Ki Fna Pra Sra Woni
17
O Tafun Nyiɛkpɔɔ na yo Moses pan mbo, 2 “Yo Aaron na u bibilɛ pre, na Israel leele pre pan na, 3-4 Israel ndro ŋmba we nuu, ndee mbɔɔ, ndee sugbɔ gbo pe tni haa wa, ndee na lawee waa ka nu, a u nsra pan na u ni o Tafun Nyiɛkpɔɔ yiɛ Yoŋgo Nyuŋgo kre jlonwee nyu na wa kre, ufun wre we pimi li na u nyimi kna mu wo. Na ki pan ma, ufun wre wa jaa pe Israel leele pre wa na. 5 Kena kee ŋga o Tafun Nyiɛkpɔɔ chaa mbe Israel leele pre chin yi na, sra nyjɛ pe woni lawee waara nu kre, ki fna praa paan na yurɛ pre ni mbra srawɔfun kaan Yoŋgo Nyuŋgo kre jlonwee nyu na, mbe u pe tɛɛ mbra wejinyiŋge sra woni o Tafun Nyiɛkpɔɔ yiɛ. 6 Na Srawɔfun wre yurɔ wre gbo, mbe u u nyimi yire nyaara mbe wo sra gbunu kre mbɛɛlɛ na o Tafun Nyiɛkpɔɔ Yoŋgo Nyuŋgo kre yɛsimi wa. Mbe u nyina yire sro mbe yi ndiom yili, yi ndiom kre tna o Tafun Nyiɛkpɔɔ wre pan. 7 Israel leele pre n fna mbe ayɛte o Tafun Nyiɛkpɔɔ wre na, mbe sɛ na sra woni mbra ŋumufɔɔn ŋmba u pe na sugbɔ wi kaan. Israel leele pre fna mbe taa Nyiɛkpɔɔ mbra nyjɛ na, pre na pe biile, na pe nanae kro ni nyjila kro nu. 8 Yo pe pan na, na Israel ndro, ndee fuŋu ŋmba uu wa mu tni pe nu, waa na chaa mbe sɛ yurɛ sroo sra, ndee sra ka na ki nyini wɔ, 9 a ufun wre nsra pan na sra yurɔ wre ni o Tafun Nyiɛkpɔɔ Yoŋgo Nyuŋgo kre jlonwee nyu na, mbe sra kre wɔ mbe o Tafun Nyiɛkpɔɔ ŋga kre, kena ndro wrefun wa jaa pe Israel leele pre wa na.10 Na Israel ndro, ndee fuŋu ŋmba uu wa mu tni mu chaa pe nu kre waa yurɔ nyimi ka kre, mi Nyiɛkpɔɔ we nyibie sisaa kna ufun na, a mba ti u pe ni leele pre wa na. 11 Yurɔ nyimi nu u ŋmaa nyi, a ni e ŋga yi yi mbe e yi tɛɛ mbra e ndra loni sragbunu kre na, ŋgi na hin? Nyimi ni pe teeri na ndro ndra loni mbe u ŋmaa li. 12 Kre ki tia mi e Tafun Nyiɛkpɔɔ na yuu yire Israel leele pre, na fumblɔ mblɛ pe yiri haka mu pan mu tni e nu pre pan na, e wa waa shia nyimi ka.
13 Na Israel ndro, ndee fuŋu ŋmba u yiri waŋgra ka nu mu pan mu tni e nu pre wa waa sɛ nyaa mu sɛ yurɔ, ndee hanyini ŋmba u fna kamu gbo kre, u yurɔ wre nyimi wo tra, mbe tra tɛɛ mbe yi tɔ. 14 Ŋgi ndra na? Yurɔ kro ŋmaa wa u nyimi nu. Kre ki tia mi e Tafun Nyiɛkpɔɔ wre yo yire Israel leele pre pan na, yaa shia yurɔ nyimi ka. Yurɔ kro, u nyimi yi u ŋmaa. Kena ndro ŋmba we nyimi ka kpan wa ja mbe pe ni leele pre wa na.