Sisam Tinkɛɛ Ble Kpɔɔ
16
Ŋga Aaron bibilɛ shiin pre na punu o Tafun Nyiɛkpɔɔ na mna ku kre, ki kɔkro o Tafun Nyiɛkpɔɔ wre na paara na Moses ni, 2 mna yo u pan mbo, “Yo mu chunu Aaron pan na, waa na shie yoŋgo ŋga pe paari Cheche Ndoo Titi kre yiɛ kre krɔ, nyjila ŋga wre titi chaa nu. Ŋgi na hin? Bawa ni paan tlo nu Nyu Nunu Daka kre nyutɔŋgɔ kre ndra na, na kre ma we ku. 3 Kolo ŋga na Aaron we na tro mbra lee Cheche Ndoo Titi kre nu yi kre, na we le wa, ki fna mbe u napɔlɔ tɛɛ mbe sisam sra wɔ, mbe mbaplɔ tɛɛ mbe yurɔ sroo sra kre wɔ mbe chiin le wa. 4 Na we le wa ki fna mbe u dodoŋgi fiŋge titnɔŋɔ ŋga na kɛnyi nyi kre le, mbe dodoŋgi fiŋge lam wo kre le, mbe greree fiŋge kre tɛɛ mbe grere, mbe namu fiŋge kre pɔ. Yire yirɛ nyjɛ krɛrɛ pe cheche titi, kena ki fna mbe u weli, mbe chin mbe yi le. 5 A ki fna mbe u kapilɛ shiin shɔ Israel leele pre pan mbe sisam sra wɔ, mbe mbaplɔ shɔ mbe yurɔ sroo sra kre wɔ.6 A u fna mbe nablɛm tɛɛ mbe wre titi sisam sra wɔ, mbe ki tɛɛ mbe wre na u sele wolo ndra lɔ. 7 Mbe u sikaala shiin pre wru mbe sɛ na pe ni o Tafun Nyiɛkpɔɔ yiɛ Yoŋgo Nyuŋgo kre jlonwee wa. 8 Mbe u sikaala shiin pre kɛɛn tɛɛ, kaan nunu we yire mbe sugbɔ ŋmba pie tɛɛ mbe sra wɔ mbe o Tafun Nyiɛkpɔɔ ŋga kre mɛɛ na, mbe nunu pe sugbɔ ŋmba pie wa mbe u sɛ tablɔ tra kre nu ŋumufɔɔn ŋga pe yeeri Azazel pan kre mɛɛ na. 9 Sugbɔ ŋmba kɛɛn tɛɛ kre we wɔ na wre pie tɛɛ mbe sra wɔ mbe o Tafun Nyiɛkpɔɔ ŋga wre, mbe Aaron u tɛɛ mbe sisam sra kre wɔ. 10 La, sugbɔ ŋmba kɛɛn tɛɛ kre we wɔ na pe u wa mbe u sɛ wre, ki fna pe pan na u ni le wo, o Tafun Nyiɛkpɔɔ yiɛ wa, kena pe u wa mbe u sɛ tablɔ tra kre nu ŋumufɔɔn Azazel pan, kena ki nyina na u sɛ na leele pre sisam ni. 11 Kena Aaron nablɛm wre tɛɛ mbe wre titi sisam sra wɔ, mbe ki tɛɛ mbe wre na u katoo wolo ndra lɔ. 12 Mbe u taahɛɛ nyjɛ ni pe kanhun woni yire ka wru mbe kanhun muŋgo wɔ sragbunu ŋga kii wa mu yire o Tafun Nyiɛkpɔɔ yiɛ wa kre na, mbe tuwe ndiom tɛɛn titi yire yɛ ko kɛ nyini shiin, mbe le na yi ni Cheche Ndoo Titi wa. 13 Nyjila ŋga ni u lee wa kre mbe u tuwe ndiom tɛɛn titi yire le kanhun kre nu o Tafun Nyiɛkpɔɔ yiɛ wa, mbe ki ti mbe wree ŋga kie yili kre Nyu-Nunu-Daka kre ndra tɔ, imi kie pe mbe wa ki nya mbaa ku wa. 14 Na u lee wa, ki fna mbe u le na nablɛm wre nyimi yire yɛ ni, mbe kambɛlɛ ni yi nu mbe nyaara Nyu Nunu Daka kre nyutɔŋgɔ yiɛ, mbe ndru mbe ka nyaara Nyu Nunu Daka kre yiɛ tra gbee kɔɔnashin.
15 Na u kɔ mbe u sugbɔ wre yulɔ kun mbe leele pre sisam sra wɔ, kena u le na nyimi yire ni Cheche Ndoo Titi wa, mbe sɛ yi pe imi na u nablɛm wre nyimi yire pe kre. We nyimi yire nyaara mbe wo Nyu Nunu Daka nyutɔŋgɔ kre na, mbe yɛ nyaara mbe wo Nyu Nunu Daka kre yiɛ tra, imi na u nablɛm wre nyimi yire pe kre. 16 Kre kolo ŋga na we yire mbe nɛɛrɛ laa Cheche Ndoo titi kre na, mbe Israel leele pre nɛɛrɛ, na pe sisam laa ki na, pan ki fna mbe u Yoŋgo Nyuŋgo kre pe, ŋgi na hin? Kii wa mu yire leele mblɛ pe le nɛɛrɛ nu kre tni haa.
17 Na Aaron waa le Cheche Ndoo Titi wa mbe sɛ sra wɔ mbe leele pre ndra lɔ kre, ndro waa shia le Yoŋgo Nyuŋgo kre nu, fɔna u sɛ wre titi, na u sele wolo, na leele pre kro ndra sra kre wɔ mu kɔ mu yili tun.
18 Kena u chin mbe sɛ yurɛ sro sragbunu kre na, mbe nɛɛrɛ laa ki na. We nablɛm wre, na sugbɔ wre nyimi yire yɛ tɛɛ mbe sragbunu kre jeŋgle nyjɛ yi pe na nyamblɛ yi kre mana. 19 Mbe u kambɛlɛ ni nyimi yire nu mbe nyaara sragbunu kre na gbee kɔɔnashin. Na u ki pe ma kena u Israel leele pre nɛɛrɛ nyjɛ nu pe le kre laa ki na, mbe ki pe cheche.
20 Na Aaron waa paala pe mu nɛɛrɛ laa Yoŋgo Nyuŋgo kre, na Cheche Ndoo Titi kre, na sragbunu kre na mu kɔ kre, kena u pan na sugbɔ nunu ŋmba pie wa mbe u sɛ ŋumufɔɔn Azazel pan wre ni. 21 Kena Aaron kɛnyi shiin taa yurɔ wre ndra na, mbe nyu nyaa mbe sisam na ndikana kee nyjɛ Israel leele pre pe kro yo mbe wo sugbɔ wre ndra na, mbe ndro wɔ mbe u sugbɔ wre ni mbe sɛ na u ni tablɔ tra kre nu. 22 Sugbɔ wre we leele pre sisam yire tio mbe pe sɛ na u ni tra ŋga nu leele n wa mu tni nu, mbe sɛ u wa wa.
23 Na Aaron kre pe mu kɔ, mbe u sɛ le Yoŋgo Nyuŋgo kre nu mbe u sɔfum dodonyi nyjɛ u le mu chin mu sɛ le Cheche Ndoo Titi wa yire wɔ mbe tɛɛ wa. 24 Mbe u sɛ yire cheche lawee mbe weli, mbe chin mbe wre titi dodonyi wru mbe le, mbe sɛ yirɛ sroo sra kre wɔ mbe wre titi, na leele pre sisam tali, mbe wre titi na leele pre ndra lɔ. 25 Mbe u sisam sra yurɔ wre nyina yire sro sragbunu kre na.
26 Ndro ŋmba we sugbɔ wre ni mbe sɛ tablɔ tra kre nu Azazel ŋumufɔɔn pan wre fna mbe u yirɛ je, mbe weli, mbe chin mbe pan leele pre tni haa wa. 27 Nablɛm, na sugbɔ ŋmba ni pe tɛɛ mu sisam sra wɔ, mu sɛ na pe nyimi ni Cheche Ndoo Titi wa, mu leele pre ndra lɔ kre, ki fna mbe pe yili na yurɛ pre ni pe tnihaa wa, mbe sɛ pe kaara yire, na pe hlɛ, na pe lɛɛ yire kro sro. 28 Ndro ŋmba we sɛ yi sro wre fna mbe u yirɛ je, mbe weli, mbe chin mbe pan leele pre tni haa wa.
Sisam Tinkɛɛ Ble Lie
29 Yire ble nyjɛ fna mbe e na yi lii nyjila kro nu. Nyiɛpɔ kɔɔnashin wo kre ble kɛ na, Israel leele pre, na fumblɔ mblɛ pe yiri waŋgra ka nu mu pan mu tni mu chaa pe nu kre fna mbe ble fun, a pe n fna mbe tnumu tun ki ble kre, 30 ŋgi na hin? Ki ble kre pie paala pe mbe ki ti e sisam laa e na, mbe e pe cheche o Tafun Nyiɛkpɔɔ yiɛ. 31 Kre ble kre fna mbe pe ble cheche, a ki fna mbe e ble fun, a ndro waa shia tnumu tun ki ble kre, a ki fna mbe e na ki lii nyjila kro nu. 32 Ndro ŋmba pe le Srawɔfun lopom titi, a u u lɛ krɔ li wre fna mbe dodonyi finyi yire le mbe paala ŋga ki nɛɛrɛ laari kre pe. 33 Paala kre fna mbe pe mbe nɛɛrɛ laa Yoŋgo Nyuŋgo kre, na Cheche Ndoo titi kre, na swafre sragbunu kre, na srawɔfɛɛnlɛ pre, na Israel leele pre kro na.
34 Yire mbra nyjɛ fna mbe e na lii yi na nyjila kro nu. A yɛlɛ nyini kpan, ki fna mbe e kre paala ŋga pe mbe ki tɛɛ mbe Israel leele pre sisam kro laa pe na.”
Pan Moses naa ki pini imi na o Tafun Nyiɛkpɔɔ na yo pan u pan kre.