Chlɛm Na Blɛm Nɛɛrɛ Kee
15
O Tafun Nyiɛkpɔɔ na yo Moses na Aaron pan mbo, 2 “Yo Israel leele pre pan na, blɔ ŋmba blɛm nu yira ka nyini we yili mbe wo kpan, yira kre n pe cheche. 3 Na ki waa kro mu na woni, ndee mu yire, kie ti mbe blɔ wre wa pe cheche.4 Dɛŋglɛ ŋga na ndro wrefun we sni, ndee yira ŋga na we tni kpan, we pe nɛɛrɛ yira. 5 A ndro ŋmba we kɛ taa u dɛŋglɛ yire na fna mbe u yirɛ je, mbe weli, a we pe nɛɛrɛ ndro mbe sɛ su yilakɔŋgɔ. 6 Ndro ŋmba we tni yira ŋga na blɔ wre we tni na kpan, u fna mbe u yirɛ je, mbe weli, a wa pe cheche mbe sɛ su yilakɔŋgɔ.
7 Ndro ŋmba we kɛ taa blɔ wre na kpan fna mbe u yirɛ je, mbe weli, a wa pe cheche mbe sɛ su yilakɔŋgɔ.
8 Na ki fun wre waa tɛɛnrɛ hlu mu wo ndro ŋmba u pe cheche na, ŋmba na tɛɛnrɛ yire wo wre fna mbe u yirɛ je, mbe weli, a wa pe cheche mbe sɛ su yilakɔŋgɔ.
9 Na blɔ wre waa tni krɛgɛ, ndee jɔɔn na, kena u ki tɔ na nɛɛrɛ ni. 10 Ndro ŋmba we kɛ taa yira ŋga na we tni na kpan, wa pe cheche mbe sɛ su yilakɔŋgɔ. A na ndro yira ŋga na u tni wru kre, ki fna mbe u u yirɛ je, mbe weli, a wa pe cheche mbe sɛ su yilakɔŋgɔ.
11 Na blɔ wre nsra kɛ je mu chin mu kɛ taa ndro na kre, ki fna mbe ufun u yirɛ je, mbe weli, la, wa pe cheche mbe sɛ su yilakɔŋgɔ.
12 A na waa kɛ taa chɔ na, ki fna pe ki juari. Na yira ŋga pe tɛ tiŋge ni yi, ki fna mbe pe ki je nyumu ni.
13 A na pe waa blɔ wre tra, ki fna mbe u shie ble kɔɔnashin, mbe sɛ nyumu fɔŋgɔ ko mbe u yirɛ je, mbe weli, kena nɛɛrɛ laa u na. 14 Ble kɔɔnatarɛ ble na, mbe u kotulo shiin, ndee, katoo kotulo shiin wɔ mbe sɛ o Tafun Nyiɛkpɔɔ yiɛ Yoŋgo Nyuŋgo kre jlonwee nyu na wa, mbe sɛ srawɔfun ŋga pe lɛ. 15 Mbe srawɔfun wre nunu tɛɛ mbe sisam sra wɔ, mbe haŋu wre tɛɛ mbe yurɛ sroo sra wɔ. Kre kolo ŋga na we tro mbe blɔ ŋmba blɛm nu yira yilii na woni kre ndra lɔ o Tafun Nyiɛkpɔɔ yiɛ.
16 Na blɔ blɛnyi waa wo u pan, ki fna mbe u weli poŋgo, a wa pe cheche mbe sɛ su yilakɔŋgɔ. 17 Yoŋgo, ndee yurɔ hlɛ yira ŋga na blɛnyi we wo kpan, ki fna mbe pe ki je, a kia pe cheche mbe sɛ su yilakɔŋgɔ. 18 Na blɔ waa sni chlɔ ni a u blɛnyi waa pan, blɔ wre na chlɔ wre kro fna mbe weli, a pia pe cheche mbe sɛ su yilakɔŋgɔ.
19 Na paaraa nyimi waa wo chlɔ pan, we pe nɛɛrɛ ndro mbe sɛ su ble kɔɔnashin na, ndro ŋmba we da u na yire ble yire nu kro wa pe cheche mbe sɛ su yilakɔŋgɔ.
20 A yira ŋga na we sni, ndee ndee we tni u paari nyjila kre nu kro we pe nɛɛrɛ yira. 21-23 Ndro ŋmba we da u dɛŋglɛ, ndee u tni yira na kro, fna mbe u yirɛ je, mbe weli, a wa pe cheche mbe sɛ su yilakɔŋgɔ.
24 Na blɔ waa sni na chlɔ paarifun ni, a nyimi yire waa blɔ wre mana, kena blɔ wre le nɛɛrɛ nu mbe sɛ su ble kɔɔnashin nyu na, a dɛŋglɛ nyjɛ na we sni kre pe nɛɛrɛ yirɛ.
25 Na nyimi waa na woni chlɔ pan, a u paari nyjila ma ki da, ndee na paaraa nyimi waa wo chlɔ pan mu wɛ ble nyjɛ ki fna yi li yire na, nyjila ŋga ni nyimi yire woni u pan kre krɛrɛ, u pe nɛɛrɛ ndro imi na ki nyi u paari nyjila nu kre. 26 Dɛŋglɛ ŋga na we sni nyjila ŋga nu nyimi yire woni u pan kre pe nɛɛrɛ yira, a yira ŋga na we tni kro pe nɛɛrɛ yira, pan ki nyi na nyjila ŋga ni u paari kre yi. 27 A ndro ŋmba we da u yirɛ yire na kpan, we pe nɛɛrɛ ndro, a ki fna mbe u u yirɛ je, mbe weli, a wa pe cheche mbe sɛ su yilakɔŋgɔ.
28 Na u nyimi yire waa kun, ki fna u shie ble kɔɔnashin, kre we chiin yili nɛɛrɛ nu paala kolo na. 29 Ble kɔɔnatarɛ ble na mbe u kotulo shiin, ndee katoo kotulo shiin yii mbe sɛ srawɔfun ŋga o Tafun Nyiɛkpɔɔ yiɛ, Yoŋgo Nyuŋgo kre jlonwee nyu na. 30 Mbe srawɔfun wre nunu tɛɛ mbe sisam sra wɔ, mbe haŋu wre tɛɛ mbe yurɔ sroo sra wɔ. Kre kolo ŋga na srawɔfun wre we tro mbe chlɔ wre ndra lɔ o Tafun Nyiɛkpɔɔ yiɛ.”
31 O Tafun Nyiɛkpɔɔ na yo Moses pan mbo, “Israel leele pre jaari nɛɛrɛ kee na, mbe pia kɔɔ ni Yoŋgo Nyuŋgo ŋga ki wa pe tnihaa wa kre tɔ na nɛɛrɛ ni mbaa ku.”