8 Kena yaŋu ŋmba pe pe cheche wre sɛ u yirɛ je, mbe u nyjure, na u yooro kro klu mbe wo, mbe weli, kena u pe cheche paala kolo na. Kena na ki pan ma we jaa chaa leele pre nu, la, wa jaa le u yoŋgo nyuŋgo, fɔna ble kɔɔnashin kɔkro. 9 Ble kɔɔnashin ble kre na, mbe u ndru mbe u ndra klu na, mbe u nyutan yooro klu, mbe u nyikrɔɛ sinyi klu, yire na yooro nyjɛ yii wa u na kro ni, mbe u u yirɛ je, mbe weli, kena u pe cheche paala kolo na.

10 Ble kɔɔnatarɛ ble na, mbe u pan mbapilɛ shiin mblɛ pe da yɛlɛ nununu, na mbachlɔ ŋmba u da yɛlɛ, mblɛ pe n na fumnɔ ni, kre na mimi ŋga snamu ki da kradnɛ kɔɔnanu, a pe olive simi chaa ni, mbe shɔlɔ sra wɔ, mbe olive simi gbolo yɔɔ ya yi na. 11 Kena srawɔfun ŋmba u yo na ndro we pe cheche wre we sra yirɛ yire, na ndro wre wru mbe sɛ o Tafun Nyiɛkpɔɔ yiɛ Yoŋgo Nyuŋgo kre jlonwee nyu na. 12 Mbe srawɔfun wre mbapilɛ pre nunu wru mbe pimi lie sra wɔ, mbe olive gbolo yɔɔ kre ya, kena u yi viŋge o Tafun Nyiɛkpɔɔ yiɛ mbe yirɛ viŋge sra kre wɔ. 13 Kena srawɔfun wre sɛ mbɔɔ wre yulɔ kun cheche ndoo wa, lawee ŋga nu pe sisam yurɛ sroo sra yurɛ pre kuu kre. Pan kre sra kre nyi na sisam sra yi. Pimi lie sra kre srawɔfun wre wo yi, a ki pe cheche titi. 14 Kena srawɔfun wre pimi lie sra yurɔ wre nyimi yire yɛ tɛɛ mbe ndro ŋmba u yili nɛɛrɛ nu paala kolo na wre ndie kalie nyu mana, mbe ka tɛɛ mbe u kalie kambɛlogboŋgo, na u jekambɛlogboŋgo kalie wo mana. 15 Kena srawɔfun wre we olive simi gbolo yɔɔ kre ka kna mbe le u kamɛŋɛ kandala, 16 mbe u kalie kambɛlɛ nyu ni ki nu, mbe ki nyaara o Tafun Nyiɛkpɔɔ yiɛ wa gbee kɔɔnashin. 17 Kena srawɔfun wre simi kɔɔn ŋga u kandala kre ka tɛɛ mbe ndro ŋmba u yili nɛɛrɛ nu paala kolo na wre ndie kalie wo nyu mana mbe ya, kre na u kalie kambɛlogboŋgo, na u jekambɛlogboŋgo kalie wo ni. 18 Kena srawɔfun wre simi ŋga u kandala kre haŋa kre tɛɛ mbe ndro ŋmba u yili nɛɛrɛ nu wre ndra fa, kena srawɔfun wre u ndra lɔ o Tafun Nyiɛkpɔɔ wre yiɛ.

19 Na srawɔfun wre kɔ, mbe u sisam sra ŋga kie nɛɛrɛ laa ndro wre na kre wɔ. Na u kre kɔ mbe u chin mbe yurɔ sroo sra yurɔ wre yulɔ kun, 20 mbe u yurɔ wre, na shɔlɔ sra yirɛ yire sro sragbunu kre na. Kre kolo ŋga na srawɔfun wre we tro mbe ndro wrefun ndra lɔ, kena u yili nɛɛrɛ nu.

21 Na ki pan na ndro wrefun shian, a wa ja mbe yurɛ pre, na yirɛ yire kro wɔ, kena u pan na mbaplɔ nunu ni, mbe tɛɛ mbe pimi lie sra wɔ, mbe pe tɛɛ mbe yirɛ viŋgee sra wɔ mbe u ndra lɔ. Mbe u pan na mimi ŋga snamu ki da na kradnɛ shiin ni, mbe olive chaa ki nu, mbe u olive simi gbolo yɔɔ cha mbe ya yi na. 22 Mbe u pan na katoo kotulo shiin, ndee kotulo titi shiin mblɛ we ja ni, mbe pe nunu tɛɛ mbe sisam sra wɔ, mbe haŋu wre tɛɛ mbe yurɔ sroo sra kre wɔ.

23 Na u nɛɛrɛ laa ble yire nyu waa to, ki nyisee ble kɔɔnatarɛ wo kre na, ki fna u pan na pe ni srawɔfun wre pan o Tafun Nyiɛkpɔɔ yiɛ wa Yoŋgo Nyuŋgo kre jlonwee nyu na. 24 Kena srawɔfun wre we mbapɔlɔ ŋmba ni we tɛɛ mbe pimi lie sra kre wɔ wre wru, mbe olive simi gbolo yɔɔ kre ya u na, mbe yi viŋge o Tafun Nyiɛkpɔɔ wre yiɛ mbe yirɛ viŋge sra kre wɔ. 25 Na u kɔ mbe u mbaplɔ wre gbo, mbe pimi lie sra kre wɔ, mbe yurɔ wre nyimi yire yɛ tɛɛ mbe ndro wre ndie kalie wo nyu mana, kre na u kalie kambɛlogboŋgo, na u kalie jekambɛlogboŋgo. 26 Kena srawɔfun wre olive simi kre ka kna mbe le u kamɛŋɛ kandala, 27 mbe u kalie kambɛlɛ nyu ni ki nu mbe ki nyaara gbee kɔɔnashin mbe wo o Tafun Nyiɛkpɔɔ wre yiɛ wa. 28 We olive simi kre ka tɛɛ mbe ndro wre lawee nyjɛ u mana nyimi ni kre chɔɔ mana mbe ya, u ndie kalie wo kre nyu, na u kalie kambɛlogboŋgo, na u kalie jekambɛlogboŋgo ni. 29 Kena srawɔfun wre olive simi kre kɔɔn kre ki kro u kandala kre tɛɛ mbe ndro wre ndra fa, kena kre kolo ŋga na we tro mbe u ndra lɔ Nyiɛkpɔɔ yiɛ. 30 Kena u kotulo, ndee katoo kotulo pre mblɛ ni u ja mu pan pre nunu, 31 tɛɛ mbe sisam sra kre wɔ, mbe haŋu wre tɛɛ mbe yurɛ sroo sra, na shɔlɔ sra kre wɔ. Kre kolo ŋga na we tro mbe ndro wre ndra lɔ o Tafun Nyiɛkpɔɔ yiɛ.”

32 Mbra ŋga ni le mu mblɛ na yiranyiɛrɛ to, a pia ja mbe sra yirɛ nyjɛ ki fna mbe pe wɔ yire wɔ mbe pe cheche yire yi kre.

33 O Tafun Nyiɛkpɔɔ na yo Moses na Aaron pan mbo, 34 “Na e waa le Canaan tra ŋga mbe e ŋga mbe e ta na e krɔyira yi mbe tni kre nu, a mbaa tia kaandɔɔ pe wa katoo na, maa na kpɔɔri na shie yiɛ, 35 kena katoo kre fun fna mbe sɛ srawɔfun bɔ mandiɛ. 36 Kena srawɔfun wre u ti mbe pe yirɛ nyjɛ yii wa nyuŋgo wa kro wɔ fimi na, mbe srawɔfun wre chin mbe le nyuŋgo wa mbe ki le, imi kie pe mbe wa yo na nyuŋgo wa yirɛ pe nɛɛrɛ yirɛ. 37 Ki fna mbe srawɔfun wre kaandɔɔ wre le mboo mbɛɛ yire na chichie, na waa nya na mboo yire ka pe na wrɛ nyiŋge yi, ndee mu nyina, na mboo mbɛɛ kre mbru na lee lam kre, 38 kena srawɔfun wre u yili, mbe krɔ kre yii mbe tɔ ble kɔɔnashin. 39 Ble kɔɔnashin ble kre na, mbe srawɔfun wre ndru mbe sɛ ki le na, na waa nya na kaandɔɔ wre mboombɛɛ kre toni, 40 kena srawɔfun wre u ti mbe pe lawee ŋga nu kaandɔɔ wre nyi kre dnɛ yire foli mbe sɛ wo lawee ŋga ki n pe cheche kre nu chia kre mbookrɔ. 41 Na u kre pe ma mu kɔ, mbe u ti mbe pe mboombɛɛ lam wo kre kro gboori mbe wo, mbe tra nyjɛ pe gboori mu wo kre koli mbe sɛ yi wo lawee ŋga ki n pe cheche nu chia kre mbookrɔ. 42 Mbe pe dnɛ fɔnyi cha mbe le lawee ŋga pe foli mu wo kre nu, mbe ndru mbe ki wlɔ fɔŋgɔ.

43 Na kaandɔɔ wre waa ndru mu pan katoo ŋga dnɛ nyjɛ pe le fɔnyi, mu yi wlɔ yire na, 44 kena srawɔfun wre u ndru mbe sɛ ki le na. Na ki waa pan na kaandɔɔ wre ndru mu katoo kre yii na, kena kaandɔɔ ŋmba u pan lawee kla haa wi, kena katoo kre n pe cheche. 45 Kena ki fna mbe pe katoo kre juari mbe wo, mbe ki dnɛ, na ki kɛɛn, na pooro nyjɛ ni pe ki wlɔ yire koli mbe yili chia kre na mbe sɛ yi wo lawee ŋga ki n pe cheche kre nu.

46 Nyjila ŋga ni pe katoo kre krɔ tɔ kre, ndro ŋmba we le ki nu kpan we pe nɛɛrɛ ndro mbe sɛ su yilakɔŋgɔ. 47 A ndro ŋmba we sni, ndee mbe li katoo wa kpan fna mbe u yirɛ je.

48 La, na pe waa katoo kre wlɔ fɔŋgɔ, a srawɔfun wre waa sɛ ki le na kaandɔɔ wre n wa ki na na, kena u yo na katoo kre pe cheche paala kolo na. Ŋgi na hin? Kaandɔɔ wre laa ki na. 49 Kena srawɔfun wre hanyiɛlɛ shiin, na cedar kaan, na maŋa nyiɛ, na hyssop wrɛ tɛɛ mbe nɛɛrɛ laa katoo kre na. 50 Mbe srawɔfun wre ti mbe pe hanyiɛlɛ pre nunu yulɔ kun, mbe u nyimi le chɔ ŋga nu pe nyumu fɔŋgɔ ko mu le nu. 51 Kena u cedar kaan kre, na hyssop wrɛ yire, na maŋa nyiɛ kre, na hanyini ŋmba u n ku wre wru mbe ni hanyini ŋmba pe gbo wre nyimi, na nyumu chaara kre nu, mbe ki nyaara mbe wo katoo kre na gbee kɔɔnashin. 52 Kre kolo ŋga na we tro mbe hanyini wre nyimi, na nyumu fɔŋgɔ kre, na cedar kaan kre, na hyssop wrɛ yire, na maŋa nyiɛ kre tɛɛ mbe nɛɛrɛ laa katoo kre na. 53 Kena u sɛ hanyini ŋmba u ku wre ni fimi na mbe u wa mbe u sɛ. Na u u pe ma kena u nɛɛrɛ laa katoo kre na paala kolo na.”

54 Na yiranyiɛrɛ ndro yii, ndee na haŋmbaara yi wo ndro na o, mbra nyjɛ na ki fna e taa ni e nyina kre. 55-56 Na kaandɔɔ ki yoŋgo, ndee nyuŋgo yii kre, ndee na laŋmbɛɛ yi ndro tin kre, ndee na haŋmbaara yi, ndee na lewo wejikaara ki ni ni patipati kre, 57 kolo ŋga na ee yire mbe chin na yira ka pe nɛɛrɛ yira, ki n pe nɛɛrɛ yira ni klu mu e nyina kre.