9 Na klɛ waa to to ndro wejiŋge na, ki fna mbe pe sɛ na u ni srawɔfun pan. 10 Mbe srawɔfun wre ufun wre le chichie. Na klɛ yire titɛɛ waa fniŋge, mu tia u yooro fniŋge, a u kabie kre na nyaa, 11 kena mbe srawɔfun wre yo u pan na, yiranyiɛrɛ yi, a u le nɛɛrɛ nu, kena ki fna u yili leele pre nu mbe sɛ tni uyɛ na.

12 Na yira kre waa u wejiŋge tɔ poŋgo, mu yire u ndra na mu sɛ su u jewrɛ na, 13 kena srawɔfun wre fna mbe u le chiriri, na waa nya na yɛŋgɛ yi, na yira kre ufun wre wejiŋge tɔ poŋgo, mu tia u wejiŋge kre fniŋge kre, kena u ti mbe yaŋu wre chin na u pe cheche. 14 La, na klɛ yire waa yɔɔlɛ mu tia ndro wrefun kabie na nyaa, kena u pe nɛɛrɛ ndro. 15 Na srawɔfun wre u kabie kre nya yɛŋgɛ, u ti mbe ndro wre chin na u pe nɛɛrɛ ndro. Klɛ nyjɛ yi tia u kabie kre na nyaa kre tia u n pe cheche, mu chin na yiranyiɛrɛ ki u yii. 16 La, na u kabie kre waa fniŋge, kena ki fna u sɛ srawɔfun wre pan. 17 Mbe srawɔfun wre ndru mbe u le chiriri na, na waa nya na klɛ yire yiɛ fniŋge, kena srawɔfun wre u ti ufun wre chin na u pe cheche.

18 Na laŋmbaa waa ndro tin mu zaanri, 19 ki kɔkro, na yira fiŋge, ndee nyiɛ ka waa u tin ŋga ki zaanri kre titɛɛ, kena ki fna mbe ufun wre sɛ uyɛ nyina srawɔfun pan. 20 Mbe srawɔfun wre u le chiriri, na ki waa pan na ki lawee kre juo, a yooro nyjɛ yi kan wa yire fniŋge, kena srawɔfun wre fna mbe yo u pan na u pe nɛɛrɛ ndro. Kena mu chin na yiranyiɛrɛ yi yili laŋmbɛɛ yire titɛɛ. 21 La, na srawɔfun wre waa yi le chiriri, maa nya na u yooro nyjɛ yii wa mu kan wa yire n fniŋge, a yi lawee yire pe mbrɛrɛ, mu pe faa, kena srawɔfun wre u ti mbe ufun wre tni uyɛ na ble kɔɔnashin. 22 Na yi titɛɛ yire waa na brɛri na yaa, kena srawɔfun wre u yo ufun wre pan na yiranyiɛrɛ ki u yii, kena u pe nɛɛrɛ ndro. 23 La, na yi titɛɛ yire n chinɛ, ndee mu na brɛri kre, kena mu chin na laŋmbɛɛ yire klɛ titɛɛ yi, kena srawɔfun wre u ti mbe ufun wre chin na u pe cheche.

24 Na ki pan na kanhun ndro shɔ, a u kabie kre yiɛ waa fniŋge, ndee mu nyina fɔɔ, 25 kena srawɔfun fna mbe ufun wre le chiriri. Na yooro nyjɛ yii wa mu kan klɛ yire nu kre waa fniŋge, a klɛ titɛɛ yire waa na juo, kena mu chin na yiranyiɛrɛ ki kiyɛ woni klɛ yire nu, kena srawɔfun wre fna mbe ti u ufun wre chin na u pe nɛɛrɛ ndro. 26 La, na srawɔfun wre waa u le chichie, maa nya na yooro finyi n wa klɛ titɛɛ yire nu, a yi titɛɛ yire n juo, ndee maa pe fwaa, kena srawɔfun wre u ufun wre wɔ mbe yili leele pre nu ble kɔɔnashin. 27 Srawɔfun wre fna mbe ndru mbe u le chichie ble kɔɔnashin ble kre na, na yi waa na brɛri na yaa, kena mu chin na yiranyiɛrɛ yi, kena srawɔfun wre u ti mbe u fun wre chin na u le nɛɛrɛ nu. 28 La, na imi klɛ yire nyi jle kre, na pan yi nyi, a yi n na brɛri, a yi titɛɛ yire pe faa kre, kena mu chin na klɛ yire yiɛ yi pe ma, kena srawɔfun wre u yo ufun pan na u pe cheche, kena mu chin na klɛ yire yi koo, kre ki tia.

29 Na kla to blɔ, ndee chlɔ ndra na, ndee na u nyutan na yi o, 30 srawɔfun wre u kla kre le chiriri. Na ki waa pan na kla kre juo, na yooro nyjɛ yii wa ki nu yire waa na chaa mbe pe na ŋgonyina yi, mu pe fiɛn fiɛn kre, kena mu chin na yiranyiɛrɛ yi, kena srawɔfun wre u yo ufun wre pan na u pe nɛɛrɛ ndro. 31 La, na srawɔfun wre waa klɛ yire sembremu le, a yi n na juo, a nyjure wɔɛ n wa mu kan kan yi nu, kena srawɔfun wre u ufun wre wɔ mbe yili leele pre nu ble kɔɔnashin. 32 Ble kɔɔnashin wo kre na, mbe srawɔfun wre ndru mbe klɛ yire le chiriri na, na ki waa pan na klɛ yire n na brɛri, a u n shia yooro nyjɛ yi pe na ŋgonyina yi yire nya, a yi n na juo kre, 33 kena ki fna pe u ndra, ndee u nyutanyooro klu, fɔna klɛ titɛɛ yire. Kena srawɔfun wre ndru mbe ti u sɛ tni uyɛ ble kɔɔnashin na. 34 Ble kɔɔnashin ble kre na, mbe srawɔfun wre ndru mbe klɛ yire le na, na klɛ yire n na brɛri, a yi n na juo kre, kena srawɔfun wre u yo ufun wre pan na u pe cheche. Kena u u yirɛ je mbe yili nɛɛrɛ nu. 35 La, ŋga pe yo ufun wre pan na u pe cheche kre kɔkro, na klɛ yire waa brɛri naa, 36 kena ki fna mbe srawɔfun wre ndru mbe u le chichie na, na yɛŋgɛ yi na klɛ yire brɛri kre, kena ki n shia na we nyjure yire nyini le na, kolo kro na, ndro wre fun wre pe nɛɛrɛ ndro. 37 La, na ki waa pan na srawɔfun wre u le, a u jawala waa u pe na klɛ yire n na brɛri, a nyjure wɔɛ yi gbuun na paan, kena mu chin na klɛ yire koo na paan. Kena ndro wre pe cheche, kena srawɔfun wre fna mbe ti u chin na u pe cheche.

38 Na blɔ, ndee chlɔ waa yirɛ patipati finyi nya u wejiŋge na, 39 ki fna mbe srawɔfun yi le chiriri. Na waa nya na yi fniŋge fɔɔ, kena mu chin na haŋmbaara yi wo u na waara, kena u yo ufun pan na u pe cheche.

40 Na lewo ndra pɔ, a u ndra nyjure waa kɔ u ndra na, ndro wre fun pe cheche. 41 A na u nduwe haa chiin ki pɔ naa, ufun wre pe cheche. 42 La, na kla waa to u ndra, ndee u nduwe pɔ wo kre na, maa pe na ki nyinai, mu ndru na fniŋge yi kre, mu chin na yiranyiɛrɛ ki u yii. 43 Na ki pan ma, ki fna mbe srawɔfun wre ufun wre le chiriri, na pan klɛ yire pe na yi nyinai, na fniŋgei yi yɛŋgɛ kre, mu chin na yiranyiɛrɛ ki u yii, 44 kena srawɔfun wre fna mbe yo ufun wre pan na klɛ nyjɛ u ndra na yire na, u n pe cheche.

45 Lewo ŋmba yiranyiɛrɛ yii kre kolo ŋga na kpan, dodonyi wlɛɛ u fna mbra leni, mbe u ndra ti ma mbe wa ki saanri, mbe u mana, na u nyu haa pɔ mbe tɔ, mbra gble leni mbra tro mbra yuu na, ‘Ni n pe cheche! Ni n pe cheche!’ 46 Nyjila ŋga ni yiranyiɛrɛ yiree wa u na kre krɛrɛ, wa pe cheche, a ki fna mbe pe u wɔ mbe yili leele pre nu, mbe u tni uyɛ na.

47 Na yoŋgo waa pɔri, mu chin na kaandɔɔ wi. Na yurɔ yooro yoŋgo yi o! Ndee na jese plɔplɔ yoŋgo yi o! 48 Ndee na yurɔ hlɛ wo yi o! 49 Na ki waa pɔri, maa pe na wrɛ nyiŋge yi, ndee maa nyina, ki fna mbe pe srawɔfun nyina ki yi. 50 Kena srawɔfun wre kaandɔɔ wre le chichie, mbe yira kre nyini kre shɔ mbe sɛ tɛɛ haka ble kɔɔnashin. 51 Na ble kɔɔnashin ble kre waa da, mbe u ndru mbe sɛ ki le chiriri na, na kaandɔɔ wre waa nɛɛ mu ya, kena yira kre nyini pe nɛɛrɛ yira. 52 Kena srawɔfun wre fna mbe yira kre sro, ŋgi na hin? Kaandɔɔ yira kre yii, a ki fna mbe pe kaandɔɔ wre sro.

53 La, na srawɔfun wre waa kaandɔɔ wre le chiriri, maa nya na kaandɔɔ wre n yira kre yii kpɔɔ mu ya, 54 kena srawɔfun wre u ti mbe pe yira kre je, mbe u ndru mbe sɛ ki tɛɛ haka ble kɔɔnashin na. 55 Na ble kre waa da, mbe srawɔfun wre ndru mbe sɛ ki le chichie na, na waa nya imi na kaandɔɔ wre na nyi jle kre pan u nyi tɛ, a ki yiɛ n chinɛ kre, kii wa na kaandɔɔ wre n nɛɛ mu ya, yira kre nyini n pe cheche. Yira kre kokoo ŋga na kaandɔɔ wre nyi kpan, ki fna mbe srawɔfun wre yira kre nyini sro. 56 La, na srawɔfun wre ki le chiriri, maa nya na kaandɔɔ wre laa yira kre na, na dodoŋgi na yi o! Na yurɔ hlɛ na yi o! Kokoo ŋga kaandɔɔ wre yii kre fna mbe srawɔfun wre bawa kre wali mbe wa. 57 Na kaandɔɔ wre waa ndru na paan yira kre na na, kena ki fna mbe yira kre fun ki sro. 58 A na waa yira kre je, a kaandɔɔ wre laa ki na, mbe u ndru mbe ki je na, kena ki pe cheche.”

59 Kena mbra ŋga ni e ŋga mu wru kaandɔɔ haa yi kre, na yoŋgo na ki nyi o! Na yurɔ hlɛ na yi o! Kolo ŋga na ee tro mbe chin na yira kre nyini pe cheche, ndee ki n pe cheche paala kolo na ni e nyina kre.