Chahoo Cheche Pee
12
O Tafun Nyiɛkpɔɔ na yo Moses pan mbo, 2 “Yo Israel leele pre pan na, na chlɔ waa siire ta, maa biblɔ se, we pe nɛɛrɛ ndro mbe hɛ su ble kɔɔnashin ble na. Pan u nyi na nyjila ŋga ni u paarii nyiɛpɔ nyiɛpɔ kre yi. 3 Pɔ wre ble kɔɔnatarɛ na, ki fna mbe pe u fɛŋgɛ kun. 4 Nyimi ŋga ki wo chlɔ wre pan kre ndra na u le nɛɛrɛ nu mbe sɛ su ble fulo na kɛmbɔtaarɛ nyu na. A ki n fna mbe u da yira ŋga ki pe cheche na, ndee mbe le Yoŋgo Nyuŋgo wa, fɔna ble nyjɛ nu u n pe cheche yire nyu to tun. 5 Na chlɔ wre waa bichlɔ se naa, wa pe cheche mbe sɛ su ble kɛmbɔjijirɛ na, imi na u n pe cheche u paari nyiɛpɔ yire nu kre. Mbe u shie ble fuloe taarɛ na kɔɔnanu na, mbe chin mbe pe cheche nyimi nyjɛ yira wo u pan yire nu.6 Na chlɔ wre ble nyjɛ nu wa pe cheche yire nyu waa to, na biblɔ u se, ndee na bichlɔ u se o! Ki fna u sɛ na mbɔɔ pɔ ŋmba u da yɛlɛ nyu ni mbe sɛ srawɔfun ŋga Yoŋgo Nyuŋgo kre nyu na, mbe u u tɛɛ mbe yurɛ sroo sra wɔ, wre na katoo kotro, ndee kotro titi ni mbe u pe tɛɛ mbe sisam sra wɔ. 7 Mbe srawɔfun wre sɛ sra kre wɔ chlɔ wre pan mbe o Tafun Nyiɛkpɔɔ ŋga, mbe ki ti mbe u pe cheche mbe yili nyimi nyjɛ yi wo u pan kre nɛɛrɛ nu. Kena na chlɔ, ndee blɔ u se kre, paala kolo ŋga na ki fna mbe u tro yi kre. 8 Na ki pan na chlɔ wre wa ja mbe mbɔɔ pɔ wre wɔ naa, kena u pan na kotulo shiin ni, ndee katoo kotulo shiin ni, mbe pe nunu tɛɛ mbe yurɛ sroo sra wɔ, mbe haŋu wre tɛɛ mbe sisam sra wɔ. Kre kolo ŋga na srawɔfun wre we tro mbe chlɔ wre yili nɛɛrɛ nu, mbe pe cheche.”