4 Yurɛ pre plɛɛ wa pie jlo mbe ka, la, pe yeŋgrɔɛ n yɔɔlɛ, a plɛɛ wa pe yeŋgrɔɛ yɔɔlɛ, la, pra jlo mbe ka, pre krɛrɛ n fna mbe e na pe kaa. Nyuuma jlo na kaa, la, u yeŋgrɔɛ n yɔɔlɛ, pe pe afuŋgo yurɛ mu e ŋga. 5 Yaa shia kaŋglo ka, u jlo na kaa, la, u n yeŋgrɔɛ ni, mbaa yo yɔɔlɛ yie yɔɔlɛ. Ki tia u pe afuŋgo yurɔ mu e ŋga. 6 Pee jlo na kaa, la, yeŋgrɔɛ n wa u pan, a yi yɔ. Ki tia pe pe afuŋgo yurɛ mu e ŋga. 7 Yaashia prako ka. U pe afuŋgo yurɔ mu e ŋga, u yeŋgrɔɛ yɔɔlɛ, a la, wra jlo mbe ka. 8 Pre yurɛ pre krɛrɛ yaa shia pe wa ka, a yaa shia da pe wa gboo na, pe pe afuŋgo yurɛ mu e ŋga.

9 Yurɛ mblɛ pee wa lɔɔ, ndee epo nu kre kro, pe mblɛ pee wa kuɛn, na krɔɛ ni kro ee jaa pe ka. 10 La, yurɛ mblɛ pee wa epo nu, ndee lɔɛ nu, a pe n kuɛn, ndee krɔɛ ni kro, pe mblɛ pe klo na nyaari peyɛ na pre kro, yaashia pe ka. 11 Pre yurɛ mblɛ krɛrɛ pe afuŋgo mu e ŋga. Kena yaa shia pe wa kaara le nyuu, ndee mbe kɛ taa pe wa gboo na. 12 Yaa shia yurɔ ŋmba uu wa lɔɔ a u n kuɛn, ndee krɔɛ ni ka.

13 Hanyiɛlɛ mblɛ pe n fna e na kaa lɛ kre. Nyuu, na kɔkɔsaki, na kɔkɔsaki wɔɔ, 14 kpanyuu wɔɔ, na pe nyininyini pre kro, na kpanyuu nyiɛ, 15 na gɔɔgɔɔe nyininyini, 16 na kuwee, na kuwee saŋmbele, na fufla nyininyini, 17-18 kuweele nyininyini, 19 na lɔɔchloe nyininyini, na tindo, na tro.^a

20 Yurɛ bɛɛlɛ mblɛ pe yirii nyjeeri, a pe jeelee jinyjirɛnyjirɛ pre n fna mbe e pe ka, pe pe afuŋgo yurɛ mu e ŋga. 21 La, pe plɛɛ wa, ee jaa pre ka, pe mblɛ pe yeni na tuuri tra kre. 22 Ee jaa kpatɔ, na viun, na seesee, na kpaae ka. 23 La, pe hamblɛ mblɛ pee jeelee jinyjirɛnyjirɛ ni pre n fna mbe e pe ka.

24 Ŋmba we da yurɛ mblɛ wa gboo na kpan, u uyɛ tɔ nɛɛrɛ ni mbe sɛ su yilakɔŋgɔ. 25 A ŋmba we pe wa gboo wru kɛ ni kpan, ufun fna mbe u dodonyi je, a we pe nɛɛrɛ ndro mbe sɛ su yilakɔŋgɔ.

26 Puɛ yurɛ mblɛ yeŋgrɔɛ yi yɔɔlɛ, a yi n yɔ mu su, a wra jlo mbe ka wre pe afuŋgo yurɛ mu e ŋga, ŋmba we da pe wa gboo na kpan, ufun le nɛɛrɛ nu. 27 A puɛ yurɔ ŋmba uu kajin ni kpan, u pe afuŋgo yurɔ mu e ŋga, ŋmba we da pe wa gboo na kpan, ufun le nɛɛrɛ nu mbe sɛ su yilakɔŋgɔ. 28 Ndro ŋmba we pre yurɛ pre wa gboo yii kɛ ni kpan, ufun fna mbe u dodonyi je, a u le nɛɛrɛ nu mbe sɛ su yilakɔŋgɔ. Pre yurɛ pre krɛrɛ pe afuŋgo yurɛ mu e ŋga.

29 Pre yurɛ mblɛ krɛrɛ pe afuŋgo mu e ŋga, kɔkɔbu, na krote, na suŋu, na taanree, 30 na nyaasenyjaa, na paan, na kakra, na blɔblɔ, na awelele, pre krɛrɛ pe afuŋgo yurɔ mu e ŋga. 31 Pre yurɛ mblɛ nyini pe fulo tra kre kro pe afuŋgo yurɛ mu e ŋga. Na pe wa ku, ŋmba we kɛ taa u na kpan we le nɛɛrɛ nu mbe sɛ su yilakɔŋgɔ. 32 A na pe wa gboo waa yira ka mali kpan, yira ŋga pie pe na kre yira kre ni kpan, ki pe nɛɛrɛ yira. Na yira ŋga pe tiŋge tɛɛ mu pe yi o! Ndee na yoŋgo yi o! Ndee na yurɔ hlɛ yi o! Ndee na zaabɔtɔ yi o! Ki fna e ki je, a kie pe nɛɛrɛ yira mbe sɛ su yilakɔŋgɔ. 33 Na pe wa waa ku mu kun mu to chɔ na, yira ŋga kii wa chɔ kre nu kro we pe nɛɛrɛ yira, a ki fna mbe pe chɔ kre juari. 34 Na nyumu ŋga kii wa chɔ kre nu waa kna mu wo sro li wo na, sro kre we pe nɛɛrɛ yira. A na yira gbɔwo kii wa chɔ kre nu naa, kena ki pe nɛɛrɛ yira. 35 Yira ŋga na pe wa gboo we gbun kpan, yira kre nyini pe nɛɛrɛ yira. Na gbuɛnlɛɛ na yi o! Ndee na fnunu na yi o! Ki fna pe ki juari mbe wo, ŋgi na hin? Ki pe nɛɛrɛ yira. 36 La, na blo, ndee kɔlɔ nu yurɛ pre wa gboo to rɛ, ki nyu, la, yira ŋga kie gbun pe wa gboo na kpan pe nɛɛrɛ yira. 37 Na wa ku mu le yirɛ luuro nu, yirɛ yire n pe nɛɛrɛ yirɛ. 38 La, na pe yirɛ luuro fun nyumu ni mu tɛɛ, a yurɛ pre wa waa ku mu to yi nu, kena yi pe nɛɛrɛ yirɛ.

39 Na yurɛ mblɛ ee jaa ka pre wa waa ku, a e wa waa kɛ taa u gboo kre na, kena ufun wre le nɛɛrɛ nu mbe sɛ su yilakɔŋgɔ. 40 A na e wa waa yurɛ pre wa gboo kaara ka kre, ki fna mbe ufun wre u dodonyi je, a u le nɛɛrɛ nu mbe sɛ su yilakɔŋgɔ. A ŋmba we yurɔ gboo wre tio kpan, u fna mbe u dodonyi je, a ufun wre le nɛɛrɛ nu mbe sɛ su yilakɔŋgɔ.

41 Yurɛ bɛɛlɛ mblɛ pe nyaari na tro tra kre, yaa shia pe wa ka. 42 Yurɛ bɛɛlɛ mblɛ pe fulo gbun na, na pe mblɛ pe nyaari tra na tro, na pe mblɛ jeelee yi nɛɛ pre krɛrɛ, pe pe afunyi yurɛ mu e ŋga. 43 Yaa shia pe wa tɛɛ mbe eyɛ tɔ na nɛɛrɛ ni. 44 Mi wi e Tafun Nyiɛkpɔɔ, kena e eyɛ pe cheche e ni ŋga, ŋgi na hin? Ni pe cheche. Kena yaa shia eyɛ tɔ nɛɛrɛ ni na yurɛ bɛɛlɛ mblɛ pe nyaari tra yiɛ na pre ni. 45 Mi wi e Tafun Nyiɛkpɔɔ ŋmba ndaa e wɔ mna yili Egypt tra nu, mbe paan pe e Nyiɛkpɔɔ. Kena e pe cheche, ŋgi na hin? Ni pe cheche.

46 Kena mbra nyjɛ ni e ŋga mu wru yurɛ, na hanyiɛlɛ, na pe mblɛ pee wa lɔɔ, na yurɛ nyininyini mblɛ pe tro tra yiɛ na pre haa yi kre. 47 Ki fna e jaa yira ŋga ki pe cheche, na ŋga ki n pe cheche lalaa chin, mbe yurɛ mblɛ pe fna ka wolo, na mblɛ pe n fna ka wolo pre lalaa chin.”