3 Yaa shia yira ŋga o Tafun Nyiɛkpɔɔ yo na ki pe afuŋgo yira ka. 4 Yurɛ mblɛ ee jaa ka lɛ kre, nuu, na mbɔɔ, na nyua mbɔɔ, na sugbɔ, 5 safiun, na kafaa, na lɔŋgɔ, na sajeŋu, na kaafɔɔ, na klɔsaliɔ. 6 Yurɔ ŋmba yeŋgrɔɛ yi yɔɔlɛ, a wra jlo na kaa kpan, ee jaa u ka. 7 La, yaa shia nyuuma, na pee, na kaŋglo ka, pe jlo na kaa, la, pe n yeŋgrɔɛ ni a yi yɔɔlɛ, a paala kolo na kre, pe n pe cheche mu e ŋga. 8 Prako n pe cheche, kii wa na u yeŋgrɔɛ yɔɔlɛ, la, wra jlo mu ka, Yaa shia u kaara le nyuu, a na u ku yaa shia da u gboo na.

9 A yurɛ mblɛ pee wa lɔɔ kre, pe mblɛ pee wa kuɛn ni, na krɔɛ ni kpan, e na pre kaa. 10 La, pe mblɛ pan kuɛn, na krɔɛ n wa kre, yaa shia pe ka. Ŋgi na hin? Pe n pe cheche mu e ŋga.

11 Hanyiɛlɛ mblɛ pe pe cheche kro ee jaa pe ka. 12-18 La, hanyiɛlɛ mblɛ nyini ki n fna mbe e na kaa lɛ kre, nyuu, na kɔkɔsaki, na fufla nyini nyini kro, na lelaala, na gɔɔgɔɔe nyini kro, na kuweesaŋmbele, na kuwee chlɔ, na kuwee ble, na kuwee kpɔɔ, na kuwee fiŋge, na kpanyuulo nyini kro, na fimi tra kuwee, na lelɔŋgɔfiun, na lɔɔchlo, na tindo, na tro, na sekuan.

19 Kuɛn yurɛ bɛɛlɛ mblɛ pe yirii na chaa kre krɛrɛ, pe n pe cheche, yaa shia pe ka. 20 La, kuɛn yurɛ mblɛ pee cheche pre rɛ, e jaa pre ka.

21 Yaa shia yurɔ gboo ka. Ee jaa u wru mbe fuŋu ŋmba u yiri waŋgra ka nu mu pan mu tni e chiɛ yire ka na kre ŋga, mbe u u ka, ndee na e chaa mbe e u prɛ mbe u ŋga. La, yire rɛ, e pe cheche mu o Tafun Nyiɛkpɔɔ wre ŋga. Yaa shia sugbɔ, ndee mbɔɔ pɔ sɔɔ na u lo nyinimi nyumu ni.

22 Yɛlɛ nyini kpan, e le na ee e seele yirɛ nyjɛ ee ta yire yɔɔlɛ kɛ, mbe yi nunu wɔ mbe tɛɛ. 23 Na e e shɔlɔ, na e simi fɔnyi, na olive simi yire yɔɔlɛ kɛ kɛ mu nununu wɔ, yire na e yurɛ biile mblɛ pe klu mu se pre ni kre, e sɛ yi ka e Tafun Nyiɛkpɔɔ wre yiɛ, lawee nunu chom ŋga we wɔ mbe u mɛɛ tni wa kre, mbe ki ti mbe e tuan mbe e Tafun Nyiɛkpɔɔ wre fiɛ nyjila kro nu. 24 La, na ki waa pan na lawee kre haa waa le na e ni, a ki pan na e Tafun Nyiɛkpɔɔ wre e dwan, a e ta nɛɛrɛ, a yaa jaa e yirɛ nyjɛ e yɔɔlɛ kɛ kɛ mu nununu wɔ Nyiɛkpɔɔ pan yire tio mbe sɛ wa kre, 25 kena e e yirɛ yire prɛ, e sɛ na swa kre ni lawee ŋga e Tafun Nyiɛkpɔɔ wre we wɔ kre nu. 26 Ee jaa swa kre tɛɛ mbe yira ŋga e chaa kpan lɔ, na nuu wi o, na mbɔɔ wi o, na simi gbɔwo yi o, na simi sheli wo yi o, yira ŋga nyini e chaa kpan e ki lɔ na swa kre ni. Mbe yire na e katoo leele sɛ yi ka, ndee mbe gbɔ o Tafun Nyiɛkpɔɔ wre yiɛ, mbe yɛshɔɔrɔ li.

27 Yaa shia Levi leele mblɛ pee wa mu tni e nu pre fɛɛ. Ŋgi na hin? Pe n wa tra, ndee mu krɔyira ka ni. 28 Yɛlɛ taarɛ nyu na kpan, e pan na kre yɛlɛ kre seele yirɛ nyjɛ e yɔɔlɛ kɛ kɛ mu nununu wɔ yire kro ni, e pan e yi tɛɛ e chiɛ yire na. 29 Mbe ki ti mbe Levi leele mblɛ pe nsra tra, ndee krɔyirɛ ta e nu kre, pre na fumblɔ mblɛ pe yiri waŋgra ka nu mu pan mu tni e nu kre, na bijile, na lekuchiɛlɛ mblɛ pee wa mu tni e chiɛ yire na kre yaka ta mbe ka mbe yɔɔ, mbe ki ti e Tafun Nyiɛkpɔɔ wre e kɛ nyu tnumu kro dwan.