13
Na kee nyanyofun, ndee ŋunɛ nɔɔ nyinafun wa waa yiri e nu, maa kekpɔɛ, na kawako kee yɛ pe a e nya, 2 a kekpɔɛ, na kawako kee nyjɛ u pe yire waa pan ma yɛŋgɛ, a waa yo na, “E ti mbe o sɛ taa sɛɛnlɛ kro, mbe yi sumi kre, sɛɛnlɛ nyjɛ kee e n chin yire.” 3 Yaa shia ndie tɛɛ kee nyanyofun, ndee ŋunɛ ŋunufun wre kee nyjɛ we na yuu yire na. Na ki waa pan ma, kena e chin na e Tafun Nyiɛkpɔɔ wre u e pini na le, na ee u kori na e lolonyi, na e nyiɛ kro ni ndee mni hin? 4 E Tafun Nyiɛkpɔɔ wre chiin na ki fna e taa, a wre ki fna mbe e fiɛ. E li u mbra yire na, e ndie tɛɛ u pan, e mbra u na, e na u sumi. 5 Wre keenyanyofun, ndee ŋunɛ ŋunufun wre, e u gbo e yili e nu. Ŋgi na hin? Paara u paara na e nyina mbe e yiri mbe e Tafun Nyiɛkpɔɔ ŋmba wra e wɔ mu yili Egypt tra nu wre taan, a wre wra e wɔ mu yili tnibim nu. Wre ndro wre gbeŋmba na we e laa kolo ŋga o Tafun Nyiɛkpɔɔ wre e nyina mbe e tro kre na. E kre sisam kre nyini wɔ e yili eyɛ nu.6 Na wa lo pɔ, ndee wa biblɔ, ndee bichlɔ, ndee mu chɔ ŋmba mu kori, ndee mu nunu titi ju fɛɛ mu pan na mu fana na, “Ti mbe o sɛ sɛɛnlɛ sumi,” kre yire sɛɛnlɛ nyjɛ e tolɛɛlɛ, ndee yire titi n yi kee chin. 7 Leele plɛ we e le gbeŋmbaa mbra chaa mbe e sɛ leele mblɛ pe e fɛ mu kun pre sɛɛnlɛ yire sumi, na yi mbra e na o, ndee na yi haale na e ni o yaashia yi sumi. 8 A yaashia ti mbe prefɛɛnlɛ pre e ta, yaashia ndie tɛɛ pe pan kple. Yaashia pe fooro le, ndee mbe ti pe keshian pe e na. 9 A yaashia wa ti, e pe waari dnɛ ni e gbo, ŋu ŋmba ndro we pe ma kre, klu mu u wa dnɛ ni tun, mbe leele hamblɛ pre chin mbe u waari na dnɛ ni mbe gbo. 10 E u waari dnɛ ni e u gbo. Ŋgi na hin? U chaa mbe e laa e Tafun Nyiɛkpɔɔ ŋmba wra e wɔ mu yili Egypt tra nu wre kro, a bawa pra e pe tinlɛ kre. 11 Na ki pan ma, Israel leele we ki loo mbe fiɛ, mbe ndro wa yili e nu mbe kre sisam kee ŋga ka pe na.
12 Na e waa loo na yire kee yire ka pini e chiɛ nyjɛ o Tafun Nyiɛkpɔɔ e kaan mbe e tni yire ka na, 13 ndee na pre sisampefɛɛnlɛ mblɛ plɛ waa yiri e nu, na chaa mbe leele pre plɛ wa mbe fun, mbra yuu pe pan mbo, “E ti mbe o sɛ sɛɛnlɛ sumi,” sɛɛnlɛ nyjɛ kee e n chin kre, 14 kena e pe kee wie chiriri, na yɛŋgɛ yi, a leele ki dansiɛrɛ li na pe kre afuŋgo kee ŋga pini e nu kre, 15 kena e le na ee chia kre leele kro gbo peii na brɔfiɛn yiɛ shiin ni, e pe kla, pre na pe yirɛ, na pe yurɛ, na pe chia kre ni kro. 16 Yirɛ nyjɛ ee koli chia kre na kro, e sɛ yi ble chia kre lalaa, e chia kre, na yirɛ yire kro sro, mbe ki pe na yirɛ sroo sra e woni na e Tafun Nyiɛkpɔɔ wre kaan. Chia kre ki kro kajaa ma nyjila kro nu, ndro waa shia ki sin na. 17 Wa waa shia yire jini yirɛ yire ka wru, imi kie pe mbe o Tafun Nyiɛkpɔɔ wre krɔ wa kun na e ni, mbe u e fooro le, mbe e kee u shian, mbe u ti e nɛɛ, imi na wra da mna nyu yo e tolɛɛlɛ pan kre, 18 Ŋgi na hin? E ndie tɛɛ e Tafun Nyiɛkpɔɔ wre pan, mu li u mbra nyjɛ ni e kaan aŋga ŋga na, mu na ŋga ki fraka pini u yiɛ.