Sumi Lawee Nunu Chom Kre
12
E dɔɔ ta na ee li mbra nyjɛ na tra kre nu, yire mbra nyjɛ o Tafun Nyiɛkpɔɔ, e tolɛɛlɛ Nyiɛkpɔɔ wre e kaan mbe e li yi na, tra ŋga e shie mbe sɛ wru mbe tni kre nu nyjila kro nu. 2 E sɛɛnlɛ sumi hɛɛ nyjɛ pe sin sin nyuɛ gedenyi, na nyambie na yire kro juari peii e wo, yire na nyjɛ yii wa tinyi kpɔɛ nyimi, a waŋgrɛ nyjɛ trɛ e shie mbe sɛ shɔ kre leele na yi sumi kre kro. 3 E pe sragbuɛnlɛɛ yire juari, e pe dnɛ nyjɛ pe peerii yire kro juari, e pe sɛɛn chlɔ Asherah kɛɛn gedenyi nyjɛ pe kan sholo yire kuari e yi sro. Pe sɛɛnlɛ yire kro, e yi chile e wo, mbe yi mɛɛ fun mbe yili lawee yire nu, mbe ndro wa yi mɛɛ loo na.4 Yaashia e Tafun Nyiɛkpɔɔ wre sumi kolo ŋga na pe tro na pe sɛɛnlɛ yire sumi kre na. 5 La, e lawee ŋga e Tafun Nyiɛkpɔɔ wre we wɔ e jlom yire kro nu mbe u mɛɛ tni wa, mbe ki pe u tni haa kre, e bawa haa cha. Kre lawee kre nu ki fna e sɛ sumi. 6 Bawa ki fna e sɛ na e yirɛ sroo sra, na e sra wɔ yurɛ ni, na yirɛ nyjɛ e taa mbe yi yɔɔlɛ kɛ mbe Nyiɛkpɔɔ ŋga nunu yire, na nyjɛ e yaa yi na yire ni kro, na e nyu suŋgɔ yirɛ nyjɛ e Nyiɛkpɔɔ kaan yire, na yire titi chaara sra wɔ yirɛ, na e yurɛ bijloe mblɛ e woni na Nyiɛkpɔɔ kaan pre ni. 7 O Tafun Nyiɛkpɔɔ yiɛ wa ki fna mbe yire na e sele wolo pre yɛshɔɔrɔ li, yirɛ chichiele nyjɛ e tunumu tun mu ta kre ndra na, ŋgi na hin? O Tafun Nyiɛkpɔɔ wre u e dwan.
8 Kolo ŋga e ta na e tro na sumi fa, la, na e waa le tra kre nu, e Tafun Nyiɛkpɔɔ wre we lawee ka wɔ mna ee na shie mbra sumi. 9 E n ta mu da e wuuhaa ŋga e Tafun Nyiɛkpɔɔ wre e kaan mbe e ki ta na krɔyira yi kre nu tun. 10 La, ee Jordan Lɔɔ kre kun mbe sɛ tra ŋga e Tafun Nyiɛkpɔɔ wre e kaan na krɔyira yi kre nu wru mbe tni, a we ti mbe e wuu e loŋgoolo mblɛ pe fɛ mu e kun kre kɛɛ, mbe ti e tni wejinyiŋge nu. 11 Kena lawee ŋga o Tafun Nyiɛkpɔɔ wre we wɔ mbe u mɛɛ tni wa kre, bawa ki fna e na shie e sra yirɛ nyjɛ kee ni yo e pan yire ni, yurɛ sroo sra, na sra wɔ yirɛ hɛnyi nyjɛ e woni yire, na yirɛ nyjɛ e yɔɔlɛ kɛ mbe Nyiɛkpɔɔ ŋga nunu yire, na e chaara sra yirɛ, na e nyu suŋgɔ sra yirɛ nyjɛ e woni yire kro ni. 12 A bawa ki fna mbe e ti mbe e yiɛ shɔ e Tafun Nyiɛkpɔɔ wre yiɛ, yire na e bibilɛ, na e bichiɛlɛ, na e letaala, na Levi srawɔfɛɛnlɛ mblɛ pee wa e chiɛ na, a pe n tra ni, ndee krɔ yira ka ni kre. 13 E dɔɔta mbe yaashia na e yirɛ sroo sra woni lawee ŋga e chaa kro nu. 14 E ta e sra yire woni lawee nunu chom ŋga e Tafun Nyiɛkpɔɔ wre we wɔ e jlom yire ka nu kre nu, bawa chiin ee na e sra yire woni, mbra yirɛ hɛnyi yire pini imi na ndaa yo e pan kre.
15 La, ee jaa e yurɛ mblɛ ni e Tafun Nyiɛkpɔɔ e dwan pre plɛ gbo e chiɛ yire na mbe ka imi na e chaa, imi na e kafaala na safimble kuu na kaa kre. Na ndro n pe cheche o, we jaa kaara yire ka. 16 La, na e yurɔ wre gbo yaashia u nyimi ka, e ti mbe yi wo tra na nyumu pe kna mu wo. 17 Yire titi waashia tni e chiɛ yire na mbe e yirɛ nyjɛ e na yɔɔlɛ kɛ kɛ mbra Nyiɛkpɔɔ kaan nununu yire, na e shɔlɔ, na simi gbɔwo fɔŋgɔ, na olive simi, na e nui, na e yurɛ mblɛ pie klu mbe se, ndee na yirɛ nyjɛ na e nyu suŋgɔ wru o Tafun Nyiɛkpɔɔ wre ni, na e chaara sra yirɛ, na e kɛ yirɛ nyjɛ e na yaa yi na yire ni yire kaa wa. 18 La, yire na e bibilɛ, na e bichilɛ, na e letaala, na Levi leele mblɛ pee wa mu tni e chiɛ yire na kre, e sɛ yi ka o Tafun Nyiɛkpɔɔ wre yiɛ, lawee ŋga u wɔ mu tɛɛ kre nu. Na e kɔ mbe e yɛshɔɔrɔ li e yirɛ nyjɛ e tnumu tun mu ta yire na. 19 E dɔɔta mbe yaashia Levi leele pre kee fɛɛ nyjila ŋga nu ee wa mu tni tra kre nu kre.
20 Na e Tafun Nyiɛkpɔɔ wre waa tra kre ka shɔ mu ya e pan, a ki vala mu ya imi na wra nyu yo e pan kre, a tɛɛnrɛ waa e yii, a e na kaara chaa mbe ka kre, kena ee jaa e yurɛ pre plɛ gbo mbe ka imi na e chaa. 21 Na lawee nunu chom ŋga e Tafun Nyiɛkpɔɔ wre wɔ mbe u mɛɛ tni wa kre haa waa le na e ni, ee jaa yurɛ mblɛ o Tafun Nyiɛkpɔɔ e ŋga pre plɛ gbo mbe ka e chiɛ yire na imi e chaa, imi ndaa yo e pan kre. 22 Ee jaa pe plɛ gbo mbe ka imi na e kafaala, na sabɛɛlɛ kuu na kaa kre. Na ndro n pe cheche we jaa kaara kre ka ka. 23 La, e dɔɔta na e yurɔ gbo mbe yaashia u nyimi ka. Ŋgi na hin? Nyimi yire nu ŋmaa nyi, a ki n fna e ŋmaa na kaara kre chaa mbe ka. 24 Yaa shia nyimi yire ka, e ti yi wo tra na nyumu e kna mu wo. 25 Yaa shia yi ka, mbe ki ti kee kro nyu mbe yire na e biile mblɛ pie yiri e kro kre ŋga. Ŋgi na hin? Na e pe ma, kena e ŋga ki fraka o Tafun Nyiɛkpɔɔ wre yiɛ na pe. 26 La, e sɛ na e sra yirɛ cheche yire, na yirɛ nyjɛ nyu suŋgɔ e wru na o Tafun Nyiɛkpɔɔ wre ni yire ni lawee nunu chom ŋga we wɔ mbe tɛɛ kre nu. 27 E sɛ na yirɛ nyjɛ ee sro yire ni o Tafun Nyiɛkpɔɔ wre sragbunu kre na, yurɔ wre kaara, na u nyimi yire kro e sɛ na yi ni wa, mbe e yurɔ wre nyimi yire kna mbe wo o Tafun Nyiɛkpɔɔ sragbunu kre na, la, u kaara kre rɛ, ee jaa kre ka. 28 E dɔɔta na yire kee nyjɛ ni yo e pan ŋga ee li yi kro na, mbe ki ti kee kro nyu mbe yire na e biile mblɛ pie yiri e kro kre ŋga nyjila kro nu. Ŋgi na hin? Na ki pan ma kee ŋga ki nyu, mu fraka ee na pini o Tafun Nyiɛkpɔɔ wre yiɛ.
Sɛɛn Sumiɛ Jaaraa
29 E Tafun Nyiɛkpɔɔ wre we waŋgrɛ nyjɛ leele trɛ e shie mbe sɛ shɔ mbe tni yire kla. La, na e waa pe trɛ yire wru mu tni kre, 30 nyjila ŋga ni o Tafun Nyiɛkpɔɔ wre we pe kla mbe kɔ kre, e dɔɔta mbe pe sɛɛnlɛ yire wa kaari e pan pɛlɛ, mbe e sɛ na yi kee wie mbra yuu na, “Kolo ŋgi na waŋgrɛ nyjɛ leele tro na pe sɛɛlɛ sumi hin? O chaa mbra pini ma na.” 31 Yaa shia e Tafun Nyiɛkpɔɔ wre sumi kolo ŋga na pe troi na pe sɛɛnlɛ yire sumi kre na. Ŋgi na hin? Na pe pe sɛɛnlɛ yire sumi, kee nyjɛ yi pe o Tafun Nyiɛkpɔɔ wre afuŋgo yirɛ, a yi kee u bin yire pe pini, hali, na pe bibilɛ, na pe bichiɛlɛ sroi na sra woni na pe sɛɛlɛ yire kaan.
32 E dɔɔ ta na ee li kee nyjɛ ni yo e pan nyjɛ kro na, yaa shia ka ya yi na, a yaa shia ka wɔ mbe wa.