Nyiɛkpɔɔ Kpɔɔmu
11
E e Tafun Nyiɛkpɔɔ wre kori, e na lii u mbra yire kro na nyjila kro nu. 2 E sɔɔnri aŋga, na e biile ma pra kee nyjɛ ni e Tafun Nyiɛkpɔɔ wre na tɛɛ mna e fraka yire nya, e na u kpɔɔmu, na u jaŋga kpɔɔ kre nya, 3 mna u sɛmbɛɛrɛ kee, na kee nyjɛ wra pe Egypt ŋunu Pharaoh, na u leele na kro yire nya. 4 A e na kee nyjɛ wra pe Egypt ŋunɔwifɛɛnlɛ, na pe soolo, na pe sookɛɛ na, imi na wra tia epo nyiɛ kre na pe li, nyjila ŋga ni praa e kɔŋgɔ nini mbe sɛ e yii kre, e na nya imi na wra pe kla peii mu da. 5 E biile ma pra kee nyjɛ wra pe mu e ŋga tablɔ tra nu wa yire nya, wra yire kee yire pe mu e ŋga a e na chin mu da mna e nyi ŋga. 6 E na kee nyjɛ wra pe Eliab bibilɛ Dathan, na Abiram na yire nya. Eliab na yiri Reuben jlom na. Nyiɛkpɔɔ na tia tra na yɔ Israel leele pre lalaa mna pe jɔli, pre na pe katoo leele ni kro, na pe yonyi nyinyi, na yirɛ nyjɛ yiraa wa pe pan kro ni. 7 Yire titi yiɛ na na yi, e na yire kekpɔɛ nyjɛ o Tafun Nyiɛkpɔɔ na pe yire kro nya.Nyu Suŋgɔ Tra Kre Dwamu
8 Kena e li mbra nyjɛ ni e ŋga aŋga ble ŋga nu ŋga kro na, mbe ki ti e faŋga ta mbe sɛ tra ŋga ee Jordan Lɔɔ kre kun mbe sɛ wru mbe tni kre nu, 9 mbe ki ti e ŋmaa tnu tra taan ŋga e Tafun Nyiɛkpɔɔ na da na we e tolɛɛlɛ, na pe nanae ŋga kre nu. 10 Tra ŋga e shie mbe sɛ wru mbe tni kre n pe na Egypt tra ŋga nu e yiri kre yi, bawa e yirɛ ndru, mbra nyaari mbra nyumu woni yi na na kagbla yirɛ yi. 11 La, tra ŋga ee Jordan lɔɔ kre kun mbe sɛ wru kre rɛ, nyuɛ na landɛɛ lawee nyjɛ nu, nyiɛ paan na woni nyjila kro nu. 12 Ki pe tra ŋga e Tafun Nyiɛkpɔɔ wre titi u ki le, a u yiɛ wa ki na nyjila kro nu a wra ki le mu yire yɛlɛ nɔɔhle haa, mu sɛ su ki kɔɔrɔ na.
13 Kena na e li mbra nyjɛ ni e kaan aŋga ŋga na kpra ni, mu e Tafun Nyiɛkpɔɔ wre kori, mu na u sumi na e lolonyi kro ni, na e nyiɛ kro ni kre, 14 kena we ti mbe nyiɛ pan mbe wo e tra na yi nyjila nu, koo nyiɛ, na nyiɛ jle we pan mbe ki ti e shɔlɔ, na simi gbɔ wee, na olive simi ta. 15 A nyaa we nyu mbe e nui ta mbra kaa, a yire titi sro nyjɛ e chaa ta mbe li mbe yɔɔ. 16 E dɔɔta, na kre ma pie e fana mbe e laa o Tafun Nyiɛkpɔɔ wre kro, mbe sɛ sɛɛnlɛ sumi, mbe suulo yi yiɛ. 17 A na ki waa pan ma, o Tafun Nyiɛkpɔɔ wre krɔ we kun na e ni, mbe u nyjeeri tɔ mbe nyiɛ wa pan, mbe ki ti e yire nyjɛ ee luu tra kre nu wa nyu, a kia mu mbe e ku mbe fun tra taan ŋga o Tafun wre e kaan kre nu.
18 E ti mbe yire kee nyjɛ ni yuu e pan ŋga tni e lolonyi, na e jawala nu, e yi pɔ e kɛnyi, na e nduweele na, mbe ki ti e na yi sɔɔnri. 19 E e biile nyina yi yi, na ee wa e kalonyi nu, ndee na e kolo yii na shie, ndee na e tni na wuui, ndee na tnumu e tuni o, e na yi kee yuu eyɛ pan. 20 E yi nyunɔ e kalonyi krɔɛ jeelee na, na e kalonyi nyu krɔɛ na, 21 mbe ki ti ble nyjɛ ee li, na e biile ble nyjɛ pie li nɛɛ tra ŋga o Tafun Nyiɛkpɔɔ na da na we e tolɛɛlɛ ŋga kre nu, nyjila ŋga nu nyjeeri we tra yiɛ tɔ mbe sɛ su kpan, pan ee tni tra kre nu mbe mu mbe da.
22 Na ee dɔɔta mbe li mbra nyjɛ ni e kaan ŋga na, mbe e Tafun Nyiɛkpɔɔ wre kori, mbe taa u kee nyjɛ u yuu kro na, mbe pe imi na u chaa kre, 23 kena o Tafun Nyiɛkpɔɔ we waŋgrɛ yire kro leele ni e yiɛ, mbe e sɛ yire waŋgrɛ nyjɛ yi kpɔɔ kpɔɔ, a yi leele faŋga ni mu wɛ e na pre trɛ wru mbe tni. 24 Lawee ŋga nu ee jele kan kpan, mbe e ŋga ki yi. E tapan haa sam we yire tablɔ tra kre na mbe sɛ su Lebanon nyua kre na nyjeeri haa, mbe e yila fin haa sam yire Euphrates lɔɔ kre na, mbe sɛ su Mediterranean epo kre na mbra shie yila tohaa. 25 Ndro n wa mbe jaa yire e yiɛ, imi na e Tafun Nyiɛkpɔɔ na nyu yo e pan na we ti mbe tutom, na e fiɛrɛ wo leele na tra kre lawee ŋga nu ee tro kro nu.
26 E le, dwamu na suŋgɔ ni teeri e yiɛ aŋga ble ŋga nu. 27 Na ee li o Tafun Nyiɛkpɔɔ mbra nyjɛ ni e kaan aŋga ŋga na wala, kena ee dwamu ta. 28 La, na e waa ndikana pe e Tafun Nyiɛkpɔɔ mbra yire na, maa krɔ kna mu wa kolo ŋga ni e nyina kre na, maa sɛ taa sɛɛnlɛ nyjɛ e n chin fa na kre, kena suŋgɔ we e yii. 29 Na o Tafun Nyiɛkpɔɔ wre waa le na e ni tra ŋga e shie mbe sɛ wru kre nu, e sɛ yire nyua Gerizim na e kee nyjɛ yie pan na dwamu yire kee kpali, mbe e sɛ yire nyua Ebal na mbe kee nyjɛ yie pan na suŋgɔ ni yire kpali. 30 Imi na e ki chin kre, yire nyuɛ shiin yiree wa na shie Jordan lɔɔ kre yila tohaa, mu mbra tinyi kpɔɛ nyjɛ yii wa Moreh na kre na, a yii wa Canaan leele tra nu lɔɔ kre landɛɛ nu, a yire na Gilgal haa n le. 31 Ki kro chiɛri mbe e Jordan lɔɔ kre kun mbe sɛ tra ŋga e Tafun Nyiɛkpɔɔ wre we e ŋga kre wru mbe tni. Na e waa tra kre wru mu tni wa kre, 32 e dɔɔta na ee li mbra nyjɛ ni e kaan aŋga nyjɛ kro na.