3 A ndaa tiŋge ŋga pe yeeri akasia kre tɛɛ mna danka tɛ, mna dnɛ kpaflɛ shiin yɛ tɛ na jle wee yire yi, a ndaa nduu na yi ni nyua kre na. 4 A o Tafun Nyiɛkpɔɔ na ndru mna kee nyjɛ wra nyunɔ fa yire nyunɔ dnɛ kpaflɛ shiin yire na. Mbra kɛ nyjɛ wra e ŋga ble e na sɛ yire nyua kre jaara a wra paara na ni ni kanhun kre nu kre. O Tafun Nyiɛkpɔɔ wre na ni ŋga yire dnɛ yire, 5 a ndaa tii nyua kre na mna pan mu dnɛ kpaflɛ yire le danka ŋga ndaa pe kre nu, imi o Tafun Nyiɛkpɔɔ na yo ni pan kre, a yii wa wa mu pan mu su aŋga na.

6 Israel leele pre na yili kɔlɔe nyjɛ yira pe Jaakan leele wee yire lawee, mna sɛ lawee ŋga praa yeeri Moserah kre nu. Bawa Aaron na ku, a pra u le, a u biblɔ Eleazar na u krɔ li mna pe sɔfu. 7 Ŋga pra yiri wa a pra sɛ lawee ŋga praa yeeri Gudgodah kre nu, mna yiri wa mna sɛ lawee ŋga praa yeeri Jotbathah kre nu, tra ŋga nu lafoelee yɛ na nyumu na nyi nu. 8 Kre nyjila kre o Tafun Nyiɛkpɔɔ na Levi jlom leele pre wɔ, na pre pie na o Tafun Nyiɛkpɔɔ Nyu Nunu Daka kre tru mbra yire u yiɛ, mbra sɔfum tnumu kre tuni, mbe u mɛɛ tɛɛ mbra dwan mbra leele pre kaan, imi na pe pini aŋga tɛ ŋga. 9 Kre ki tia a Levi sele kre nsra krɔyira ka ta na pe wolo hamblɛ pre lɛ, o Tafun Nyiɛkpɔɔ wre sɔfum lie kre na yi krɔyira ŋga pra ta, imi na o Tafun Nyiɛkpɔɔ wre na yo pe pan kre.

10 Kre nyjila kre nu ndaa tni nyua kre na wa ble fuloe shiin lafo na blee, imi na ndaa pe jle kre. A o Tafun Nyiɛkpɔɔ na ni nyiɛtalaa loo na, mna yo mbo wa e kla. 11 A o Tafun Nyiɛkpɔɔ wre na yo ni pan mbo, “Sɛ yiɛ klu na leele pre ni mu sɛ na pe ni tra ŋga kee na ndaa da mna yo pe tolɛɛlɛ pan na mbe pe ŋga kre na.”

12 Kena Israel leele, yira ŋgi e Tafun Nyiɛkpɔɔ wre chaa e pan hin? Na ŋga ee e Tafun Nyiɛkpɔɔ wre fiɛ, mbe taa u kee na, mbe u kori, mbe u sumi na loloŋgo, na e nyiɛ kro ni bɔkɔ, 13 mbe li u mbra nyjɛ ni e kaan aŋga ble ŋga nu ŋga kro na, e chichie ndra na. 14 E le, o Tafun Nyiɛkpɔɔ wre wo yi nyjeeri, hali mu sɛ su nyjeeri nyjeeri, kre na tra, na yirɛ nyjɛ yii wa ki na kro u wee yi. 15 Nde o Tafun Nyiɛkpɔɔ wre na e tolɛɛlɛ pre kori kpɔɔ, mna yire pe nanae mblɛ wɔ, mna waŋgrɛ hɛnyi yire leele ti, imi na e ki nya ŋga. 16 Kena e ndie tɛɛ u nyu kee na, e ndikana pee ti. 17 Ŋgi na hin? E Tafun Nyiɛkpɔɔ wre, u jaŋga kpɔɔ mu wɛ sɛɛnlɛ yire kro na, a tafɛɛnlɛ kro Tafun wi. Wre u kpɔɔ, mu jaŋga ni, a u kee fiɛrɛ ni mu tro, a wra ndro yiɛ le mbe chiin u kala pe, a wra dɔli yira shɔ. 18 Wre u bijile, na lekuchiɛlɛ kala lii na pe kaan ki kolo na, u fumblɔ mblɛ pe yiri waŋgra fɔŋgɔ nu kori, na pe kaan sro na yonyi pra peyɛ krafa. 19 Kena fumblɔ mblɛ pee wa e nu kre e pe kori. Ŋgi na hin? Yire chɔɔ, fumblɔ na lɛ yire Egypt tra nu. 20 E e Tafun Nyiɛkpɔɔ wre fiɛ, e na u sumi. E mbra wre chiin na, e na dani na u mɛɛ ni. 21 E na u kaan mɛɛ, wre wi e Nyiɛkpɔɔ ŋmba wra kekpɔɛ, na kawako kee fiɛrɛ wee pe a e na yi nya nyiɛlɛ ni kre. 22 E tolɛɛlɛ mblɛ pra sɛ Egypt tra nu kre kro naa fuloe taarɛ na kɛ, a fuŋgaami ŋga, e Tafun Nyiɛkpɔɔ wre tia e nɛɛ na wɔɛlɛɛ yi nyiɛ yiɛ na.