4 Na e Tafun Nyiɛkpɔɔ wre waa pe ni e yiɛ, yaa shia na yuu eyɛ pan na, “Na fna ki fna mbe o Tafun Nyiɛkpɔɔ o ŋga tra ŋga.” Pan ma ki nyi, la, waŋgrɛ yire sisampee na o Tafun Nyiɛkpɔɔ yila na pe nini e yiɛ. 5 Ki n pe na yaka e pe, ndee nyuu e nyu kre ki tia o Tafun Nyiɛkpɔɔ wre na e kaan pe tra kre, la, leele pre sisam ndra na e Tafun Nyiɛkpɔɔ yila mbe pe ni e yiɛ, mbe ki ti mbe u li u daŋga ŋga wra da mu e tolɛɛlɛ Abraham, na Isaac, na Jacob ŋga kre na. 6 Kena yire titi e jawa e chin na, nyuu ma e nyu kre ki tia e Tafun Nyiɛkpɔɔ wre na e kaan kre tra taan ŋga mbe ki pe e wo. Pan ma ki nyi, yire rɛ, ndikambla lɛ yire.

7 E sɔɔnri, mbe yaashia fɛɛ, imi na e na e Tafun Nyiɛkpɔɔ wre pe, a u krɔ na kun tablɔ tra kre nu wa. Mu yire ble ŋga na e na yili Egypt tra nu, mu pan mu su ble ŋga na e le tra ŋga nu, pan e yirii na u taanla. 8 Hali Sinai Nyua kre lawee wa, e na tia o Tafun Nyiɛkpɔɔ krɔ na kun mu tro, a kra da mbe wra e kla. 9 Ŋga ndaa nduu nyua kre na mbe sɛ dnɛ kpaflɛ shiin nyjɛ na o Tafun Nyiɛkpɔɔ na u nyu nunu ŋga wra pe na e ni yire kee nyunɔ kre shɔ kre, ndaa li ble fuloe shiin nyua kre na, lafo na blee, ni nsra yaka ka, a ni nsra nyumu gbɔ. 10 O Tafun Nyiɛkpɔɔ wre na ni ŋga dnɛ kpaflɛ shiin nyjɛ na wre titi na u kambɛlɛ tɛɛ mna nyunɔ, mbra nyjɛ wra le e pan nyua kre na nyjila ŋga ni e na fni titɛɛ a wraa paara kanhun nu kre wra nyunɔ yi na. 11 Ŋga ble fuloe shiin, lafo na blee yire nyu na to kre, o Tafun Nyiɛkpɔɔ na ni ŋga yire dnɛ kpaflɛ shiin nyjɛ na wra u nyu nunu kee yire nyunɔ kre.

12 Bawa o Tafun Nyiɛkpɔɔ na yo ni pan mbo, “Yiri mu tii tra nyaanyaa! Ŋgi na hin? Mu leele pre mu wɔ mu yili Egypt tra nu kre, pe kepele fɔɔn pe. Pe laa mbra nyjɛ ni pe ŋga yire na fuŋgaami, mu yira nya mu tɛɛ mu sɛɛn gbeele peyɛ pan.”

13 A o Tafun Nyiɛkpɔɔ wre na yo ni pan mbo, “Leele pre, ni pe nya na ndikambla lɛ titi. 14 Ni ti mbe ni pe kla, mbe pe mɛɛ pe mɛɛ fun tra yiɛ na. A mbe mu pe waŋgra ŋga kii faŋga ni mu wɛ pe na, a ki leele we nɛɛ mbe wɛ pe na.”

15 A ndaa krɔ kna mna tii nyua kre na, na kanhun wa na nyini ki na. A na dnɛ kpaflɛ shiin nyjɛ na nyu nunu kee yire nyi yiree wa ni kɛɛ. 16 Ŋga ndaa yiɛ wa mu le to, ndaa nya na e sisam pe mu e Tafun Nyiɛkpɔɔ wre taan yɛŋgɛ, mu yira nya mu tɛɛ mu sɛɛn pe eyɛ pan, a kra nuu pɔ wru. E na tuwi mu e Tafun Nyiɛkpɔɔ kolo ŋga u e nyina kre wa nyaanyaa. 17 A ndaa dnɛ kpaflɛ shiin nyjɛ yiraa wa ni kɛɛ yire wa mna juari e yiɛ na wa.

18 Bawa ndaa ndru mna to mu yiɛ juule tra o Tafun Nyiɛkpɔɔ wre yiɛ ble fuloe shiin lafo na blee, a ni nsra yaka ka, a ni nsra nyumu gbɔ. Ŋgi na hin? E sisam nyjɛ e na pe, mnaa kefuɛn pini o Tafun wre yiɛ na, mna tia krɔ na u kun kre ndra na. 19 Fiɛrɛ na ni yii o Tafun Nyiɛkpɔɔ wre krɔ ŋga kra kun kpɔɔ kre na. Ŋgi na hin? Imi u krɔ na kun mu da kre, kra da mbe wra e kla. La, o Tafun wre na ndru mu loo ni pan. 20 O Tafun wre krɔ na kun na Aaron ni, a wra chaa mbe u kla, la, kre nyjila kre nu chɔɔ ndaa nyiɛtali mu wre ŋga na. 21 Ndaa kre sisam yira ŋga e na gbeele, nuu pɔ wre bali mna wa kanhun mu u sro, mna u tre mbruru na mimi yi, a ndaa ki koli mu le lafolo ŋga kraa fuu na yilii nyua kre nu kre nu.

22 A yire chɔɔn na tia krɔ na o Tafun Nyiɛkpɔɔ wre kun na, nyjila ŋga nu e naa wa Taberah, na Massah, na Kibroth-Hattaavah lawee yire nu kre. 23 A nyjila ŋga nu o Tafun Nyiɛkpɔɔ na yo e yili Kadesh Barnea na kre, wra yo mbo, “E sɛ tra ŋga ni e ŋga kre wru e tni.” La, e na yiri mu u nyu kee kre taan. E n nsraa kaan u na, ndee mu ndie tɛɛ u kee na. 24 Mu yire nyjila ŋga ni e chin, pan e yirii na o Tafun Nyiɛkpɔɔ wre taanla.

25 A ŋga e na sɛɛn pe a kra nuu pɔ wru kre, o Tafun Nyiɛkpɔɔ wre naa chaa mbe e kla, ki tia ndaa to mu yiɛ juule tra o Tafun Nyiɛkpɔɔ wre yiɛ ble fuloe shiin lafo na blee. Ŋgi na hin? Na u yo na we e kla. 26 A ndaa nyiɛtali mna o Tafun Nyiɛkpɔɔ wre yeeri mna yo na, “O Tafun Nyiɛkpɔɔ Jaŋgafun, jande maa shia mu leele pre kla, ŋu titi leele lɛ, a mna mu jaŋga kpɔɔ kre tɛɛ mna pe shɔ, mu pe wɔ mu yili Egypt tra nu. 27 Mu sumifɛɛnlɛ Abraham, na Isaac, na Jacob sɔɔnri, mu yiɛ wɔ leele mblɛ ndikana, na pe sisam, na pe punɔɔ kee nyjɛ pe pini yire na. 28 Na kre ma, waŋgra ŋga leele mblɛ nu mu sɛ o wɔ mu yili kre we yo na, ‘Ŋga pe Tafun Nyiɛkpɔɔ wre nsra ja mbe sɛ na pe ni tra ŋga kee wra yo pe pan kre nu kre ndra na, a ŋga wra pe pra kre ndra na wra yila mna pe wɔ mbe paan pe gbo tablɔ tra ŋga nu.’ 29 La, ŋu titi leele lɛ mblɛ mu yire mu jaŋga kpɔɔ kre na mu wo mu yili Egypt tra nu lɛ.”