Yaa Shia O Tafun Nyiɛkpɔɔ Fɛɛ
8
E dɔɔta na ee li mbra nyjɛ ni e kaan aŋga ble ŋga nu ŋga kro na, mbe ki ti e ŋmaa ta, mbe nɛɛ, mbe le tra ŋga o Tafun Nyiɛkpɔɔ na daŋga tɛɛ mna nyu yo e tolɛɛlɛ pan kre nu. 2 E sɔɔnri imi na o Tafun Nyiɛkpɔɔ wre na yiɛ klu na e ni tablɔ tra kre nu yɛlɛ fuloe shiin, mna tia e na nyjii u yiɛ, a wra e pe mu le, mna yire ki na mna e lɛɛ kee chin, na ee li u mbra na ree? 3 Wra tia klo na e ta, a wra e ŋga manna e na ka, sro nyjɛ yire titi, ndee e tolɛɛlɛ pre nsra chin. Wra yi tɛɛ mna e nyina na sro chiin na ma lewo fna mbe uyɛ wru mbe taa, la, kee ŋga kie yili o Tafun Nyiɛkpɔɔ nyuu mbe pan, kre na lewo fna mbe uyɛ wru mbe taa. 4 Yire yɛlɛ fuloe shiin nyjɛ nu kro, e yonyi nsra wla e na, e na nyaari, nde e jeelee nsra tin tin. 5 Kena e chin e lolonyi nu na imi na lewo u pɔ fraka kre kala na kre, pan e Tafun Nyiɛkpɔɔ wre e fraka na.6 Kena e li e Tafun Nyiɛkpɔɔ wre mbra na, e na tro kolo ŋga u e nyina na, e u fiɛ. 7 Ŋgi na hin? E Tafun Nyiɛkpɔɔ wre tra taan nu u shie na e ni, tra ŋga nu lafoelee, na taplɛ nyi, a bloe wa yi nu na fuu na tro yi nyuɛ na yi landɛɛ nu kro. 8 Tra ŋga nu yua nyininyini nyi, na tre sɛnyi, na fig sɛnyi, na tiŋge sɛŋgɛ ŋga pe yeeri pomegranate, na olive simi, na srɛ nyi, 9 tra ŋga nu sro kee wa sheli, a yaka wa e shian wa. Tra kre dnɛ kuraa tɔɔnrɔɔ wa yi nu, a ee jaa na yaawa tuulo ki nyambie yire nu. 10 Na e waa sro ta mu li mu yɔɔ, e e Tafun Nyiɛkpɔɔ wre ŋga mɛɛ tra taan ŋga u e ŋga kre na.
Moses Na Yo Leele Pre Waa//Shia Nyiɛkpɔɔ Fɛɛ
11 E dɔɔ ta mbe yaashia e Tafun Nyiɛkpɔɔ wre fɛɛ, mbe e le na ee li u mbra nyjɛ ni e kaan aŋga ble ŋga nu nyjɛ na. 12 Na e waa li mu yɔɔ, maa nyinyi chichiele sin mu tni, 13 a e nui, na e mbaala waa nɛɛ, a e swafiŋge, na e swanyiɛ waa nɛɛ, a yirɛ nyjɛ yii wa e pan waa nɛɛ tataara, 14 e le na yaa eyɛ kpɔɔ mbe e Tafun Nyiɛkpɔɔ wre fɛɛ, wre wra e wɔ mu yili Egypt tra nu, mna pra e pe tinlɛ kre. 15 Wre wra yiɛklu na e ni tablɔ tra vankam fiɛrɛ wo ŋga nu naala, na wɔɔlɔ sisaala na nyi kre nu. Kre tra yua wo ŋga nu nyumu nsraa wa kre nu, wra tia nyumu na yili dnɛ kpɔɔ shelee ka nu, a e na ta mu gbɔ. 16 Tablɔ tra kre nu wa wra e ŋga sro ŋga praa yeeri manna kre a e na li. E tolɛɛlɛ pre kuraa nsra yi chin. Wra tia e na tro kanyana nu, a wra e pe mu le, imi kie pe mbe kee kro kɔɔ nyu mbe e ŋga. 17 Kena yaashia jawa na yire titi jaŋga, na e faŋga, ki tia e eyɛ ta. 18 La, e e Tafun Nyiɛkpɔɔ wre sɔɔnri, ŋgi na hin? Wre u tia e kɛ nyu, mu tia u nyu nunu ŋga wra daŋga tɛɛ mna yo e tolɛɛlɛ pan kre pe yɛŋgɛ, imi na ki nyi aŋga ŋga. 19 La, na e waa e Tafun Nyiɛkpɔɔ wre fɛɛ, maa sɛ sɛɛnlɛ sumi, maa kosie kan yi yiɛ kre, kena aŋga mbe yo mbe e loo na ee kla yɛŋgɛ. 20 Imi na o Tafun Nyiɛkpɔɔ waŋgrɛ yire kla e yiɛ kre, na e nsraa ndie tɛɛ u pan, pan we e kla na.