Nadab Na Abihu Sisam
10
Aaron bibilɛ Nadab, na Abihu na sɛ pe kanhun wɔ yirɛ wru, mna sɛ naŋgua wɔ na yi ni, mna tuwe ndiom tɛɛn sro mna o Tafun Nyiɛkpɔɔ ŋga. La, kre kanhun kre ni ma ki fna pra kre sra kre wɔ, ŋgi na hin? O Tafun Nyiɛkpɔɔ nsra yo pe pan ma. 2 Titɛɛ kre nu to, a o Tafun Nyiɛkpɔɔ na tia kanhun na pan mna pe sro mu gbo u yiɛ na wa. 3 A Moses na yo Aaron pan mbo,“Kre kee ŋga o Tafun Nyiɛkpɔɔ
naa yuu kre mbo,
‘Leele mblɛ pie da ni na kpan,
mbe pe nyina na ni pe cheche,
a mbe ti mbe pe chin
na mi ki fna pe ŋga buuro.’”
A Aaron na pieri gbrumm mu na le.
4 A Moses na Aaron nalɔ ŋmba praa yeeri Uzziel bibilɛ, Mishael, na Elzaphan pre yeeri mbo, “E pan e e wolo mblɛ pe ku mu sni ŋga tio e flo Yoŋgo Nyuŋgo kre yiɛ, e sɛ na pe ni mbookrɔ.” 5 A pra pan mna gboolo pre yii pe sɔfum dodonyi na, mna pe fulo mna yili na pe ni mbookrɔ, imi na Moses na yo pe pan kre.
6 A Moses na yo Aaron, na u bibilɛ Eleazar na Ithamar pan mbo, “Yaa shia e ndrɛ ti mbe yaa yi saanri, ndee mbe e yirɛ tini mbe wla eyɛ na, mbe ki nyina na kumu e pini. Na kre ma, ee ku, a o Tafun wre krɔ we kun na leele pre kro ni. La, Israel leele hamblɛ pre we jaa leele mblɛ o Tafun Nyiɛkpɔɔ gbo kanhun ni pre kumu pe. 7 Yaa shia yili Yoŋgo Nyuŋgo kre jlonwee wa, na kre ma ee ku, ŋgi na hin? O Tafun Nyiɛkpɔɔ e le sɔfue.” Ki tia pra li Moses nyu kee kre na.
Srawɔfɛɛnlɛ Mbra
8 A o Tafun Nyiɛkpɔɔ na yo Aaron pan mbo, 9 “Ŋu na mu bibilɛ pre wa waa shia simi ka na ki nyini gbɔ mbe le Yoŋgo Nyuŋgo wa, na kre ma ee ku. Kre mbra ŋga ni leni mu nɔɔ leele mblɛ pie kɔɔ yiri pre pan. 10 Ki fna mbe e yira ŋga ki pe cheche, na ŋga ki n pe cheche lalaa chin, mbe ŋga ki n pe nɛɛrɛ yira, na ŋga yi nɛɛrɛ yira lalaa chin. 11 Ki fna mu Israel leele pre kro nyina mbra nyjɛ ni yire Moses na mu e ŋga yire kro.”
12 A Moses na yo Aaron na u bibilɛ shiin hamblɛ pre, Eleazar, na Ithamar pan mbo, “E mimi ŋga ni pe shɔlɔ sra wɔ mu o Tafun Nyiɛkpɔɔ ŋga kre kɔɔn kre wru e sɛ paanu ŋga nu yiisi n wa pe, e pan e yi ka sragbunu kre jaara. Ŋgi na hin? Kre sra kre pe cheche titi. 13 Na e paanu yire pe, e pan e yi ka cheche ndoo wa, ŋgi na hin? Shɔlɔ sra ŋga pe wɔ sragbunu na mu o Tafun Nyiɛkpɔɔ ŋga kre, ki ŋga ŋu na mu bibilɛ pre we ta yi. Pan ni ki yo mu tɛɛ. 14 La, ŋu na mu bibilɛ, na mu bichiɛlɛ pre kro we jaa yurɔ nyinimi ŋga pe viŋge kre, na yurɔ wre jekpɔlɔ ŋga pe wɔ mu o Tafun Nyiɛkpɔɔ ŋga kre ka. Ki fna e yi ka cheche ndoo wa. Na Israel leele pre wejinyiŋge sra wɔ kpan, kre sra yirɛ nyjɛ pe fna mbra ŋu na mu biile pre kaan. 15 Yurɔ wre jekpɔlɔ, na u nyinimi ŋga pe wɔ mu yi viŋge nyjila ŋga ni pe paan mbe yurɔ wre nyina yire sro mbe o Tafun Nyiɛkpɔɔ ŋga kre, we pe ŋu na mu biile pre wee nyjila kro nu, imi na o Tafun Nyiɛkpɔɔ na ki yo kre.”
16 Ŋga Moses na pe wie sugbɔ ŋmba ni pra sisam sra wɔ wre, a pra yo na pe u sro kre, Moses krɔ na kun na Eleazar, na Ithamar, Aaron bibilɛ hamblɛ pre ni, a wra kna mu pe wie mbo, 17 “Mni a e n sisam sra wɔ kaara kre ka lawee ŋga ki pe cheche kre nu hin? Sra yira kre pe cheche titi, ŋga o Tafun Nyiɛkpɔɔ wre le mu e ŋga, mbe e na ki pini mbra leele pre sisam laari pe na Nyiɛkpɔɔ yiɛ. 18 Ŋga e n pan na nyimi yire ni Yoŋgo Nyuŋgo wa kre, ki fna e na kaara kre ka lawee ŋga ki pe cheche kre nu, imi na ndaa ki yo e pan kre.”
19 A Aaron na kna mu yo Moses pan mbo, “Na ndaa sra wɔ yurɔ wre kaara ka le nyuu aŋga, o Tafun Nyiɛkpɔɔ wre wra ni ti ŋgaa? Aŋga pe pan mu leele pre sisam sra, na yurɔ sroo sra wɔ mu o Tafun Nyiɛkpɔɔ wre ŋga, a nde kekpɔɔ ŋga sembremu je mu ni da.” 20 Ŋga Moses na kre kee ŋga loo kre, u gbun na nyjii.