Aaron Sra Ŋga Wra Wɔ Jle
9
Ŋga srawɔfun lee paala ble kɔɔnashin yire nyu na to kre, ki ble kɔɔnatarɛ wo kre na, a Moses na Aaron na u bibilɛ pre yeeri, pre na Israel leele pre loplombo pre ni kro. 2 Mna yo Aaron pan mbo, “Nablɛm pɔlɔ, na mbaplɔ mblɛ pe n na fumnɔ cha mu sra wɔ na pe ni mu o Tafun Nyiɛkpɔɔ wre ŋga. Nablɛm wre tɛɛ mu sisam sra wɔ, mu mbaplɔ wre tɛɛ mu yurɔ sroo sra wɔ. 3 Mbe mu yo Israel leele pre pan na, pe kaplɔ cha mbe sisam sra wɔ. Mbe pe nuu pɔ ŋmba u li yɛlɛ, na mbɔɔ pɔ ŋmba u li yɛlɛ, a pe n na fumnɔ cha mbe yurɔ sroo sra wɔ. 4 Mbe pe nablɛm, na mbaplɔ cha mbe tɛɛ mbe wejinyiŋge sra wɔ mbe o Tafun Nyiɛkpɔɔ ŋga, kre na shɔlɔ sra ŋga nu pe olive simi chaa ni. Ŋgi na hin? O Tafun Nyiɛkpɔɔ wre we uyɛ wɔ mbe pe nyina ŋga.”5 Yirɛ nyjɛ ni Moses na yo pe pan yire kro, pra pan ni yi ni Yoŋgo Nyuŋgo kre jlonwee wa, a leele pre kro na pan mu yire o Tafun Nyiɛkpɔɔ wre yiɛ. 6 A Moses na yo pe pan mbo, “O Tafun Nyiɛkpɔɔ wre u yo e yire kee nyjɛ pe. Mbe ki ti u u yɛnyiŋge wɔ mbe e nyina.”
7 A Moses na yo Aaron pan mbo, “Sɛ sragbunu kre na mu sɛ sisam sra, na yurɛ sroo sra wɔ mbe ki ŋu na Israel leele pre sisam laa e na. Kre sra ŋga wɔ mbe ki ti leele pre sisam laa pe na imi na o Tafun Nyiɛkpɔɔ na ki yo kre.”
8 A Aaron na sɛ sragbunu kre na, mna sɛ nablɛm pɔlɔ ŋmba ni we tɛɛ mbe wre titi sisam sra wɔ wre yulɔ kun wa. 9 A u bibilɛ pre na pan na nuu wre nyimi yire ni mna u ŋga, a wra u kambɛlɛ ni yi nu, mna yi tɛɛ mna sragbunu kre jeŋgle nyjɛ yira pe na nyamblɛ yi yire mana, mna nyimi yire hɛnyi kna mna wo sragbunu kre jaara. 10 A wra yurɔ wre nyina, na u sɛlɛhulo, na u ndɛlɛ kokoo ŋga ki tna titi yire sro sragbunu kre na imi na o Tafun Nyiɛkpɔɔ na ki yo Moses pan kre. 11 La, wra sɛ yurɔ wre kaara kre, na u hlɛ kre sro pe tnihaa kre mbookrɔ.
12 Ŋga wra kɔ kre, a wra yurɔ ŋmba we tɛɛ mbe yurɛ sroo sra kre wɔ wre yulɔ kun. A u bibilɛ pre na pan na yurɔ wre nyimi yire ni mna u ŋga, a wra yi nyaara sragbunu kre mbɛɛlɛ yire kro na. 13 U biile pre naa yurɔ sroo sra yurɔ wre kaara yire woni na pe lɛ kaan nununu, yire na u ndra kre ni, a wra yi sro sragbunu kre na, 14 mna yurɔ wre lam yirɛ, na u jeelee yire je mna ya, mna yi kro sro sragbunu kre na.
15 Ŋga Aaron na kɔ kre, a wra leele pre ndra sra kre wɔ. Wra sugbɔ ŋmba ni we tɛɛ mbe leele pre sisam sra wɔ wre yii, mna u yulɔ kun mu tɛɛ mna sra kre wɔ, imi na wra wre titi wo wre pe kre. 16 A wra pan na yurɔ wre ni mu yurɔ sroo sra kre wɔ imi na ki fna mbe u pe kre. 17 Ŋga wra kre kɔ kre, a wra shɔlɔ sra kre wɔ, mna mimi kre ka ko kɛ nyini mna sɛ ki sro sragbunu kre na, mu sra wɔ mu ya bnimi yurɔ sroo sra kre na.
18 Wra nablɛm, na mbaplɔ wre yulɔ kun mna leele pre wejinyiŋge sra kre wɔ. A u bibilɛ pre na pan na pe nyimi yire ni mna u ŋga, a wra yi nyaara mna wo sragbunu kre mbɛɛlɛ yire kro na. 19 A wra nablɛm wre, na mbaplɔ wre nyina, na pe nakɛɛn, na nyina nyjɛ yi pe lam yirɛ tɔ yire, na pe sɛlɛhulo yire, na ndɛlɛ yire kokoe nyjɛ yi tna titi yire wɔ, 20 a pra yi ya yurɛ pre nyinimi yire na, a Aaron na nyina yire sro sra gbunu kre na. 21 Mna pe nyinimi yire, na pe jekpɔɛ yire viŋge o Tafun Nyiɛkpɔɔ wre yiɛ mna yirɛ viŋge sra kre wɔ imi na Moses na ki yo kre.
22 Ŋga Aaron na sra yire kro wɔ mu kɔ kre, a wra kɛ yire mna nyini leele pre na mna pe dwan, mna tii sragbunu kre na.
23 A Moses na Aaron na le Yoŋgo Nyuŋgo kre nu. Ŋga pra yili fimi na kre, a pra leele pre dwan, a leele pre na o Tafun Nyiɛkpɔɔ yɛnyiŋge kre nya na ki chiɛnri plipli. 24 Titɛɛ kre nu to, a o Tafun Nyiɛkpɔɔ na tia kanhun na pan mu yurɔ sroo sra yurɛ pre, na pe nyina yire sro sragbunu kre na. Ŋga leele pre kro na ki nya kre, a pe kro na yɛshɔɔrɔ gblee le, mna yiɛ juule juule tra.