Aaron Na U Bibilɛ Pre Sɔfum Lee
8
O Tafun Nyiɛkpɔɔ na yo Moses pan mbo, 2 “Aaron na u bibilɛ pre wru mu sɛ yire ni yiɛ Yoŋgo Nyuŋgo kre jlonwee nyu na, mbe sɛ srawɔfɛɛnlɛ yirɛ nyjɛ pe leni yire wru mu pan, na simi fawo kre, na nablɛm pɔlɔ ŋmba ni pe sisam sra woni wre, na mbapilɛ shiin pre, mbe mu kakɛɛ ŋga nu pe paanu nyjɛ nu yiisi n wa leni kre wru mbe ya. 3 Kena mu leele pre kro yeeri mbe pe pan mbe fni Yoŋgo Nyuŋgo kre jlonwee nyu na wa.” 4 Moses na kee ŋga o Tafun Nyiɛkpɔɔ na yo u pe kre pe. A leele pre kro na pan mu fni wa, 5 a Moses na yo pe pan mbo, “Kee ŋga ni paan mbe pe fuŋgaami ŋga, o Tafun Nyiɛkpɔɔ u yo na ni ki pe.” 6 A Moses na Aaron na u bibilɛ pre yeeri, a pra pan mna yire yiɛ, a wra pe weli. 7 Mna Aaron le srawɔfun dodoŋgi lam wo ŋga na kɛnyi nyi, mna greree tɛɛ mu ki grere sɛlɛ. Mna u le dodoŋgi titnɔŋɔ ŋga na kɛnyi nsraa wa kre, kre na dodoŋgi kpro kre, mna greree ŋga pra tin chichie kre wru mu u grere na, a kra tia dodoŋgi kpro kre na mbra u na. 8 Mna chin mu u le dodoŋgi gbun wo kre, mna yirɛ nyjɛ praa yeeri Urim na Thummim yire le le dodoŋgi gbun wo kre bɔtɔe nu.a 9 Mna Aaron ndra pɔ nam kre ni, mna swanyiɛ ŋga pra gbun pɛsii chichie kre mbra ki yiɛ, kre ki nyina na o Tafun Nyiɛkpɔɔ wo wi, imi na o Tafun Nyiɛkpɔɔ na ki yo Moses pan kre.10 A Moses na simi fawo kre wru mna ki kna mna wo Yoŋgo Nyuŋgo kre, na yirɛ nyjɛ yiraa wa ki nu yire kro na, mna yi pe cheche. 11 Wra simi kre ka nyaara gbee kɔɔnashin mna wo sragbunu kre, na ki yirɛ bɛɛlɛ, na ki swafre kotie yire, na ki taayirɛ yire kro na, mna yi pe cheche. 12 Mna simi kre ka kna mu wo Aaron ndra na, mna u pe srawɔfun, a kra tia wra pe cheche. 13 Ŋga wra kɔ kre, a wra tia Aaron bibilɛ pre na pan mna yire yiɛ, a wra pe le le dodonyi titnɔnyi nyjɛ na kɛnyi nyi yire, mna pe grere grere, mna pe pɔ pɔ namu yire pe ndrɛ na, imi na O Tafun Nyiɛkpɔɔ na yo Moses pan kre.
14 A Moses na pan na nabie ni mbe sisam sra wɔ, mna tia Aaron na u bibilɛ pre na kɛnyi taa taa u ndra na. 15 A Moses na nablɛm wre gbo, mna nyimi yire yɛ kna, mna kambɛlɛ ni yi nu mna yi tɛɛ mu sragbunu kre jeŋgle nyjɛ yira pe na nyamblɛ yi yire mana, mna sragbunu kre pe cheche, mna nyimi yire hɛnyi kna mu wo sragbunu kre jaara, mna nɛɛrɛ laa ki na, mu o Tafun Nyiɛkpɔɔ ŋga. 16 A Moses na sra wɔ yurɔ wre nyina nyjɛ yira u lɛɛ yirɛ tɔ yire kro laala, mu ya u ndɛlɛ kokoo ŋga ki tna titi kre, na u sɛlɛhulo yire, na nyina nyjɛ yiraa wa yi na kro, mna yi sro sragbunu kre na. 17 A wra nablɛm wre kaara haŋa kre, na u hlɛ, na u lɛɛ yire wru mna yili na yi ni pe tnihaa wa, mna sɛ yi sro, imi na o Tafun Nyiɛkpɔɔ na yo kre.
18 Ŋga wra kɔ kre, a wra pan na mbaplɔ ŋmba ni pie yurɛ sroo sra kre wɔ wre ni, a Aaron na u bibilɛ pre na kɛnyi taa taa u ndra na. 19 A Moses na mbaplɔ wre yulɔ kun, mna u nyimi yire nyaara mu wo sragbunu kre kokoe jijirɛ yire na. 20 A wra mbaplɔ wre kaara kre knumu bujibuji, mna ya u ndra, na u nyina yire na, 21 mna tia pra u lɛɛ yirɛ yire je, na u jeelee yire ni. A wra mbaplɔ wre sro poŋgo sragbunu kre na mna yurɛ sroo sra kre wɔ imi na Nyiɛkpɔɔ na u nyina kre. Kre sra kre ndiom tna o Tafun Nyiɛkpɔɔ pan.
22 A Moses na pan na mbaplɔ shiinwo ŋmba ni pe srawɔfɛɛnlɛ leni wre ni, a Aaron na u bibilɛ pre na kɛnyi taa taa u ndra na. 23 A Moses na mbapɔlɔ wre yulɔ kun, mna u nyimi yire yɛ tɛɛ mna Aaron ndie kalie wo nyu mana, kre na u kalie kambɛlogboŋgo, na u kalie jekambɛlogboŋgo. 24 A Moses na tia Aaron bibilɛ pre na pan yiɛ, a wra nyimi yire yɛ tɛɛ mna pe kalie ndiile nyu mana mana, yire na pe kalie kambɛlogbonyi, na pe kalie jekambɛlogbonyi ni. A Moses na nyimi yire yɛ nyaara mna wo sragbunu kre kokoe jijirɛ yire kro na. 25 A wra yurɔ wre nyina, na u nakaan, na nyina nyjɛ yii wa yurɔ wre lɛɛ na yire, na ndɛlɛ kokoo ŋga ki tna titi kre, na sɛlɛhulo, na yi nyina nyjɛ yi yi tɔ kre, na yurɔ wre kalie jekpɔlɔ wru, 26 mna paanu nyini taarɛ nyjɛ nu yiisi nsraa wa, a yiraa wa kakɛɛ nu o Tafun Nyiɛkpɔɔ yiɛ wa kre nununu wɔ kakɛɛ kre nu. Paanu nyini shiin yire rɛ, pra olive simi chaa yire nu mna chin mu yi fɔ, a taarɛ wo kre, pan pra yire pe pɛtipɛti mna olive simi tɛɛ mu yi fa fa, a wra yi wru mna ya yurɔ wre nyina, na u jekpɔlɔ kalie wo kre na, 27 mna yi kro le Aaron na u bibilɛ pre kɛɛ, mbe pe yi viŋge o Tafun Nyiɛkpɔɔ yiɛ, mbe yirɛ viŋgee sra kre wɔ. 28 Ŋga pra kɔ kre, a Moses na yi shɔ pe kɛɛ, mna yi taa yurɛ sroo sra yirɛ yire na sragbunu kre na, mna yi sro mna sɔfum lee sra wɔ. Kre sra kre ndiom tna o Tafun Nyiɛkpɔɔ pan. 29 A Moses na yurɔ wre nyinimi wru mna ki viŋge o Tafun Nyiɛkpɔɔ yiɛ, mna yirɛ viŋgee sra kre wɔ, kre kaara kre na yi u wo. Moses na yirɛ kro pe imi na o Tafun Nyiɛkpɔɔ na yo kre.
30 A Moses na simi ŋga ni pe srawɔfun leni, na nyimi nyjɛ yiraa wa sragbunu kre na yire yɛ kna, mna yi nyaara mu wo Aaron na u bibilɛ pre yirɛ nyjɛ pe leni yire na. Mna pre na pe dodonyi yire pe cheche mna o Tafun Nyiɛkpɔɔ ŋga.
31 A Moses na yo Aaron na u bibilɛ pre pan mbo, “E Kaara yire sɔɔ Yoŋgo Nyuŋgo kre jlonwee nyu na wa, e yire na paanu yire ka wa, yire na paanu nyjɛ yii wa kakɛɛ nyjɛ nu pe sɔfum lem sra woni kre, imi na o Tafun Nyiɛkpɔɔ na ki yo kre. 32 E kaara, na paanu yire hɛnyi nyjɛ yie kro yire sro. 33 Yaa shia yili Yoŋgo Nyuŋgo kre jlonwee nyu na, fɔna ble kɔɔnashin tro, mbe sɛ su na ble nyjɛ nu e srawɔfɛɛnlɛ leni paala kolo na yire nyu we to. Ŋgi na hin? Srawɔfɛɛnlɛ lee ble yire nyu we to ble kɔɔnashin nyu na. 34 Kre kee ŋga o pe aŋga ŋga, o Tafun Nyiɛkpɔɔ wre u yo o ki pe, mbe ki ti mbe e sisam nyjɛ e pe yire laa e na. 35 Ki fna e tni Yoŋgo Nyuŋgo kre jlonwee nyu na lafo, na blee ma ble kɔɔnashin, mbra kee ŋga o Tafun Nyiɛkpɔɔ yo e pe kre pini, na kre ma ee ku. Kre kee ŋga o Tafun Nyiɛkpɔɔ yo ni pan.” 36 A Aaron na u bibilɛ pre na kee nyjɛ o Tafun Nyiɛkpɔɔ na yo Moses pan yire kro pe.