Pimi Lie Sra Wɔɔ
7
Kolo ŋga na pie tro mbra pimi lie sra ŋga ki pe cheche titi kre woni yi kre. 2 Yurɔ ŋmba ni pie sra kre wɔ wre fna pe u gbo sragbunu kre nyjeeri haa, mna pe yurɛ sroo sra yurɛ pre kuu kre. Mbe pe u nyimi yire nyaara sragbunu kre kokoe yire kro na. 3 Mbe pe pan na yurɔ wre nyina, na u nakaan nyina wo kre, na nyina nyjɛ yii wa mu u lam yirɛ tɔ kre, 4 na u sɛlɛhulo, na nyina nyjɛ yii wa yi na yire kro, na ndɛlɛ kokoo ŋga ki tna titi kre ni. 5 Kena srawɔfun wre yi sro sragbunu kre na mbe o Tafun Nyiɛkpɔɔ ŋga. Kre yi pimi lie sra. 6 Blɔ ŋmba uu wa srawɔfɛɛnlɛ sele nu kro we jaa kaara kre ka ka, la, cheche ndoo wa ki fna u ki ka, ŋgi na hin? Yurɔ wre kaara kre pe cheche titi.7 Pan chɔɔ ki fna mbe pe sisam sra, na pimi sra kre pe. Srawɔfun ŋmba we sra kre wɔ wre wo yi kaara kre. 8 Yurɔ ŋmba pie sro mbe sra wɔ kpan, u hlɛ kre, srawɔfun ŋmba u sra kre wɔ wre wo yi. 9 Na pe shɔlɔ sra wɔ mu paanu yire fɔ fnunu nu, ndee na kla pe yi kla taha kpɛfrɛɛ nu, ndee na kla pe yi kla simi ni naa, srawɔfun ŋmba u sra kre wɔ wre wee yi. 10 Shɔlɔ sra ŋga pie wɔ kpan, na pe olive simi le ki nu o! Ndee na pe n simi le ki nu o! Yi kro pe Aaron bibilɛ pre wee mbe pe yi yɔ mbe yila.
Wejinyiŋge Sra Wɔɔ
11 Na ndro pan wejinyiŋge sra wɔhaa mbe o Tafun Nyiɛkpɔɔ ŋga, kolo ŋga na pie yire mbe sra kre wɔ yi kre. 12 Na ndro wrefun chaa mbe sra wɔ mbe o Tafun Nyiɛkpɔɔ ŋga mboo, ufun wre u pan na sra yurɔ ŋmba pie gbo wre ni, mbe paanu mimi ŋga nu yiisi n wa, a pe olive simi chaa ki nu tɛɛ mbe paanu fɔ, mbe mimi ŋga nu yiisi n wa tɛɛ mbe yirɛ pe na mahɛɛn yi, kena pe olive simi tɛɛ mbe yi fa, kena pe olive simi chaa mimi kre ka nu na, mbe ki bri chiriri, mbe ki tɛɛ mbe yirɛ pe na koose yi. 13 Wejinyiŋge mboo ŋgaa sra fna mbe ufun wre paanu nyjɛ nu pe yiisi le pe mbe ya jle wee yire na. 14 Pie sra wɔ yirɛ nyjɛ pe pe paanu mimi ni yire nununu wɔ mbe o Tafun Nyiɛkpɔɔ ŋga, a yi pe srawɔfun ŋmba we wejinyiŋge sra yurɔ wre nyimi nyaara sragbunu kre na kre wee. 15 Wejinyiŋge na mboo ŋgaa sra kaara yire fna mbe pe yi ka ki ble kre lam pe sra kre wɔ kre. Kaara yire yɛ n fna mbe nyiŋge se yi na.
16 Na danyi sra, ndee wre titi chaara sra wa paan mbe wɔ naa, sra kaara kre fna mbe pe ki ka ki ble kre lam, la, na ki ka waa kro, pie jaa ki ka ble shiin wo kre nu. 17 Kre sra kre, na ki kaara kre ka waa kro mu da ble taarɛ ki fna mbe pe ki sro. 18 Na ndro waa wejinyiŋge sra kaara kre ka ka ki ble taarɛ wo na kre, Nyiɛkpɔɔ wa sra wɔɔ kre shɔ, a ki wɔfun wre wa tnu ka ta, ŋgi na hin? Sra kre n pe cheche, a ŋmba we kaara kre ka kpan we ki mapini tio.
19 Na yira ŋga ki n pe cheche paala kolo na gbun kaara na kpan, ki n fna mbe pe ki ka, pe ki sro. La, kaara ŋga ni pe sra wɔ kpan, ndro ŋmba u pe cheche paala kolo na kre we jaa kaara ŋga ki pe cheche kre ka. 20 La, na lewo n pe cheche, a waa wejinyiŋge sra ŋga pe wɔ mu o Tafun Nyiɛkpɔɔ ŋga kre kaara ka le nyuu, ndro wrefun wa jaa pe Nyiɛkpɔɔ leele pre wa na. 21 Na ndro gbun yira ŋga ki n pe cheche na, na lewo yira ŋga ki n pe cheche na yi o! Ndee na yurɔ ŋmba u n pe cheche na wi o! Ndee na afuŋgo yira na yi o! Na ufun wre waa wejinyiŋge sra kaara kre ka ka, wa jaa pe Nyiɛkpɔɔ leele pre wa na.”
22 O Tafun Nyiɛkpɔɔ na yo Moses pan mbo, 23 “Yo Israel leele pre pan na, Wa waa shia nuu, ndee mbɔɔ, ndee sugbɔ nyina ka. 24 Na yurɔ ku uyɛ deŋge, ndee na yurɔ sisaa wa u ŋmbrɔ gbo mu wa, yaa shia u nyina ka, la, ee jaa nyina yire tɛɛ mbe kala fɔŋgɔ ka pe. 25 Ndro ŋmba we yurɔ ŋmba ni pie jaa tɛɛ mbe yurɛ sroo sra wɔ mbe o Tafun Nyiɛkpɔɔ ŋga nyina ka kpan, ufun wre wa jaa chaa Nyiɛkpɔɔ leele pre nu na. 26 Lawee ŋga nu Israel ndro nyi mu tni kpan, ki n fna u hanyini nyimi, ndee yurɔ nyimi ka. 27 Na ndro waa nyimi ka, ufun wre wa jaa chaa Nyiɛkpɔɔ leele pre nu na.”
28 O Tafun Nyiɛkpɔɔ na yo Moses pan mbo, 29 “Yo Israel leele pre pan na, na ndro pan mbe wejinyiŋge sra wɔ kre, ufun wre u pan na sra kaara kre kan ni mbe o Tafun Nyiɛkpɔɔ wre ŋga. 30 Ndro wre titi u yi yii kɛɛ, mbe pan na yi ni. Ki fna u pan na yurɔ wre nyina, na u nyinimi ni, mbe sɛ yi viŋge o Tafun Nyiɛkpɔɔ yiɛ. Kre yi yira viŋgee sra wɔɔ. 31 Mbe srawɔfun wre nyina yire sro sragbunu kre na, la, nyinimi kre we pe srawɔfɛɛnlɛ pre wo. 32 Mbe sra wɔfun wre yurɔ wre jekpɔlɔ kalie wo wɔ mbe srawɔfun wre ŋga. 33 Aaron bibilɛ srawɔfɛɛnlɛ pre ŋmba we yurɔ wre nyimi, na nyina yire shɔ mbe sra kre wɔ wre wo yi jekpɔlɔ kre. 34 Wejinyiŋge sra wɔ yurɔ wre nyinimi ŋga pe viŋge kre, na u jekpɔlɔ kalie wo kre, ni yi shɔ Israel leele pre pan mu Aaron na u bibilɛ srawɔfɛɛnlɛ pre ŋga, yire yi nyjɛ pie na taa.” 35 Yire sra kaara nyjɛ pe woni na o Tafun Nyiɛkpɔɔ kaan kre, ki ble ŋga pra Aaron na u bibilɛ pre le srawɔfɛɛnlɛ kre, yire kaara yire Nyiɛkpɔɔ na pe ŋga. 36 Ŋga ble pra pe le srawɔfɛɛnlɛ kre, o Tafun Nyiɛkpɔɔ na yo Israel leele pre pan na praa pe kaan yire kaara yire, hali mbe sɛ su pe nɔɔ leele kro na.
37 Kolo ŋga na pie na tro yurɛ sroo sra, na shɔlɔ sra, na sisam pee sra, na pimi lie sra, na sɔfum lee sra, na wejinyiŋge sra yurɛ pre ni yi kre. 38 Pan o Tafun Nyiɛkpɔɔ na yi kee yo Moses pan Sinai Nyua kre na tablɔ tra kre nu, ŋga ble wra yo Israel leele pre pan na pe pan mbe sra wɔ mbe wre pe Tafun Nyiɛkpɔɔ wre ŋga kre.