Sra Wɔɔ
6
O Tafun Nyiɛkpɔɔ na yo Moses pan mbo, 2 “Na wa yira tle u chamna pan, mu kɔ na ki chaa, a u fun wre je na wa yira fun wre ŋga ki yi, ndee na wa u ŋmbrɔ dnumu, ndee na wa u ŋmbrɔ ju kachindɛ kolo na, 3 ndee na wa yira wlo, a pe u wie ki yi, a u n ki kɛ shɔ na u yaka wlo, hali maa da na yaka n wa u pan, kena u sisam nyjɛ leele pini yire ka pe mu o Tafun Nyiɛkpɔɔ taan. 4 Na ndro waa yire sisam nyjɛ ka pimi li, kena yira ŋga u ju, ndee ŋga u dnumu, ndee ŋga u tro kolo fɔɔn na mu ta, ndee yira ŋga ki fun a pe ki nya u pan kre, 5 ndee yira ŋga na u danyi wɛɛ da kre, ki fna mbe pe yira kre ndrɔ damu le, mbe u ki tɔ, mbe ndru mbe ki yɔm kunɔ nunu tɔ mbe ya yirafun wre pan, ble ŋga na we pimi sra kre wɔ kre. 6 Na ki pan ma, ki fna mbe ndro wre pan na mbaplɔ ŋmba u yiɛ nyi, a u na fumnɔ ni mbe paan srawɔfun wre ŋga, mbe u tɛɛ mbe pimi sra wɔ mbe o Tafun Nyiɛkpɔɔ ŋga. 7 Kre kolo ŋga na srawɔfun wre we tro mbe sisam sra wɔ o Tafun Nyiɛkpɔɔ yiɛ, mbe ki ti ndro wre sisam tinkɛɛ ta.”Sra Wɔ Yurɔ Ŋmba Pe Sroi Poŋgo
8 O Tafun Nyiɛkpɔɔ na yo Moses pan mbo, 9 “Yo Aaron na u bibilɛ pre pan na imi pie na yirɛ sroo sra yire pini yi kre. Ki fna mbe pe yirɛ sroo sra yirɛ yire kro ti sragbunu kre na mbe nyiŋge yi se, a kanhun kre n fna mbe fii yi na. 10 Na nyiŋge se bnimi, mbe srawɔfun wre u dodoŋgi fiŋge kre le, mbe u kpla kpro fiŋge kre chan lam, mbe sɛ tɔɔnrɔ nyjɛ yii wa sragbunu kre na yire wɔ mbe wo sragbunu kre jaara. 11 Na u kɔ, mbe u yirɛ nyjɛ u le yire wɔ mbe tɛɛ, mbe fɔnyi wru mbe le, mbe tɔɔnrɔ yire wru mbe yili na yi ni pe tnihaa wa, mbe sɛ yi wo cheche lawee ŋga pe pe paala kolo na kre nu. 12 Sragbunu kanhun kre fna mbe kro mbra nyini, ki n fna mbe fii. Bnimi kpan, ki fna mbe srawɔfun wre kejenyi fɔnyi le kanhun kre nu, mbe yirɛ sroo sra yirɛ yire taa, mbe nyina nyjɛ ni pe wejinyiŋge sra wɔ yire ya mbe yi sro. 13 Kanhun kre fna mbe kro mbra nyini sragbunu kre na nyjila kro nu, ki n fna mbe pe ti ki fii.
Shɔlɔ Sra Wɔɔ
14 Kolo ŋga na pie na shɔlɔ sra woni yi kre. Na ndro pan shɔlɔ sra wɔhaa, Aaron bibilɛ pre pe yi shɔ mbe pan na yi ni o Tafun Nyiɛkpɔɔ yiɛ, sragbunu kre yɛsimi wa. 15 Kena srawɔfun wre paanu mimi kre, na olive simi chaara yire ko kɛnyini, mbe ya tuwe ndiom tɛɛn yire kro na, mbe yi sro sragbunu kre na. Ki nyina na kre sra kre kro, o Tafun Nyiɛkpɔɔ wre wo yi, a ki ndiom tna u pan. 16 Kena Aaron na u bibilɛ pre paanu mimi kre haŋa wru. La, ki n fna pe yiisi le ki nu, a na pe yi fɔ mu kɔ, Yoŋgo Nyuŋgo lawee vankam kre nu wa pe fna mbe sɛ yi ka. 17 Ki n fna mbe pe yiisi le paanu mimi haŋa kre nu mbe chiin yi fɔ. Sra wɔ yirɛ yire kuɛn nyjɛ srawɔfɛɛnlɛ pre we ta yi. Imi na sisam sra, na pimi lie sra yire nyi kre, pan nyjɛ nyji na, a yi pe cheche. 18 Aaron nɔɔ leele bibilɛ pre we jaa yi ka, yire sra yirɛ yire ni pe paan na o Tafun Nyiɛkpɔɔ kaan nyjila kro nu kre, yire yi pe wee, hali mu sɛ su u nɔɔ wolo kro na. Ŋmba we kɛ taa sra yirɛ yire na fna mbe pe cheche.”
19 O Tafun Nyiɛkpɔɔ na ndru mu yo Moses pan mbo, 20 “Ŋga ble pie Aaron na u bibilɛ pre wa pe srawɔfun kpan, sra yirɛ nyjɛ ni ki fna mbe u pan mbe o Tafun Nyiɛkpɔɔ ŋga yi kre. Paanu mimi ŋga snamu kie pe kra dnɛ nunu, mbe pe ki tɛɛ mbe shɔlɔ sra wɔ. Pie ki yɔɔ tɛɛ mbe sra wɔ bnimi, mbe ki yɔɔ haŋa kre tɛɛ mbe sra wɔ yilakɔŋgɔ. 21 Pie olive simi chaa mimi kre nu, mbe ki bri, mbe yi fɔ taha kpɛfrɛɛ ŋga lam ki juo chiɛri nu, na pe kɔ mbe pe yi pile bɛɛlɛbɛɛlɛ, mbe yi tɛɛ mbe shɔlɔ sra kre wɔ, kre sra kre ndiom tna o Tafun Nyiɛkpɔɔ pan. 22 Hali mbe sɛ su nyjila kro nu, Aaron nanae pre ŋmba we pan mbe pe Srawɔfun Lopom titi kpan, wre u fna mbra kre sra kre woni. Ki fna u sra kre sro peii mbe o Tafun Nyiɛkpɔɔ ŋga. 23 Shɔlɔ sra ŋga pie wɔ srawɔfɛɛnlɛ ndra sra kro, ki n fna mbe pe ka le nyuu, ki fna mbe pe ki sro kro.”
Sisam Sra Wɔɔ
24 O Tafun Nyiɛkpɔɔ na yo Moses pan mbo, 25 “Yo Aaron na u bibilɛ pre pan na, Kolo ŋga na pie tro mbra sisam sra woni yi kre. Yurɔ ŋmba ni pie tɛɛ mbe sisam sra wɔ wre fna mbe pe u gbo sragbunu kre nyjeeri haa, o Tafun Nyiɛkpɔɔ yiɛ wa, mna pe yurɛ sroo sra wolo pre kuu kre nu, kre sra kre pe cheche titi. 26 Srawɔfun ŋmba we sra kre wɔ wre we jaa kaara kre ka, la, ki fna u ki ka cheche lawee kre nu Yoŋgo Nyuŋgo kre lawee vankam kre nu. 27 Ndro, ndee yira ŋga kie gbun yurɔ wre kaara na kpan, we pe cheche. A na yurɔ wre nyimi waa wo wa dodoŋgi na, ki fna pe ki je cheche lawee wa. 28 A chɔ ŋga ni pie yurɔ wre sɔɔ kre fna mbe pe ki juari. La, na sɔɔ yira ŋga pe pe na tɔɔnrɔ ni pe tɛɛ mu kaara kre sɔɔ kre, ki fna mbe pe ki gboori chichie, mbe ki hlu na nyumu ni. 29 Blɔ ŋmba uu wa srawɔfɛɛnlɛ sele nu kpan, we jaa sra yurɔ wre kaara ka, kaara kre pe cheche titi. 30 La, na pe waa sɛ na sra yurɔ wre nyimi ni Yoŋgo Nyuŋgo wa, mbe pan mbe ki tɛɛ mbe sisam tinkɛɛ paala pe Cheche Ndoo wa kre, ki n fna mbe pe yurɔ wre kaara kre ka, la, ki fna mbe pe u sro.