2 A na lewo punu mu kɛ taa yira ŋga ki n pe cheche paala kolo na, na nyaalam yurɔ ŋmba u ku uyɛ wi, ndee na katoo yurɔ ŋmba u ku uyɛ wi, ndee na yurɛ mblɛ pe fulo gbun na pre wa gboo wi, kena ufun wre le nɛɛrɛ nu, a u pimi li.

3 Ndee, na ndro waa punu mu kɛ taa lewo yira ŋga ki n pe cheche na, lewo nɛɛrɛ yira ŋga nyini yi kpan, na waa kɔ mu chin na u ki pe kre, kena u pimi li.

4 Ndee, na ndro waa foolo mu da na we yaka pe, na chichie yi o, ndee na sisam yi o, na ki waa kɔ mu yili mu jawala nu, a maa kɔ mu ki sɔɔnri kre, kena mu pimi li.

5 Na lewo waa pimi li yire kee nyjɛ ka na, kena ki fna u nyu nyaa mbe u sisam yo. 6 Na ki pan ma ki fna u mbalo, ndee sikalo wɔ mbe sra wɔ mbe o Tafun Nyiɛkpɔɔ ŋga. Mbe srawɔfun wre yurɔ wre tɛɛ mbe u sisam sra wɔ.

7 Na ki pan na ndro wre wa jaa mbalo, ndee sikalo wre wɔ kre, kena ufun wre u katoo kotulo shiin, ndee nyaa kotulo shiin wɔ mbe paan o Tafun Nyiɛkpɔɔ ŋga mbe pe tɛɛ mbe u sisam tali. Pie nunu tɛɛ mbe sisam sra wɔ, mbe haŋu wre tɛɛ mbe yurɔ sroo sra wɔ. 8 Ki fna u pan na pe ni mbe srawɔfun wre ŋga, mbe u nunu tɛɛ mbe sisam sra wɔ. We u yulɔ ŋmaa mbe ka, la, wa u ndra tini mbe kɔ u na. 9 Mbe nyimi yire yɛ nyaara sragbunu kre kokoo nunu na. Mbe yi hɛnyi yuwi mbe wo sragbunu kre jaara. Kre sra ŋga yi sisam srawɔɔ. 10 Kena u hanyini shiinwo wre sro mbe sra wɔ, imi na mbra yire nyina kre. Kre kolo ŋga na srawɔfun wre we tro mbe sisam sra wɔ, mbe ki ti u sisam tinkɛɛ ta.

11 Na ki pan na ndro wre fun wa jaa kotulo shiin, ndee nyaalam kotulo shiin pre wɔ, kena u pan na paanu mimi ŋga snamu kie pe kradnɛ shiin ni, mbe ki tɛɛ mbe sisam sra wɔ. Waa shia olive simi, ndee tuwe ndiom taan ya ki na, ŋgi na hin? Sisam sra we wɔ na ki ni. 12 Mbe u pan na ki ni mbe srawɔfun wre ŋga. Mbe u kɛ nyini ko mbe ki sro sra gbunu kre na, mbe ki nyina na kre sra kre kro pe o Tafun Nyiɛkpɔɔ wo, a kre sra ŋga ki sisam laari lewo na. 13 Kre kolo ŋga na srawɔfun wre we tro mbe sra wɔ, mbe ki ti ndro wre sisam tinkɛɛ ta. Kena srawɔfun wre mimi kre kɔɔn wru, imi na u shɔlɔ sra wo kre pe kre.”

14 O Tafun Nyiɛkpɔɔ na yo Moses pan mbo, 15 “Na ndro nya na u o Tafun Nyiɛkpɔɔ dnumu kolo ka na, a tuwi ma u tuwi mu ki pe kre, kena ufun wre fna mbe mbaplɔ ŋmba u n na fumnɔ, a u yiɛ nyi wɔ, mbe o Tafun Nyiɛkpɔɔ ŋga, wre wi u pimi sra wɔ yurɔ. Yurɔ wre ndrɔ fna mbe da imi na pe swa kra suminyuŋgo kre ni. 16 A ki fna mbe u swa ŋga u Nyiɛkpɔɔ dnumu kre tɔ, mbe swa kre yɔ kunɔ mbe ki nunu wɔ mbe tɔ mbe ya swabie kre na, mbe srawɔfun wre ŋga ki yi. Kena srawɔfun wre mbaplɔ wre tɛɛ mbe sisam sra wɔ, mbe ki ti ndro wre sisam tinkɛɛ ta.

17 Na ndro wa punu o Tafun Nyiɛkpɔɔ mbra yire ka na, a tuwi ma u tuwi, kena u pimi li. 18 Ki fna mbe u pan na mbaplɔ ŋmba u yiɛ nyi, a u n na fumnɔ ni, mbe srawɔfun wre u tɛɛ mbe sisam ŋga u n tuwi mu pe kre sra wɔ, kena ufun wre sisam tinkɛɛ ta. 19 Kre yi pimi ŋga u li o Tafun Nyiɛkpɔɔ yiɛ kre sra.”