Sisam Ŋga Lewo N Tuwi Mu Pe Sra
4
O Tafun Nyiɛkpɔɔ na yo Moses pan mbo, 2 “Yo Israel leele pre pan na, ndro ŋmba we sisam pe mbe o Tafun Nyiɛkpɔɔ mbra yire ka taan, a tuwi ma u tuwi mu ki pe kre, ufun wre fna mbe yire sra nyjɛ wɔ. 3 Na Srawɔfun Lopom titi u sisam pe, mbe ki ti u leele pimi li waa, kena ki fna mbe u nablɛm ŋmba u n na fumnɔ wɔ, mbe tɛɛ mbe sisam sra wɔ mbe o Tafun Nyiɛkpɔɔ ŋga. 4 Ki fna mbe srawɔfun wre pan na nablɛm pɔlɔ wre ni Yoŋgo Nyuŋgo kre jlonwee nyu na wa, mbe kɛ taa u ndra na, mbe u gbo o Tafun Nyiɛkpɔɔ yiɛ wa. 5 Mbe Srawɔfun Lopom titi wre yurɔ wre nyimi yire yɛ kna mbe sɛ na yi ni Yoŋgo Nyuŋgo wa. 6 Mbe kambɛlɛ ni nyimi yire nu, mbe nyaara o Tafun Nyiɛkpɔɔ yiɛ wa, yoŋgo cheche ŋga pe paari Yoŋgo Nyuŋgo kre lam kre yɛsimi gbee kɔɔnashin. 7 Mbe srawɔfun Lopom titi wre nyimi yire yɛ tɛɛ mbe sragbunu ŋga na pe tuwe ndiom tɛɛn sroi, a kii wa mu yire o Tafun Nyiɛkpɔɔ yiɛ kre jeŋgle nyjɛ yi yiri na nyamblɛ yi kre mana. Mbe u nyimi yire hɛnyi yire kna mbe wo sragbunu ŋga kii wa Yoŋgo Nyuŋgo kre yɛsimi wa kre jaara. 8 Mbe u nablɛm wre nyina kro wɔ, na u nyina nyjɛ yii u lɛɛ mɛnyi tɔ kre, 9 na u sɛlɛ hulo yire, na nyina nyjɛ yii wa yi na kro, na u ndɛlɛ kokoo ŋga ki tna titi kre ni. 10 Mbe Srawɔfun Lopom titi wre nyina yire wru mbe sɛ yi sro sragbunu ŋga na pe yurɛ sroi kre na, imi na pe yurɛ mblɛ ni pe wejinyiŋge sra woni pre nyina woni kre, pan ki fna u ŋmba pe. 11 La, u nablɛm wre hlɛ, na u kaara kre kro, na u ndra, na u jeelee, na u lɛɛ yirɛ kro wru mbe ya u lɛɛ titi yire na, 12 mbe yi tio mbe yili pe tni haa wa, mbe sɛ na yi ni paala lawee cheche kre nu, mna pe sra gbunu kre tɔɔnrɔ woni kre, mbe sɛ kanhun gbɛɛri tɔɔnrɔ nyjɛ pe ble wa yire na, mbe yi sro.13 La, na Israel leele pre kro pe sisam pe, a tuwi ma pe tuwi mu punu mu o Tafun Nyiɛkpɔɔ mbra yire ka taan, a ki tia pe n chin na pe pimi li kre, 14 kena na pe waa kɔ mu sisam ŋga nyini pe pe chin kre, leele pre pe nablɛm pɔlɔ cha mbe sisam sra wɔ. Pe sɛ na u ni Nyiɛkpɔɔ Yoŋgo Nyuŋgo kre yɛsimi wa. 15 Mbe chia kre loplombo pre kɛnyi taa taa yurɔ wre ndra na o Tafun Nyiɛkpɔɔ yiɛ na, mbe u gbo wa. 16 Mbe Srawɔfun Lopom titi wre nablɛm pɔlɔ wre nyimi yire yɛ wru mbe le Yoŋgo Nyuŋgo wa. 17 Mbe u kambɛlɛ ni nyimi yire nu, mbe yi nyaara yoŋgo ŋga pe paari Yoŋgo Nyuŋgo wa kre yɛsimi wa gbee kɔɔnashin. 18 Mbe u nyimi yire yɛ tɛɛ mbe sragbunu ŋga na pe tuwe ndiom tɛɛn sroi kre jeŋgle nyjɛ yi pe na nyamblɛ yi yire mana o Tafun Nyiɛkpɔɔ yiɛ, Yoŋgo Nyuŋgo kre lam wa, mbe u nyimi yire hɛnyi kna mbe wo sragbunu ŋga na pe yurɛ sroi kre jaara Yoŋgo Nyuŋgo kre yɛsimi. 19 Mbe u yurɔ wre nyina yire kro wɔ u nu, mbe yi sro sragbunu kre na. 20 Mbe nablɛm wre pe imi na u nablɛm ŋmba ni pe teeri na sisam sra woni wre pini kre. Kre kolo ŋga na srawɔfun wre we yire mbe leele pre sisam sra wɔ, mbe Nyiɛkpɔɔ pe sisam ti mbe pe kɛ. 21 Kena u nablɛm wre wru mbe yili na u ni leele pre tnihaa wa, mbe sɛ u sro imi na wra nablɛm pɔlɔ jlewo wre pe kre. Kre sra ŋga ni pe lenɛɛmu sisam sra woni.
22 A na leele pre yɛkulo pre wa u sisam pe mu o Tafun Nyiɛkpɔɔ mbra yire ka taan, a tuwi ma u tuwi kre, ufun wre pimi li. 23 Na pe waa u nyina u sisam ŋga u pe kre, kena ufun u kaplɔ ŋmba u n na fumnɔ wɔ mbe u tɛɛ mbe sra wɔ. 24 Ki fna u kɛ taa u ndra na, mbe u gbo sragbunu kre nyjeeri haa, mna pe yurɛ sroo sra yurɛ pre kuu kre. Kre sra ŋga ni pe sisam laari lewo na. 25 Kena srawɔfun wre kambɛlɛ ni yurɔ wre nyimi yire nu, mbe yurɛ sroo sragbunu kre jeŋgle nyjɛ yi pe na nyamblɛ yi yire mana, mbe nyimi yire hɛnyi kna mbe wo sragbunu kre jaara. 26 Mbe yurɔ wre nyina yire kro sro sragbunu kre na, imi na u wejinyiŋge sra yurɔ wre nyina sro kre. Kre kolo ŋga na srawɔfun wre we tro mbe ki ti yɛklo wre sisam tinkɛɛ ta.
27 A na leele pre wa sisam pe mu o Tafun Nyiɛkpɔɔ mbra yire ka taan, a tuwi ma u tuwi kre, ufun wre pimi li. 28 Na ki pan na pe tia u chin na u sisam pe kre, ufun wre fna mbe pan na sikalo ŋmba u n na fumnɔ ni mbe sisam sra wɔ. 29 Ki fna u kɛ taa yurɔ wre ndra na, mbe u gbo sragbunu kre nyjeeri haa wa, lawee ŋga nu pe yurɛ sroo sra yurɛ pre kuu kre. 30 Mbe srawɔfun wre kambɛlɛ ni yurɔ wre nyimi yire nu, mbe tɛɛ mbe sragbunu kre jeŋgle nyjɛ yi pe na nyamblɛ yi yire mana. Mbe yi hɛnyi yire kna mbe wo sragbunu kre jaara. 31 Mbe u yurɔ wre nyina yire wɔ u nu kro, imi na pe wejinyiŋge sra yurɔ nyina woni u nu kro kre, mbe srawɔfun wre yi sro sragbunu kre na. Yi ndiom tna o Tafun Nyiɛkpɔɔ pan. Kre kolo ŋga na srawɔfun wre we tro mbe ndro wre sisam sra wɔ, mbe u sisam tinkɛɛ ta.
32 A na mbɔɔ ni ufun wre pan mbe sisam sra wɔ naa, u fna mbe pe mbapɔlɔ chlɔ ŋmba u n na fumnɔ. 33 Mbe u kɛ taa u ndra na, mbe u gbo sragbunu kre nyjeeri haa, lawee ŋga nu pe yurɛ sroo sra yurɛ pre kuu kre. 34 Mbe srawɔfun wre u kambɛlɛ ni yurɔ wre nyimi yire nu, mbe sragbunu kre jeŋgle nyjɛ yi pe na nyamblɛ yi yire mana, mbe yi hɛnyi yire kna mbe wo sragbunu kre jaara. 35 Kena u yurɔ wre nyina yire wɔ u nu kro, imi na pe mbɔɔ ŋmba ni pe tɛɛ na wejinyiŋge sra woni wre nyina kro woni kre, mbe srawɔfun wre yi sro sragbunu kre na, yire na sro sra wɔ yirɛ nyjɛ ni pe pan o Tafun Nyiɛkpɔɔ pan yire ni kro. Kre kolo ŋga na srawɔfun we tro mbe ndro wrefun sisam sra wɔ, mbe u sisam tinkɛɛ ta.