Na ndro sɛ nuu ni mbe sɛ wejinyiŋge sra wɔ, u le na we pe nablɛm, ndee nalo ŋmba u n na fumnɔ. 2 Ŋmba u paan mbe sra kre wɔ wre, u kɛ taa yurɔ ŋmba ni u paan mbe sra wɔ wre ndra na, mbe u gbo Yoŋgo Nyuŋgo ŋga nu Nyiɛkpɔɔ na Moses fni kre jlonwee nyu na. Mbe Aaron bibilɛ srawɔfɛɛnlɛ pre yurɔ wre nyimi wru mbe nyaara sragbunu kre kokoe jijirɛ yire na. 3 Mbe pe wejinyiŋge sra yurɔ ŋmba ni pe sra wɔ mu o Tafun Nyiɛkpɔɔ ŋga wre nyina yire yi u lɛɛ yirɛ tɔ yire kro wɔ, 4 na u sɛlɛ hulo, na nyina nyjɛ yi yi tɔ yire kro, na u ndɛlɛ kokoo ŋga ki tna titi kre ni, 5 mbe srawɔfɛɛnlɛ pre yire kaara yire krɛrɛ, na yirɛ sroo sra yirɛ yire chaa mbe yi sro sragbunu kre na. Kre sra kre ndiom tna o Tafun Nyiɛkpɔɔ wre pan. 6 Na mbɔɔ, ndee sugbɔ ni pe tɛɛ mbe wejinyiŋge sra wɔ kre, u fna mbe chlɔ, ndee blɔ. Ki n fna mbe u pe yurɔ ŋmba u fumnɔ. 7 Na wa pan mbɔɔ ni mbe sra wɔ mbe o Tafun Nyiɛkpɔɔ wre ŋga, 8 ki fna u kɛ taa mbɔɔ wre ndra na, mbe u gbo Yoŋgo Nyuŋgo kre yɛsimi. Mbe Aaron bibilɛ srawɔfɛɛnlɛ pre yurɔ wre nyimi yire nyaara mbe wo sragbunu kre kokoe jijirɛ yire na. 9 Kena ŋmba u pan sra yurɔ ni wre fna mbe yurɔ wre nyina, na u nakaan ŋga pe kun mu mbra u pukaan na kre, na u nyina nyjɛ yi u lɛɛ mɛnyi tɔ yire wɔ, 10 yire na u sɛlɛ hulo yire, na nyina nyjɛ yii wa yi na yire kro, na ndɛlɛ kokoo ŋga ki tna titi kre ni, 11 mbe srawɔfun ŋmba u tnumu tuni wre yire kaara yire kro sro sragbunu kre na mbe o Tafun Nyiɛkpɔɔ ŋga.