4 Na wa chaa mbe paanu ŋga pe fɔ fnunu nu tɛɛ mbe sra wɔ, u paanu mimi ŋga nu yiisi n wa tɛɛ mbe ki pe. We jaa olive simi chaa mimi kre nu mbe paanu kre pe, ndee we jaa yi pe na mahan yi, mbe olive simi tɛɛ mbe yi fa.

5 A na paanu nyjɛ pe fɔ taa kpɛfrɛɛ na yi naa, ki fna mbe pe olive simi chaa paanu mimi kre nu, mbe pia yiisi le ki nu, 6 mbe paanu yire tɔɔn mbe olive simi kre wo yi na, mbe yi tɛɛ mbe shɔlɔ sra kre wɔ. 7 A na taha yirɛ kla wo nu pe paanu yire kla naa, ki fna mbe pe olive simi chaa paanu mimi kre nu. 8 Kena pe pan na yi ni mbe srawɔfun wre ŋga, mbe u sɛ yi taa sragbunu kre na, mbe yi pe o Tafun Nyiɛkpɔɔ wre sra yirɛ. 9 Kena srawɔfun wre sra yirɛ yire chiɛri wɔ mbe sɛ yi taa sragbunu kre na, mbe yi sro, kre ki nyina na kre sra kre kro mi e Tafun Nyiɛkpɔɔ wre wo yi, a kre sra kre ndiom tna mi e Tafun Nyiɛkpɔɔ wre pan. 10 Kena sra yirɛ yire hɛnyi fna mbe pe srawɔfɛɛnlɛ pre wee. Yi pe cheche, ŋgi na hin? Mimi ŋga pe tɛɛ mu sra wɔ mu o Tafun Nyiɛkpɔɔ ŋga kre kɔɔn yi. 11 Shɔlɔ sra ŋga yirɛ nyjɛ ni ni ee pan mbe o Tafun Nyiɛkpɔɔ ŋga kpan, yaa shia yiisi le ki nu, ŋgi na hin? Ki n fna mbe pe yiisi, ndee srɛ le sra yirɛ nu mbe yi sro mbe o Tafun Nyiɛkpɔɔ wre ŋga. 12 E see yirɛ jle wee nyjɛ ee na kuun yɛlɛ nyini yire fna mbe e na sra woni na yi ni mbra o Tafun Nyiɛkpɔɔ kaan, la, yi n fna mbe pe yi sro sragbunu kre na. 13 E na weŋge leni shɔlɔ sra kro nu, ŋgi na hin? Mi na yire nyu nunu pe na weŋge ni. Kena e sra yirɛ kro fna mbe e weŋge le yi nu.^a 14 Na e paan na e see yirɛ jle wee ni mbe sra wɔ mbe mi e Tafun Nyiɛkpɔɔ ŋga kre, ki fna mbe pe shɔlɔ nyjɛ e kun jle, mu yi kla kanhun, na mu yi tre. 15 E olive simi, na tuwe ndiom tɛɛn ya yi na. 16 Mbe srawɔfun wre shɔlɔ nyjɛ pe tre yire yɛ ko chiɛri na olive simi kre ni, mbe yire na tuwe ndiom tɛɛn yire kro sro mbe ki nyina na sra kre kro, mi e Tafun Nyiɛkpɔɔ wre wo yi.