4 Mbe mu pan na Aaron na u bibilɛ pre ni mbe yire ni yiɛ Yoŋgo Nyuŋgo kre jlonwee nyu na, mbe pe weli paala kolo na. 5 Kena mu Aaron le u srawɔɔ dodonyi yire, we dodoŋgi fiŋge kɛnyi wo kre le, mbe mbruku wo tutnɔŋɔ kre le, mbe kpro kre le, mbe chiin gbun wo kre le, mbe greree kre pɔ. 6 Mbe mu chin mbe u pɔ namu kre, mbe swanyiɛ yira ŋga na pe nyunɔ na, Pe cheche mu o Tafun Nyiɛkpɔɔ ŋga kre pɔ u nduwe na. 7 Mbe mu olive simi fawo kre wru mbe ki kna mbe wo u ndra na, mbe u fa na ki ni, mbe u pe srawɔfun mbe ni ŋga.

8 Mbe mu pan na u bibilɛ pre ni, mbe pe le pe dodonyi yire, 9 mbe pe pɔ greree, mbe pe juulee yire pɔ pe ndrɛ na. Kre kolo ŋga na mu yire, mbe Aaron na u bibilɛ pre pe srawɔfɛɛnlɛ mbe ni ŋga. Pre na pe nanae we pe ni srawɔfɛɛnlɛ nyjila kro nu.

10 Mbe mu pan na nablɛm wre ni ni yiɛ Yoŋgo Nyuŋgo kre jlonwee, mbe mu yo Aaron na u bibilɛ pre pan mbe pe kɛnyi taa nablɛm wre ndra na. 11 Nuu wre gbo ni yiɛ na wa, Yoŋgo Nyuŋgo kre jlonwee wa.

12 Mbe mu kambɛlɛ ni nablɛm wre nyimi yire nu mbe sragbunu kre yirɛ chom chom nyjɛ yi pe na nyamblɛ yi yire mana. Kena mu nyimi yire hɛnyi kna mbe wo sragbunu kre tapan. 13 Na mu kɔ mbe mu nyina nyjɛ yii wa yurɔ wre lɛɛ bie na yire laala peii. Kre na u ndɛlɛ lawee ŋga ki tna titi kre, na u sɛlɛ hulo yire, na nyina nyjɛ yi yi tɔ yire, mbe mu yi sro sragbunu kre na mbe ni ŋga. 14 La, nablɛm wre kaara, na u hlɛ, na u lɛɛ yire rɛ, e sɛ yi sro e tnihaa wa mbookrɔ. Kre sra ŋga kie srawɔfɛɛnlɛ pre sisam pɔ mbe laa pe na.

15 Mbe mu mbapilɛ pre nunu wɔ, mbe ti Aaron na u bibilɛ pre kɛnyi taa u ndra na. 16 Mbe mu u gbo, mbe u nyimi yire nyaara mbe wo sragbunu kre mbɛɛlɛ jijirɛ yire kro na. 17 Mbe mu mbaplɔ wre kaara kre knumu brobro, mbe u lɛɛ yire je, mbe u jeelee yire je, mbe yi ya u ndra na, mbe mu yire na kaara hɛnyi yire wru mbe taa sragbunu kre na. 18 Kena mu sɛ yurɔ wre kro poŋgo sro sragbunu kre na, mbe tɛɛ mbe sro sra wɔ mbe ni ŋga. Na ki pan ma, kena sra kre ndiom tna ni pan.

19 Mbe mu mbaplɔ haŋu wre wru mbe ti Aaron na u bibilɛ pre kɛnyi taa u ndra na. 20 Mbe mu u gbo, mbe u nyimi yire yɛ tɛɛ mbe Aaron na u bibilɛ pe kalie ndiile nyu mana mana, yire na kalie kambɛlogbonyi, na pe kalie jekambɛlogbonyi. Mbe mu nyimi yire hɛnyi kna mbe nyaara sragbunu kre mbɛɛlɛ jijirɛ yire na. 21 Na mu kɔ, mbe mu nyimi nyjɛ sragbunu kre na yire yɛ ko, mbe ya, olive simi kre ka na, mbe yi nyaara mbe wo Aaron na u dodonyi yire na, mbe yɛ nyaara mbe wo u bibilɛ pre, na pe dodonyi yire na. Kre kie nyina na pre na pe dodonyi yire kro pe cheche mu ni ŋga.

22 Mbaplɔ wre nyina wɔ u nu, mu u nakaan ŋga nu nyina nyi kre kun, na nyina ŋga ki u lɛɛ mɛnyi tɔ kre kro, na u ndɛlɛ kokoo ŋga ki tna titi kre, na u sɛlɛ hulo shiin yire, na nyina ŋga ki yi tɔ kre, na u kalie jekpɔlɔ kre ni. 23 A paanu kakɛɛ wee nyjɛ nu yiisi n wa, a pe pan mu ni ŋga yire le mu nununu wɔ yi nyini taarɛ yire nu. Paanu nyjɛ nu olive simi nyi yire nunu wɔ, mu nyjɛ nu olive simi n wa yire nunu wɔ, mbe mu nyjɛ pe pe na mahɛɛn yi yire ka wɔ. 24 Yire sro nyjɛ, na kaara yire krɛrɛ wru mu le Aaron na u bibilɛ pre kɛɛ, mbe e yi tɛɛ mbe yirɛ viŋgee sra wɔ mbe mi e Tafun Nyiɛkpɔɔ wre ŋga. 25 Na pe ni ŋga yi yi mu kɔ kre, kena mu yi shɔ pe kɛɛ, mbe yi sro sragbunu kre na, mbe yi pe sro sra yirɛ mbe ni ŋga. Kre sra kre ndiom tna ni pan.

26 Mbe mu mbaplɔ ŋmba ni mu Aaron le srawɔfun wre gbun wɔ, mbe ki tɛɛ mbe yirɛ viŋgee sra wɔ mbe ni ŋga, la, kre kaara kre, ŋu Moses wo yi.

27 Na ki pan na pe wa le srawɔfun, a pe wre mbaplɔ wre gbo, mu u gbun na u jekpɔlɔ kre wɔ mu yi viŋge mu sra wɔ mu mi Nyiɛkpɔɔ ŋga mu kɔ kre, yire kaara yire we pe yire srawɔfɛɛnlɛ pre wee. 28 Kre kee ŋga, ni ki yuu mbe tɛɛ, a mba ki chinɛ, na ni leele pre wejinyiŋge sra wɔ mu ni ŋga, yurɔ wre gbun, na u jekpɔlɔ we pe srawɔfɛɛnlɛ pre wee, a yie pe sra yirɛ nyjɛ ni leele pre we mi, pe Tafun Nyiɛkpɔɔ wre ŋga.

29 Aaron srawɔɔ dodonyi yire fna na waa ku mbe pe u bibilɛ pre ŋga yi yi. Kena na pe wa le srawɔfun, mbe wra yi leni. 30 Aaron biblɔ ŋmba we u krɔ li mbe pe srawɔfun, mbe sɛ ni yiɛ Yoŋgo Nyuŋgo cheche kre nu, mbe sɛ tnumu tun wre fna mbe dodonyi yire le ble kɔɔnashin.

31 Mbaplɔ ŋmba ni pie tɛɛ mbe Aaron na u bibilɛ pre le srawɔfɛɛnlɛ wre fna mbe pe u kaara kre sɔɔ lawee ŋga ki pe cheche nu. 32 A Yoŋgo Nyuŋgo kre jlonwee nyu na pe fna mbe kaara kre, na paanu nyjɛ yi kro kakɛɛ kre nu yire ka. 33 Srawɔfɛɛnlɛ pre chiin pe fna mbe yirɛ nyjɛ ni pe pe sisam tali yire ka. Lefuŋu wa n fna mbe yire sro yire ka, ŋgi na hin? Sro yire pe cheche.

34 Na ki pan na kaara yire, ndee paanu yire yɛ kro a nyiŋge yi se bnimi, ki fna mbe pe yi sro, ŋga yi pe cheche kre ndra na.

35 Kre kolo ŋga ni mu nyina ŋga na ki fna mu tro mbe Aaron na u bibilɛ pre le srawɔfɛɛnlɛ, a ble kɔɔnashin ni mu ki pe, imi na ndaa ki yo mu pan kre. 36 Ble nyini ŋga, ki fna e nablɛm tɛɛ mbe sra wɔ, mbe ki ti ni sisam ti mbe kɛ. Kre kie nɛɛrɛ laa sragbunu kre na. Kre kɔkro, mbe e sragbunu kre fa na olive simi ni, mbe ki ti ki pe cheche. 37 Yire kee nyjɛ, e yi pe ma ble kɔɔnashin yire kro nu. Na ki pan ma, kie sragbunu kre pe cheche titi, mbe ki ti yira ŋga kie gbun ki na kro pe cheche.

38 Blenyini fuu ŋga, hali mu sɛ su nyjila kro nu, e na sra woni na mbaala shiin mblɛ pe li yɛlɛ nyu ni sragbunu kre na. 39 E mbaala pre nunu tɛɛ e sra wɔ bnimi, mbe e haŋu wre tɛɛ mbe sra wɔ yilakɔŋgɔ. 40 Bnimi mbɔɔ wre, e paanu mimi ŋga snamu kie da kra dnɛ shiin, a pe olive simi kɔta chaa ki nu ya u na, mbe e simi gbɔwo kɔta kna mbe wo mbe sra wɔ. 41 Mbe e mbɔɔ shiinwo wre tɛɛ mbe sra wɔ yilakɔŋgɔ, pan chɔɔ mimi kre, na olive simi kre, na simi gbɔwo kre we da na bnimi wee yire yi. Yire sro sra wɔɔ ŋga, mi e Tafun Nyiɛkpɔɔ wre e ki woni na kaan, a na ki shio, ki ndiom tna ni pan. 42 E na kre yirɛ sro sra ŋga woni nyjila kro nu ni yiɛ, Yoŋgo Nyuŋgo jlonwee nyu na wa. Bawa mi na ni leele pre we na fni, mbe ndaa paara e pan. 43 Kre lawee kre nu mi na yire, ni Israel leele pre we na fni, mbe ni yɛnyiŋge ŋga ki chiɛnri kre ti mbe lawee kre pe cheche. 44 A mbe ti mbe yoŋgo Nyuŋgo kre, na sragbunu kre kro pe cheche, a mbe ti mbe Aaron na u bibilɛ pre pe cheche mbe ni srawɔɔ tnumu tun. 45 A mi na Israel leele pre we chaa mbe tni, mbe ni pe pe Nyiɛkpɔɔ. 46 A pie chin na mi wi pe Tafun Nyiɛkpɔɔ. Mi ndaa pe wɔ mu yili Egypt tra nu, mbe pan mbe mi na pre chaa mbe tni. Mi wi pe Tafun Nyiɛkpɔɔ wre.”