Srawɔfɛɛnlɛ Pre Dodonyi
28
O Tafun Nyiɛkpɔɔ na yo Moses pan mbo, “Mu chunu na u bibilɛ Nadab, na Abihu, na Eliezer, na Ithamar wɔ Israel leele pre nu, mbe pe pe ni srawɔfɛɛnlɛ. 2 Srawɔɔ dodoŋgi fra mu mu chunu Aaron ŋga, mbe ki ti u nyu, mbe yɛnyiŋge ta. 3 Leele mblɛ ni ŋga yirɛ fraa jawala pre kro yeeri mbe pe pan mbe fni mbe Aaron dodoŋgi ŋga ni pie u le srawɔfun kre fra, mbe e pe cheche, mbe u ni srawɔɔ tnumu kre tun. 4 Yo pe pan na pe dodoŋgi gbun wo, na dodoŋgi kpro, na dodoŋgi titnɔŋɔ ŋga na kɛnyi n wa, na dodoŋgi lam wo ŋga na nyi, a pe ki tin na kɛnyi ni, na namu, na u greree ni mbe u ŋga. Ki fna mbe pe yire dodonyi yire yɛ tin mbe mu chunu, na u bibilɛ pre kro ŋga, mbe pe tɛɛ mbe ni srawɔɔ tnumu kre tun. 5 Leele mblɛ pie dodonyi yire tin pre fna mbe jese mbruku wo, na nyiɛ duu, na nyiɛ piipii, na ŋgonyina wo, na fiŋge prupru tɛɛ mbe yi tin. 6 E dodoŋgi kpro kre tin na kɛ ni, na jese mbruku wo, na nyiɛduu, na na nyiɛ piipii, na ŋgonyina wo, na fiŋge prupru ni. 7 Mbe pe mɛnyi shiin fra mbe mbra ki patiɛ, na ki mbɛɛlɛ na, nyjɛ ni we na ki yiri mbra poo. 8 Mbe pe greree chichie tin na yire jese yire nyini ni na chɔɔ, mbe ki pe dodoŋgi kpro kre na, mbe wra ki poo sɛlɛ. 9 Mbe e dnɛ nyjɛ pe yeeri onyx yire shiin wru mbe Jacob bibilɛ kɛmbɔshiin pre mɛɛ kaanri yi na, 10 imi na pra pe se mu taala kre, pan pe mɛɛ yire we kaanri mbe taala, ee mɛɛ yire kɔɔnanu kaanri dnɛ yire nunu na, mbe kɔɔnanu kaanri haŋa kre na. 11 E ndro ŋmba u dnɛ teeri na yirɛ gbeele cha, mbe u Jacob biile pre mɛɛ yire kaanri dnɛ shiin yire na, mbe swanyiɛ nya mbe wo yi nyu na mbe fɛ mbe kun, 12 mbe pe dnɛ shiin yire pɔ u dodoŋgi kpro kre patiɛ yire na, mbe yi yire mbe Israel leele sele kɛmbɔshiin yire ŋga. Kena na ki pan na Aaron srawɔɔ dodoŋgi kre le, kena u Israel sele kɛmbɔshiin mɛɛ yire tio patiɛ na, mbe ki ti mbe mi e Tafun Nyiɛkpɔɔ wre na ni leele pre sɔɔnri nyjila kro nu. 13 Mbe e swanyiɛ tɛɛ mbe yirɛ shiin yɛ pe mbe dnɛ chiɛnri wee yire le, 14 mbe swanyiɛ kre ka tɛɛ mbe jlɔnyi shiin pe, mbe yi mbiile na maŋa yi, mbe yi le swanyiɛ yirɛ shiin nyjɛ nu dnɛ chiɛnri wee yire nyi yire na.Gbun Dodoŋgi Kre Kee
15 E gbun dodoŋgi pe srawɔfun wre pan. Kre we na teeri mbra kee ŋga Nyiɛkpɔɔ chaa nyaa mbra yuu. Jese nyjɛ ni dodoŋgi kpro kre tin yire chɔɔ ni gbun wo kre we tin na. 16 Ki valam na ki titnɔmu yire kro fna mbe yila, na pe ki ka shiin mu mbra, mbe ki titnɔmu pe inchi kɔɔnanyjirɛ, mbe ki valam pe ma na. 17 Mbe e dnɛ chiɛnri wee tɛni yiyɛ na ma tataarɛ ma gbee jijirɛ. Sɔŋgɔ jle wo kre wee mɛɛ yi ruby, na topaz na garnet. 18 Sɔŋgɔ shiinwo kre wee mɛɛ yi emerald, na sapphire, na diamond. 19 A sɔŋgɔ taarɛ wo kre wee yire mɛɛ yi turquoise, na agate, na amethyst. 20 A sɔŋgɔ jijirɛ wo kre wee yire mɛɛ yi beryl, na onyx, na jasper. Mbe pe swanyiɛ gbun mbe yi le le yi lam. 21 Yire dnɛ kɛmbɔshiin yire fna mbe pe Jacob bibilɛ kɛmbɔshiin pre mɛɛ kaanri yi na nununu, mbe yi yire mbe Israel leele sele yire ŋga. 22 E swanyiɛ tɛɛ e jlɔnyi shiin pe, mbe yi ŋmaa mbe yi pe na maŋa yi, mbe yi le dodoŋgi gbun wo kre na. 23 Mbe e swanyiɛ tɛɛ mbe feelee shiin pe, mbe yi yii mbe mbra dodoŋgi gbun wo kre na nyjeeri haa, ki jeŋgle yire na. 24 Kena e swanyiɛ mɛnyi shiin yire le feelee shiin yire na. 25 Kena e swanyiɛ mɛnyi shiin yire nyu shiin yire yii mbe pɔ swanyiɛ yirɛ nyjɛ u patiɛ na yire na, kena e chin mbe yi le dodoŋgi kpro kre mɛnyi yire na. 26 Mbe e swanyiɛ feelee shiin pe, mbe yi le gbun dodoŋgi kre jenu na tapan haa, mbe yi le lam mbe mbra dodoŋgi kpro kre na. 27 E swanyiɛ feelee shiin pe na, e yi le dodoŋgi kpro kre patiɛ tapan haa, mbe yi pan ki yiɛ, mbe mbra mna pe dodoŋgi kpro kre greree fra mu mbra kre na. 28 Kena e gbun dodoŋgi kre feelee yire yii mbe pɔ dodoŋgi kpro kre feelee yire na, na maŋa mbruku wo ni, mbe gbun dodoŋgi kre pan mbe su greree kre nyjeeri, kena na ki pe ma, gbun dodoŋgi kre wa jaa saan. 29 Kena na ki pan na Aaron lee Cheche Ndoo wa nyjila kro nu, we dodoŋgi gbun wo ŋga na pe Israel jlom kɛmbɔshiin pre mɛɛ kaanri kre le, ŋga ni we na Nyiɛkpɔɔ kee chini mbra yuu kre, kena kie ti mbe mi e Tafun Nyiɛkpɔɔ wre na ni leele pre sɔɔnri nyjila kro nu. 30 Mbe e yirɛ nyjɛ pe yeeri Urim na Thummim yire le gbun dodoŋgi kre na, kena na u paan mbe yire ni yiɛ mbe yi pe u na. A nyjila kro nu na u paan mbe yire ni yiɛ, ki fna u kre gbun dodoŋgi kre le, mbe ki ti u yire ki na mbe ni jawala ŋga ni ni nyi na Israel leele pre ni chin.
Srawɔfun Dodoŋgi Ŋga Ki Taa
31 Dodoŋgi titnɔŋɔ ŋga we le kpro kre tapan kre fna mbe pe ki tin na jese mbruku wo ni. 32 Mbe pe ndra le haa wɔ ki na, mbe yira tin mbe ki fra mbe mbra ndra lehaa kre na, mbe ki ti kia jaa wali nyaanyaa. 33-34 Mbe e jese mbruku wo, na nyiɛ duu, na nyiɛ piipii, tɛɛ mbe yirɛ tin mbe yi pe na tiŋge ŋga pe yeeri pomegranate sɛŋgɛ yi dodoŋgi titnɔŋɔ kre nyu, na ki tapan haa, mbe swanyiɛ gegenyi bɛɛlɛ pe mbe yi hlu dodoŋgi kre nyu na, mbe yi le pomegranate sɛnyi yire lalɛɛ, mbe fɛ mbe ki kun. 35 Kena nyjila ŋga nu Aaron we na paan Cheche Ndoo wa mbe yire ni yiɛ kpan, kre dodoŋgi kre ki fna mbe u le, a na u yilii chɔɔ ki fna mbe pe u na, kena Nyiɛkpɔɔ u gegenyi yire tiŋge ndru, mbe ki ti wa ku.
36 Mbe e swanyiɛ titi gbun mbe nyunɔ ki na na, ‘Pe Cheche Mu O Tafun Nyiɛkpɔɔ Ŋga.’ 37 Mbe e maŋa mbruku wo tɛɛ mbe ki pɔ mbe mbra namu kre na. 38 Aaron fna mbe ki pɔ nduwe na, kre kie ti mbe mi e Tafun Nyiɛkpɔɔ wre ni leele Israel leele pre sra nyjɛ pe paan mbe wɔ mbe ni ŋga yire shɔ, hali, na pe punu sra yire wɔɔ na kuraa kre, mbe yi shɔ.
39 E dodoŋgi titnɔŋɔ fiŋge prupru kɛnyi wo tin e u ŋga, mbe namu fiŋge prupru tin mbe ya, mbe greree ŋga pe kɛ tɛɛ mu tin chiriri ya u pan.
40 E dodonyi yire yɛ tin ma e u bibilɛ pre ŋga, yire na greree, na namu, mbe ki ti mbe pe nyu, mbe yɛnyiŋge ta. 41 Moses, ti mbe mu chunu na u bibilɛ pre yire dodonyi yire le, mbe mu pe pe srawɔfɛɛnlɛ mbe ni ŋga, mu pe pe cheche, mu pe fa olive simi ni, mbe pe ni srawɔɔ tnumu tun. 42 Mbe e kplɛ kpro kpro tin mbe pe ŋga, mbe yi yire pe sɛlɛ mbe su jesinyi na, mbe yi pe blɛm tɔ. 43 Yire kplɛ yire Aaron na u bibilɛ pre fna mbra leni, na pe paan mbe yire ni yiɛ Cheche Ndoo wa, ndee na pe paan mbe da sragbunu kre na Cheche Ndoo wa mbe srawɔɔ tnumu tun, mbe wa waa shia uyɛ wa fimi na mbaa ku. Kena kre mbra ŋga ni le mu tɛɛ, mbe wre na u nanae kro li ki na.