Numbers 28

Blenyini Sra Wɔɔ

O Tafun Nyiɛkpɔɔ na yo Moses pan mbo, 2 “Yo Israel leele pre pan na, ‘Pe le na pie na sro teeri mbra sra woni, mbra yi sroi mbra ni kaan nyjila ŋga ki fna nu, kre sra kre ndiom tna ni pan. 3 Yurɛ sroo sra ŋga ki fna mbe e na woni mbra mi e Tafun Nyiɛkpɔɔ wre kaan yi kre. Mbaala shiin mblɛ pe li yɛlɛ nununu, a pe n na fumnɔ, pre ni ee na yurɛ sroo sra woni mbra ni kaan blenyini. 4 Na e mbaala pre nunu tɛɛ mu sra wɔ bnimi, mbe e haŋu wre tɛɛ mbe sra wɔ yilakɔŋgɔ, 5 mbe e shɔlɔ mimi chichie ŋga snam ki da kra dnɛ shiin, a pe olive simi kɔtua jijirɛ chaa ki nu ya yurɛ pre na. 6 Kre blenyini yurɛ sroo sra ŋga mbra ndaa le e pan Sinai nyua kre na fa, mna nyina na ki ndiom tna ni pan kre. 7 Mbapilɛ shiin pre fna mbe e simi gbɔwo kɔtua shiin shiin ya ya pe na. Na e yo ee bnimi sra kre wɔ, kena e simi kɔtua shiin kna mbe wo sragbunu kre na. 8 Yilakɔŋgɔ wo kre, mbe e ki pe imi na e bnimi wo kre pe kre, mbe shɔlɔ, na simi gbɔwo sra wɔ wee yire ya yi na. Kre yurɛ sroo sra kre ndiom tna mi e Tafun Nyiɛkpɔɔ wre pan.

Wuuble Sra Wɔɔ

9 Na Wuuble da kpan, e mbapɔɛlɛɛ shiin mblɛ pe li yɛlɛ nununu, a pe n na fumnɔ wɔ, mbe sra mimi ŋga nu pe olive simi chaa, a ki snam da kradnɛ jijirɛ tɛɛ mbe shɔlɔ sra wɔ, kre na simi woo sra kre ni. 10 Kena yurɛ sroo sra ŋga ee na woni mbra ni kaan Wuuble nu nyjila kro nu yi. Ee na blenyini sra kre, na simi woo sra kre woni mbra yaa.

Nyiɛpɔ Ble Ŋga Ki Yiɛ Klu Sra

11 Nyiɛpɔ ble ŋga ki yiɛklu kpan, ki fna mbe e nablɛm pɔɛlɛɛ shiin, na mbapɔlɔ nunu ŋmba u lɛ, na mbapɔɛlɛɛ bilɛ kɔɔnashin mblɛ pe da yɛlɛ nununu, a pe n na fumnɔ tɛɛ mbe yurɛ sroo sra wɔ mbe ni ŋga. 12 Mbe e shɔlɔ sra mimi ŋga nu pe olive simi chaa, a ki snam da kra dnɛ kɔɔnanu ya ya nablɛm shiin pre na, mbe e mimi ŋga nu pe olive simi chaa kre kradnɛ jijirɛ ya mbaplɔ wre na, 13 mbe e mimi kre kradnɛ shiin shiin ya ya mbapɔɛlɛɛ bilɛ kɔɔnashin pre na, mbe yurɛ sroo, na sro sra yire wɔ mbe ni ŋga, kre sra kre ndiom tna mi e Tafun Nyiɛkpɔɔ wre pan. 14 A nablɛm pre fna mbe e simi gbɔwo kɔtua jinyjirɛnyjirɛ ya pe na, mbe simi kre kɔtua taarɛ ya mbaplɔ wre na, mbapɔɛlɛɛ pre mbe e simi gbɔwo kre kɔtua shiin shiin ya pre na. Yire yirɛ nyjɛ ni ee na yurɛ sroo sra kre woni mbra ni kaan nyiɛpɔ ble ŋga ki yiɛklu kre nu, yɛlɛ kre kro nu. 15 Blenyini yurɛ sroo, na simi woo sra yire kɔkro, mbe e kaplɔ tɛɛ mbe sisam sra wɔ mbe mi e Tafun Nyiɛkpɔɔ wre ŋga.

Klɛntro Ble Yire Lie

16 Nyiɛpɔ ŋga ki yiɛ klu kre, ki ble kɛmbɔjijirɛ wo na, ki fna mbe e o Tafun Nyiɛkpɔɔ Klɛntro ble kpɔɛ yire li mbe ni le yɛnyiŋge. 17 Na ki nyiŋge se nyiɛpɔ kre ble kɛmbɔkunɔ ble kre, kre nu ee nɔɔ hle mbe ble kpɔɛ yire li ble kɔɔnashin, yire ble yire nu krɛrɛ, paanu ŋga nu pe n yiisi le ki fna e na kaa. 18 Ble ŋga ki yiɛ klu kre nu, ki fna e fni titɛɛ mbe ni sumi, a ndro waashia tnumu ka tun. 19 Kre ble kre e nablɛm pɔɛlɛɛ shiin, na mbaplɔ nunu, na mbapɔɛlɛɛ bilɛ kɔɔnashin mblɛ pe li yɛlɛ nununu, a pe n na fumnɔ tɛɛ e yurɛ sroo sra wɔ mbe mi e Tafun Nyiɛkpɔɔ ŋga. 20 Mbe e shɔlɔ sra mimi ŋga nu pe olive simi chaa, a ki snam da kradnɛ kɔɔnanu ya nablɛm pre na peyɛ yɛ, mbe mimi kre kradnɛ jijirɛ ya mbaplɔ wre na, 21 mbe e mimi kre ma kradnɛ shiin shiin ya mbapilɛ kɔɔnashin pre na, mbe tɛɛ mbe shɔlɔ sra wɔ mbe ni ŋga. 22 Mbe e kaplɔ nunu tɛɛ mbe sisam sra wɔ mbe eyɛ ndra lɔ. 23 Yire sra nyjɛ krɛrɛ fna mbe e yi ya bnimi sra yire na mbe yi sro mbe ni ŋga. 24 Mbe e yire sra nyjɛ wɔ mbe taala ble kɔɔnashin yire nu mbe mi e Tafun Nyiɛkpɔɔ ŋga, mbe blenyini sra yire ya yi na. Kre sra kre ndiom tna ni pan,

25 Ble kɔɔnashin ble kre na kre, ki fna mbe e kro fni mbe ni sumi, a ndro waashia tnumu tun.

Sro Kun Nyjila Sra Wɔɔ

26 Ble ŋga nu ee see yirɛ kun nyjila ble lie yire nɔɔ hle, mbe shɔlɔ jle wee tɛɛ mbe sra wɔ mbe mi e Tafun Nyiɛkpɔɔ ŋga kre, ki fna mbe e fni titɛɛ mbe ni sumi, a ndro waashia tnumu tun. 27 Kre ble kre fna mbe e yurɛ sroo sra ŋga ndiom ki tna mi e Tafun Nyiɛkpɔɔ pan wɔ mbe ni ŋga, na nabiile shiin, na mbaplɔ nunu, na mbapɔɛlɛɛ kɔɔnashin, mblɛ pe li yɛlɛ nununu, a pe n na fumnɔ tɛɛ mbe sra wɔ mbe ni ŋga. 28 Nablɛm pre fna mbe e shɔlɔ sra mimi ŋga nu pe olive simi chaa, a ki snam we pe kradnɛ kɔɔnanu ya ya pe na, mbe mimi kre ŋga snam kie da kradnɛ jijirɛ ya mbaplɔ wre na, 29 mbe mimi kre kradnɛ shiin shiin ya mbapɔɛlɛɛ kɔɔnashin pre na mbe sra wɔ mbe ni ŋga. 30 Mbe chiin kaplɔ tɛɛ mbe sisam sra wɔ mbe eyɛ ndra lɔ. 31 Yire sra nyjɛ krɛrɛ fna mbe simi wo wee yire ya yi na, yire na yi blenyini yurɛ sroo, na shɔlɔ sra yire ni kro. E le na yurɛ pre n na fumnɔ.