Pe Zelophehad Bichiɛlɛ Ŋga Tra
27
Zelophehad ŋmba bichiɛlɛ na lɛ Mahlah, na Noah, na Hoglah, na Milcah, na Tirzah kre, u lɛ na wi Hepher, a Hepher lɛ na wi Gilead, a Gilead lɛ na wi Makir, a Makir lɛ na wi Manasseh, a Manasseh lɛ na wi Joseph. 2 Ki ble ka a pre bichiɛlɛ pre na yiri mna sɛ Moses na Eleazar, na Israel loplombo, na leele pre kro da, na pee wa Fninyuŋgo kre jlonwee, o Tafun Nyiɛkpɔɔ yɛsimi wa, mna yo mbo, 3 “O lɛ na ku tablɔ tra kre nu, a u nsra krɔyira tɛɛ o pan, la, u nsra chaa Korah kotɔmblɔ mblɛ pra yiri mu o Tafun Nyiɛkpɔɔ taan pre nu, la, wre titi sisam kra u gbo, a u nsra ku mu bibilɛ ti. 4 Kena na o lɛ wre nsra biblɔ se, ki fna mbe u mɛɛ fun jlom kre na ra? Kena tra ŋga o lɛ jlom wolo ta krɔyira kre, e o ŋga ki ka.”5 A Moses na sɛ pe kee kre yo o Tafun Nyiɛkpɔɔ pan. 6 A o Tafun Nyiɛkpɔɔ wre na yo Moses pan mbo, 7 “Kee ŋga Zelophehad bichiɛlɛ pre yuu kre pe kpra. Ki fna mbe e pe lɛ wre ŋga tra kre ka u jlom wolo pre nu, kena ki pe u bichiɛlɛ pre wo.”
8 A o Tafun Nyiɛkpɔɔ na yo Moses pan mbo, “Yo Israel leele pre kro pan na, na ki pan na blɔ ku, a u n biblɔ se, kena pe u krɔyirɛ wru mbe u bichlɔ ŋga. 9 A na ki pan na u n bichlɔ ni naa, kena pe ki wru mbe u nyjɔ, ndee u chunu blɔ ŋga. 10 A na ki pan na u n wa na nyjɔ, ndee chunu blɔ ni, kena pe u krɔ kre wru mbe u lɛ nyjɔ, ndee u chunu blɔ ŋga. 11 Na ki pan u lɛ wre n wa na nyjɔ, ndee chunu ni kre, mbe pe krɔ kre wru mbe u ndro soo ŋmba uu wa jlom kre na ŋga. Kre mbra ŋga ni leni yire Israel leele pan, imi na mi Nyiɛkpɔɔ ki yo Moses pan kre.”
Joshua Na Tni Moses Titɛɛ
12 A o Tafun Nyiɛkpɔɔ na yo Moses pan mbo, “Sɛ Abarim nyuɛ yire nduu mu yiɛ wa mu tra ŋga ni wru mu Israel leele ŋga kre le. 13 Na maa ki nya mu kɔ to, mu ku mbe mu tolɛɛlɛ kɔŋgɔ ni, imi na mu nyjɔ Aaron na ku kre. 14 Ŋgi na hin? Ŋga Israel leele pre na yiri mna ni taan Meribah nyumu lawee, Zin tablɔ tra kre nu kre, e kro shiin nsra li ni nyu kee na, mna ni ŋga buuro leele pre yiɛ na, a kra nyina na ni pe cheche.” 15 A Moses na yo o Tafun Nyiɛkpɔɔ pan mbo, 16 “O Tafun Nyiɛkpɔɔ ŋmba mu ndro kro kaan ŋmaa, jande ndro ŋmba we ja mbe leele mblɛ yiɛklu wɔ. 17 Ŋmba we jaa sɛ na pe ni ŋunɔ, mbe ndru pan na pe ni, mbe ni Tafun Nyiɛkpɔɔ leele pre wa kɔɔ pe na mbaala mblɛ pe n lefun ni lɛ.”
18 A o Tafun Nyiɛkpɔɔ na yo Moses pan mbo, “Nun biblɔ Joshua ŋmba nu ni ŋumu nyi wre yeeri, mu kɛ taa u na. 19 Ti mbe u paan yire srawɔfun Eleazar, na Israel leele pre kro yiɛ, mbe mu u wɔ mbe pe nyina. 20 U ŋga mu jaŋga kre ka, imi kie pe mbe Israel leele pre kro na lii u kee na. 21 Wre we na yire srawɔfun Eleazar yiɛ, na mi e Tafun Nyiɛkpɔɔ wre waa yire Urim na Thummim yire na mu kee yo srawɔfun Eleazar pan, mbe u shɔ mbe yo ni leele pre pan. A na leele pre we yili, wre nyu kee na pie yire, a na pie ndru mbe pan, wre nyu kee na kie yire.”