Kania Yire Lee
24
O Tafun Nyiɛkpɔɔ na yo Moses pan mbo, 2 “Yo Israel leele pre pan mbe pe pan na olive simi chichie ni mbe e na leni kania yire nu, mbe kania yire wa na fri blee. 3 Aaron fna mbra kaniɛ nyjɛ yii wa o Tafun Nyiɛkpɔɔ yiɛ wa yire le mbe yire yilakɔŋgɔ, mbe nyiŋge paan se Yoŋgo Nyuŋgo wa. Yiraa wa mu yire yoŋgo ŋga pe paari Cheche Ndoo Titi ŋga nu Nyu Nunu Daka kre na nyi kre yɛsimi. Yire mbra nyjɛ fna mbe e taa yi na nyjila kro nu. 4 Aaron fna mbra kaniɛ nyjɛ yii wa swanyiɛ kania kaan kre na o Tafun Nyiɛkpɔɔ yiɛ wa yire le mbe yia ni fri blee. 5 Mbe u paanu mimi tɛɛ mbe paanu kɛmbɔshiin fɔ, mbe nunu snamu da kradnɛ jijirɛ ni. 6 Mbe u paanu yire tɛnni yi yɛ na kɔɔnanunu ma sɔnyi shiin swanyiɛ tebru ŋga o Tafun Nyiɛkpɔɔ yiɛ wa kre na. 7 Mbe u tuwe ndiom tɛɛn titi yire yɛ tɛɛ paanu sɔnyi shiin yire mbɛɛlɛ na, mbe pe yi sro mbe o Tafun Nyiɛkpɔɔ wre ŋga paanu yire titɛɛ. 8 Yire paanu yire fna mbe u yire Israel leele pre jeelee na mbra yi teeri o Tafun Nyiɛkpɔɔ yiɛ Wuuble kro nu, mbe yi pe nyu nunu ŋga kii wa Nyiɛkpɔɔ na Israel leele pre lalaa. 9 Yire paanu yire, Aaron na u bibilɛ pre wee yi, mbe pra yi kaa cheche lawee kre nu, ŋgi na hin? Sra ŋga pe wɔ mu Nyiɛkpɔɔ ŋga kre ka yi, a yi pe cheche titi.”Na Ndro Jiɛnlɛ Kee Yo Nyiɛkpɔɔ Na Ndie Tinɛɛ
10-11 Israel lechlɔ wa, u mɛɛ naa Shelomith, a u lɛ mɛɛ naa Dibri, a wra yiri Dan sele nu, mna biblɔ wa se Egypt leblɔ wa na. Ki ble ka pɔ wre na yili fimi na, a kakrɔ ka na sɛ kun wre na Israel ndro wa lalaa pe tni haa wa. Pɔ wre na sun mu le Nyiɛkpɔɔ jiɛnlɛ nu, a pra u yii mna sɛ Moses ŋga. 12 A pra u le leele kɛɛ, a pra u le, na o Tafun Nyiɛkpɔɔ sri mbe u pe nyina imi pe fna mbe u pe. 13 A o Tafun Nyiɛkpɔɔ na yo Moses pan mbo, 14 “E jiɛnlɛ kee yofun wre wɔ e yili e tni haa wa, mbe leele mblɛ pra u suŋgɔ kee kre loo pre sɛ kɛnyi taa u ndra na, mbe leele pre kro u waari dnɛ ni mbe gbo. 15 Yo Israel leele pre pan na, ndro ŋmba we Nyiɛkpɔɔ sun kpan, u fna mbe ki kanyana nya, 16 a ŋmba we jiɛnlɛ kee yo o Tafun Nyiɛkpɔɔ na kpan, ki fna mbe Israel leele pre kro u waari dnɛ ni mbe gbo, hali na fuŋu ŋmba u yiri waŋgra ka nu wi, ndee na Israel ndro soo wi. Na waa jiɛnlɛ kee yo o Tafun Nyiɛkpɔɔ na, ki fna mbe pe u waari dnɛ ni gbo.
17 Ndro ŋmba we lii ku kpan, ki fna mbe pe u gbo. 18 La, ndro ŋmba we u ŋmbrɔ yurɔ gbo kpan, ki fna mbe u yurɔ wre fɔlɔ tɔ jele na. 19 Na ndro waa u ŋmbrɔ gbun mu pra, ŋga u pe u na kre chɔɔ pe fna mbe pe u na mbe fɔlɔ tɔ. 20 Na wa waa u ŋmbrɔ gbun mu kajle ka, ki fna mbe pe u wo gbun mbe ka na. Na wa waa u ŋmbrɔ gbun mu pra nyini na, ki fna mbe pe u pra nyini na na. Na wa waa u ŋmbrɔ ŋgaala gbun mu kɔ, ki fna mbe pe u wo gbun mbe kɔ na. Kokoo ŋga na wa we u ŋmbrɔ gbun mbe pra kpan, ki fna mbe pe ufun gbun kokoo nunu kre na mbe pra na. 21 Na ndro wa yurɔ gbo, ki fna mbe u u fɔlɔ tɔ jele na, la, na ndro waa ndro gbo, ki fna mbe pe ufun gbo ka mbe fɔlɔ tɔ. 22 Kre mbra ŋga yire mu Israel leele na fumblɔ kro ŋga. Ŋgi na hin? Mi wi e Tafun Nyiɛkpɔɔ wre.”
23 Ŋga Moses na yire kee nyjɛ yo a Israel leele pre pan kre, a pra pɔ jiɛnlɛ kee yofun wre yii, mna yili na u ni mbookrɔ, mna sɛ u waari dnɛ ni mu gbo. Israel leele pre na kee ŋga o Tafun Nyiɛkpɔɔ na yo Moses pan kre pe.