8 E yire wuu yɛlɛ ŋga nu tra kre we wuu kre na e tɔɔnri yɛlɛ kɔɔnashin ma gbee kɔɔnashin, mbe yɛlɛ yire sɛ pe yɛlɛ fuloe shiin na kɔɔnanyjirɛ. 9 Kena nyiɛpɔ kɔɔnashin wo kre ble kɛ na, kre yi e ndra lɔ ble, mbe e bnɔɛ fɔ tra kre nu poŋgo. 10 Kena yɛlɛ fuloe shiin na kɛ wo kre pe cheche yɛlɛ, mbe e ki kpali yɛtaara yɛlɛ tra kre leele pan kro, mbe ki pe tinkɛ yɛlɛ. Kre yɛlɛ kre nu, sele tra ŋga wa lɔ sele ka pan kpan, fna mbe u ki ndro mbe ki fun, ndee mbe u nanae ŋga. A ndro ŋmba pe prɛ kro fna mbe ndru mbe sɛ u sele leele pan. 11 Kre yɛlɛ fuloe shiin na kɛ kre nu, yaa shia yirɛ luu e seele nu, ndee mbe e see yirɛ klomboli kun mbe paan tɛɛ katoo, ndee mbe e tre tinyi nyjɛ ndrɛ e n klu yire sɛnyi knumu mbe paan tɛɛ katoo. 12 Kre yirɛ tinkɛ yɛlɛ kre fna mbe pe cheche mbe e ŋga. Yirɛ klomboli ee na wru seele nu to mbra paan mbra kaa.

13 Yirɛ tinkɛ yɛlɛ kre nu, tra ŋga wa prɛ kpan, fna mbe pe ki ndro mbe ufun ŋga. 14 Na ndro wa tra prɛ, ndee mu ki lɔ u ŋmbrɔ pan kre, waa shia u dnumu. 15 Yɛlɛ nyjɛ tra kre we yirɛ sɛ mbe da, mbe yirɛ tinkɛ yɛlɛ kre chin mbe da kre pie le mbe tra kre ndrɔ kun. 16 Na yɛlɛ nyjɛ yi kro mbe yirɛ tinkɛ yɛlɛ chin mbe da yire waa nɛɛ kre, kena ndrɔ kre fna mbe kpɔɔ, na yɛlɛ yire waa kro fiɛn naa, kena ki fna mbe ki ndrɔ pe fiɛn, ŋgi na hin? Sro ŋga kie yili tra kre nu ee le mbe ki ndrɔ kun. 17 Wa waa shia u ŋmbrɔ dnumu, la, e Nyiɛkpɔɔ wre fiɛ. Mi wi e Tafun, na e Nyiɛkpɔɔ wre.

18 E li ni mbra yire kro na, mbe ki ti e tni tra kre nu na wejinyiŋge ni. 19 Mbe ki ti tra kre yirɛ sɛ mbe e ŋga, mbe e ta mbe ka mbe yɔɔ, mbe tni tra kre na wejinyiŋge ni. 20 E wa we jaa wie na, a yira ŋgi oo na kaa yɛlɛ kɔɔnashin wo ŋga nu waa yirɛ luu, a waa yirɛ kun kre nu hin? 21 Mbe e dwan yɛlɛ kɔɔnanu wo kre nu, mbe e seele yirɛ nyu, mbe e ta mbe li yɛlɛ taarɛ. 22 Na e yirɛ luu yɛlɛ kɔɔnatarɛ wo kre nu, ee yɛlɛ kɔɔnanu wee nyjɛ e kun mu tɛɛ yire ta mbe li chiin mbe sɛ su na yɛlɛ kɔɔnatarɛ wee yire we pan.

23 Ndro waa shia tra prɛ mbe u ŋmbrɔ ŋga mbe waa jaa kɔɔ ndru mbe ki ta na, ŋgi na hin? Tra kre e wo ma, mi e Tafun Nyiɛkpɔɔ wre wo yi, a yire pe na fumblɔ lɛ, na fali ki na. 24 Na wa tra prɛ u ŋmbrɔ pan, koloo wa ki tafun wre pan na we jaa ndru mbe ki lɔ.

25 Na ki pan na shian Israel ndro wa yii, a wra u tra prɛ kre, u sele ndro titi fna mbe tra kre ndra fɔlɔ tɔ, mbe ki shɔ mbe tɛɛ. 26 A na u n sele ndro ni mbe u ki lɔ, a mbakɔ ki fun wre waa swa ta mbe sɛ ki fɔlɔ tɔ kre, 27 ki fna mbe u yɛlɛ nyjɛ tra kre li ki lɔfun pan kre le, mbe chin swa imi we ndro mbe u ŋga, mbe chin mbe u tra kre ta. 28 La, na ki pan na ndro wrefun n swa ta mbe tra kre fɔlɔ tɔ, kena kie kro ŋmba u ki lɔ wre pan, mbe sɛ su yirɛ tinkɛ yɛlɛ ŋga nu pie trɛ ndro mbe pefɛɛnlɛ ŋga kre nu.

29 Na ndro waa katoo prɛ chia ŋga pe mboo sin mu fɛ mu kun na, ufun wree wa kolo ni na, mu yire ble ŋga na u ki prɛ kre na, mu sɛ su ki yɛlɛ nyu na, we jaa ndru mbe sɛ ki lɔ ŋmba pan wra ki prɛ kre pan. 30 La, na u nsra ki lɔ kre yɛlɛ kre nu, kena wa jaa ndru mbe sɛ ki lɔ na. Kena katoo kre we pe ŋmba u ki lɔ wre na u nanae wo. Na yirɛ tinkɛ yɛlɛ ŋga nu pe trɛ ndroi na pefɛɛnlɛ kaan kre waa da, wa katoo kre ta na. 31 La, kalonyi nyjɛ yii wa seechiɛ nyjɛ pe n mboo sin mu fɛ mu kun yire na kre, pan ma yire nyi. Ŋmba u kaloŋgo kre prɛ kre, we jaa ndru mbe sɛ ki lɔ ŋmba pan u ki prɛ kre pan na. A na tinkɛ yɛlɛ ŋga na pe yirɛ ndroi na kaan kre waa da, ki fna mbe ŋmba u ki lɔ wre ki ndro mbe ki tafun wre ŋga.

32 La, Levi leele pre rɛ, pree wa kolo ni nyjila kro nu na chiɛ nyjɛ pe wɔ mu pe ŋga yire, na pe wa kaloŋgo prɛ wa, we jaa ndru mbe sɛ ki lɔ nyjila ŋga u chaa kro nu. 33 Na Levi leele pre wa waa kaloŋgo prɛ yire chiɛ yire ka na, a u n ja mu ndru mu ki lɔ, na yɛlɛ ŋga nu pe yirɛ ndroi kre waa da, ki fna mbe pe ki ndro mbe u ŋga. Ŋgi na hin? Levi leele pre kalonyi nyjɛ yii wa pe chiɛ yire na, Israel leele pre nu yire, pe wee yi nyjila kro nu. 34 La, trɛ nyjɛ na yurɛ kaa, a yii wa mu Levi leele pre chiɛ yire fɛ mu kun yire n fna mbe prɛ. Pe wee yi kolo kro na.

35 Na e ŋmbrɔ Israel ndro waa wa e nu mu shian, a wa jaa uyɛ le kre, e ya ufun wre na imi na e yaa fuŋu na kre, mbe ki ti u jaa tni e nu. 36 Na Israel ndro waa u ŋmbrɔ jin swa, waa shia nyumu le ki nu, e le na ee Nyiɛkpɔɔ fiɛ, mbe ki ti mbe ufun wre jaa tni e nu. 37 Swa ŋga mu u jin kpan, maa shia nyumu le ki nu, a na wa sro prɛ u ŋmbrɔ pan, waa shia tnu ya ki na. 38 Mi wi e Tafun Nyiɛkpɔɔ ŋmba ndaa e wɔ mu yili Egypt tra nu, mbe paan e ŋga Canaan tra kre, mbe pe e Nyiɛkpɔɔ.

39 Na yire Israel leele pre wa waa shian e nu mu tro, maa uyɛ prɛ mu e wa ŋga, waashia ti mbe ufun wre tnumu tun u pan na tnu wi. 40 Ki fna mbe u u pe na tnumu tunfun ŋmba u wru mu na u fɔlɔ toni, ndee na lewo ŋmba u pan mu tni mu pan nyjila chiɛri nu wi. Ki fna mbe u tnumu tun mu pan mbe sɛ su yirɛ tinkɛɛ yɛlɛ kre nu. 41 Na kre nyjila kre waa da, mbe mu wre na u biile wa kolo mbe u ndru mbe sɛ u jlom na, u tolɛɛlɛ tra nu. 42 Ŋgi na hin? Israel leele pre, ni sumifɛɛnlɛ lɛ, a ni pe lɔ mu yili Egypt tra nu. Kena ndro waa shia pe wa prɛ na tnu wi. 43 Wa waa shia ndrashelee tɛɛ mbe pe wa fiŋge, la, e mi Nyiɛkpɔɔ fiɛ.

44 E letaala fna mbe yiri waŋgrɛ nyjɛ yi e fɛ mu kun yire nu, pre nu ee jaa na tinlɛ loni. 45 A fumblɔ mblɛ pee wa mu tni e nu, na pe biile mblɛ pe se e tra nu pre, ee jaa pre plɛ lɔ mbe pe pe e letaala. 46 A ee jaa pe pe na e krɔyirɛ lɛ, mbe pe ti e biile pan mbe pe kaari pe letaala mbe sɛ su pe kumu nyjila. La, wa waa shia u ŋmbrɔ Israel ndro fiŋge ndrashelee ni.

47 Na ki pan na fuŋu tni e nu mu swa ta, a Israel leele pre wa shian, mu sɛ uyɛ prɛ mu fuŋu wre ŋga, ndee mu fuŋu wre sele ndro ŋga kre, 48 koloo wa na ufun wre we jaa sɛ uyɛ ndra lɔ, a u sele ndro wa we jaa ki pe. 49 U nalɔ, ndee u nalɔ pɔ, ndee u nyimi ndro titi ŋmba u yiri u jlom na we jaa sɛ u ndra lɔ. A na wre titi kɛ waa kɔ mu ja naa, mbe u uyɛ ndra lɔ. 50 Na ndro chaa mbe uyɛ ndra lɔ u tafun pan, a yirɛ tinkɛ yɛlɛ kre n ta mu da tun kre, kena ki fna mbe u swa ka tɔ mbe u tafun wre ŋga, mbe ki da na lewo ŋmba pe wru wra tnumu tuni fɔtɔɔrɔ ni, mbe pe yɛlɛ nyjɛ yi kro mbe yirɛ tinkɛ yɛlɛ kre chin mbe da yire le, mbe tɛɛ mbe swa kre nyu kun, mbe u tɔ mbe u ŋga. 51 Na yɛlɛ nyjɛ yi kro mbe yirɛ tinkɛ yɛlɛ da kre waa nɛɛ naa, kena uyɛ ndra lɔ swa kre fna mbe nɛɛ. 52 A na yɛlɛ nyjɛ yi kro mbe yirɛ tinkɛ yɛlɛ kre da kre waa kro fiɛn naa, kena u ndra lɔ swa kre we pe fiɛn. 53 Na pe Israel ndro lɔ kre kolo kre na, ki fna mbe ŋmba u u lɔ wre u pe na ndro ŋmba u wru wra tnumu tuni u pan yɛlɛ yɛlɛ nu wi. E le na u tafun wre wa u fiŋge ndrashelee kolo na. 54 Na ki pan na pe n ja mu u ndra lɔ yire kolo nyjɛ ka na, kena na yɛlɛ ŋga nu pe yirɛ ndroi kre waa da, wre na u biile fna mbe u pe wa kolo mbe pe sɛ. 55 Ŋgi na hin? Israel leele pre ni wolo lɛ, a ni sumifɛɛnlɛ lɛ, a ni pe wɔ mu yili Egypt tra nu. Mi wi pe Tafun Nyiɛkpɔɔ.”