3 Na e waa taa ni mbra yire, na kee nyjɛ ni e nyina yire kro na kre, 4 mbe ti mbe nyiɛ pan e pan yi nyjila nu, mbe ki ti yirɛ nyjɛ ee luu yire nyu, mbe tinyi sɛ e pan imi na ki fna. 5 E sro nyjɛ ee luu yire we nyu, mbe e sro ta nɛɛrɛ mbe kun, hali ee pan mbra tre sɛnyi kuun, na e shɔlɔɔ wa tɛ e na kuun. Ee e tre sɛnyi yire kun mbe sɛ su na e shɔlɔ luu nyjila we da na. Sro ŋga e chaa mbe li kpan, ee ki ta, a ee tni wejinyiŋge nu tra kre nu. 6 Mbe e ŋga wejinyiŋge tra kre nu mbe e sni mbe ŋunu, a ndro wa ti mbe gbun yɔ e na. A mbe yurɛ sisɛɛ ni mbe yili tra kre nu, a ŋunɔ wa pe tra kre nu na. 7 A ee e loŋgoolo kɔŋgɔ ni mbe sɛ pe gbo brɔfiɛn yiɛshiin ni mbe wo e yiɛ. 8 E leele kunɔ we ti mbe pe leele lafaa fɛ e yiɛ, a e lafaa we ti mbe pe leele kagbenyi kɛ fɛ e yiɛ. A ee brɔfiɛn yiɛshiin tɛɛ mbe e loŋgoolo pre gbo. 9 Mbe nyu e na, mbe ti mbe e leele pre nɛɛ mbe ya, a mbe li ni nyu nunu ŋga ndaa pe na e ni kre na. 10 E see yirɛ nyjɛ ee kun yire we e da mbe li yɛlɛ kre nu, hali mbe e sro lɛɛlɛ yire koli mbe yili, mbe chiin lawee ta mbe fɔnyi kun mbe tɛɛ. 11 A mbe tni e nu ni Yoŋgo Nyuŋgo cheche kre nu, a e kee wa ni pe kpɔli ni na. 12 Mi na yire lɛ, mbe pe e Nyiɛkpɔɔ, mbe e pe ni leele. 13 Mi wi e Tafun Nyiɛkpɔɔ ŋmba ndaa e wɔ mu yili Egypt tra nu, mbe ki ti mbe yaa pe tinlɛ na. Ndaa e wɔ mu yili jaŋga ŋga kraa e lii wa kre kɛɛ, mna tia na e tro, mbe e yulɔ yili.

14 La, na e yo yaa ndie tɛɛ ni pan, mbe li ni mbra kee yire na, 15 ndee mu je mu yo na yaa taa kee nyjɛ ni e nyina yire na, mu krɔ kna mu wa ni mbra yire na kolo kro na, mu ni nyu nunu kre kla kre, 16 kena kee ŋga mbe e pe yi kre, mbe ti mbe kanyana kpɔɔ e fo, mbe ti mbe yira nyjɛ yia jaa tra, na wejiwrɛŋgɛ ŋga kie ti mbe e fun nyiɛlɛ na, mbe ka kun e ŋmaa na e da. Ee yirɛ luu, a yia pe tnu ni mbe e ŋga, ŋgi na hin? E loŋgoolo we pan mbe e ni mbe yi wru mbe hɛ li. 17 Mbe nyibie sisaa kna e na, mbe ki ti mbe e loŋgoolo e ja. A mblɛ pe e pra kre, pre pie pe e ŋulo mbra e le. Fiɛrɛ we ti mbe e fɛ nyjila ŋga ni ndro n na e nini.

18 A yire kee nyjɛ kɔkro ni, na e nsra ndie tɛɛ ni pan, mbe e ndie tini mbe ki da ma gbee kɔɔnashin, hali mbe tro ma na. 19 Mbe ti mbe e yɛkpɔɔmu kre nyu to, a mba ti mbe nyiɛ pan, mbe ki ti wam yire e tra nu, mbe ki tra kre sheli na tɔɔnrɔ yi. 20 A faŋga tnumu nyjɛ ee tun yire kro we pe waara. Ŋgi na hin? Na e yirɛ luu yia nyu, a tinyi wa sɛ e pan.

21 Na e waa je mu na kee nyjɛ yire titi chaa pini ni na, mu ndie wɔ ni kee yire na naa, mbe ndru mbe e ndie tini ma gbee kɔɔnashin imi na ki fna. 22 Mbe ti mbe nyaalam yurɛ sisɛɛ pan mbe le e nu, mbe e biile gbo, mbe e yurɛ pɔɔri wolo kla, e chiɛri plɛ ee kro, mbe ki ti mbe e leele cha mbe la e kooloe na. 23 Yire kee nyjɛ krɛrɛ kɔkro ni, na e waa je a e nsra ndie tɛɛ ni pan, a e waa je na kefuɛn pini ni na, 24 kena mi titi we yiɛ kna e na, mbe e ndie tini kpɔɔ e sisam yire na, mbe wɛ jle wee yire na ma gbee kɔɔnashin, hali mbe wɛ ma na kple. 25 Mbe ti mbe ŋunɔ le e nu, mbe pe e gbo, ŋga e ni nyu nunu kre kla kre ndra na. Na e waa fɛ mu sɛ ndra e kakpɔɛ nyjɛ pe mboe sin mu fɛ mu kun yire nu naa, mbe ni ti yira sisaa ŋga kia jaa tra pan mbe le e nu, mbe ki ti e loŋgoolo pre e ta mbe yii. 26 Na ndaa sro kun e na kre, chiɛlɛ kɛ we jaa pe paanu fɔ fnunu nunu nu. Paanu yire mbuuree chɛchiɛri yɛ ee ta mbe ka, a yia e yɔɔ kple.

27 Yire kee nyjɛ kɔkro ni, na e nsra ndie tɛɛ ni pan, maa je mu na kefuɛn nyjɛ e chaa pini ni na kre, 28 kena mbe krɔ tɛɛ mbe yiɛ kna e na, mi titi we e ndie tini e sisam yire ndra na ma gbee kɔɔnashin, hali mbe wɛ ma na. 29 Klo we ti mbe e na yire titi biile kaa. 30 E sɛɛnlɛ sumi lawee nyjɛ nyambie na kre, mbe yi kro kla, mbe sragbuɛnlɛɛ nyjɛ na e tuwe ndiom tɛɛn sroi yire kro kla, a pie e gboolo viŋge mbe wa e sɛɛnlɛ wɛɛ nyjɛ e sumi yire na. A e kee we pe kpɔli ni ni pan. 31 Mbe ti mbe e kakpɔɛ yire kaari kajɛɛ, mbe lawee nyjɛ nu e sɛɛnlɛ sumi yire kro juari mbe wo, a na e sra ndiom taan wɔ mu ni ŋga kuraa mba ki shɔ. 32 Mbe ti mbe e tra kre sni waara. A e loŋgoolo mblɛ pie paan ki wru mbe tni kre, e tra kre klaa we pe pe kawako. 33 Mbe ti ŋunɔ le e nu, mbe pe e gbun mbe nyina waŋgrɛ nu, mbe e tra kre sni waara, mbe e chiɛ yire kaari kajɛɛ. 34-35 Na e waa nyina mu sɛ trɛ fɔnyi nu kre, kie ti mbe e tra kre wuu, imi na ki fna mbraa pini yɛlɛ kɔɔnashin wo nu nyjila kro nu kre. Na ee waa e loŋgoolo pre tra nu kre, kie ti mbe tra kre wuu. 36 E mblɛ ee kro e loŋgoolo pre kɛɛ kre, mbe ti mbe fiɛrɛ kpɔɔ e yii, hali wrɛ nyjɛ fuflɛ we na gbuun mbra woni yire tiŋge we ti mbe e na feni na wii pe wii na e ni. Kie pe na feni e feni mbe shɔ ŋunɔ, mbe sɛ foli mbe to, a nde ndro n wa mu taa e na. 37 Ee fɛ mbra gbroi eyɛ na, na feni e feni mbe shɔ ŋunɔ, ande ndro n wa mu taa e kro. Ki tia yaa jaa yire e loŋgoolo yiɛ. 38 Ee ku mbe fun waŋgrɛ leele pre nu. E loŋgoolo pre tra we e jɔli. 39 A e chiɛri mblɛ pie kro e loŋgoolo tra nu kre, wejiŋge we wɛɛri pe na, pe sisam, na pe tolɛɛlɛ sisam nyjɛ pra pe ni na yire ndra na, pe wejiŋge we pe yii titi.

40 La, na pie nyu nyaa mbe pre, na pe tolɛɛlɛ pre sisam yo, imi na pe kro yiri mu ni taan mu da, mu na kee fuɛn nyjɛ pre titi chaa pini ni na, 41 mu tia ni nyibie sisaa kna pe na, mu pe ni mu sɛ pe loŋgoolo trɛ nu. Na pe pe jawala chinɛ, mu peyɛ nyjii pe ndie tiniɛ kre nu, 42 kena mbe ni nyu nunu ŋga ndaa pe na Jacob, na Isaac, na Abraham ni kre sɔɔnri, mbe pe ŋga pe tra kre na. 43 La, ŋga ki yiɛklu yi na, ki fna mbe pe laa tra kre na mbe ki wuu, a ki fna mbe leele pre ndietiniɛ ta, ŋga pe ni mbra yire je kre ndra na. 44 Hali yire kee nyjɛ pe pe kre na ki kɛ ni, na pee wa pe loŋgoolo pre kɛɛ, mba pe je, ndee mbe krɔ kna mbe wa pe na, ndee mbe pe kro kla poŋgo, a mba ni nyu nunu ŋga ndaa pe na pe ni kre kla. Mi wi pe Tafun Nyiɛkpɔɔ wre. 45 La, mbe yila pe na mbe nyu nunu ŋga ndaa pe na pe tolɛɛlɛ pre ni kre sɔɔnri. Pre ndaa wɔ mna yili Egypt tra nu, waŋgrɛ yire leele yiɛ na, mbe paan pe pe Nyiɛkpɔɔ. Mi wi pe Tafun Nyiɛkpɔɔ wre.”

46 Yire mbra nyjɛ, na yire kee nyjɛ, yire o Tafun Nyiɛkpɔɔ na Moses ŋga Sinai nyua kre na, a wra Israel leele pre ŋga kre.