Leviticus 27

O Tafun Nyiɛkpɔɔ Yirɛ Ŋgaa Mbra

O Tafun Nyiɛkpɔɔ na yo Moses pan mbo, 2 “Yo Israel leele pre pan na, na e wa waa nyu yo o Tafun Nyiɛkpɔɔ pan na we ndro wɔ mbe mi e Tafun Nyiɛkpɔɔ wre ŋga, a u kɔ na chaa mbe ndro wre ti mbe ki wɔ swa kre, 3 na blɔ ŋmba u da yɛlɛ fulo mu na shie yɛlɛ fuloe taarɛ wi, u ti mbe u ndra swa da swa fiŋge fuloe shiin na kɛ. 4 A na chlɔ wi naa, u ndra swa fna mbe da swa fiŋge fulo na kɛ. 5 A na pɔ blɔ ŋmba u da yɛlɛ kunɔ na shie fulo wi naa, u ndra swa fna mbe da swa fiŋge fulo. A na pɔ chlɔ wi naa, u ndra swa fna mbe da swa fiŋge kɛ. 6 A na pɔ blɔ ŋmba we pe nyiɛpɔ nunu na shie yɛlɛ kunɔ wi naa, u ndra swa fna mbe da swa fiŋge kunɔ. A na chlɔ wi naa, u ndra swa fna mbe pe swa fiŋge taarɛ. 7 A na blɔ ŋmba u da yɛlɛ fuloe taarɛ na shie wi naa, wre swa fna mbe da, swa fiŋge kɛmbɔkunɔ, mbe chlɔ wo da swa fiŋge kɛ. 8 A na ndro ŋmba u nyu yo kre shian, a wa ja mbe swa kre wɔ naa, kena ki fna pe sɛ na u ni srawɔfun pan, mbe srawɔfun wre u le mbe u ŋga ndrɔ ŋga we ja mbe tɔ.

9 A na yurɔ ŋmba ni pie jaa sra wɔ mbe o Tafun Nyiɛkpɔɔ ŋga nyu wa wru naa, kena yurɔ ŋmba na u nyu taa wre pe cheche. 10 A yurɔ ŋmba na we nyu taa wre, waa shia u chinɛ mbe sɛ na chichie chaa, ndee mbe yurɔ chichie ŋmba na u nyu taa wre ti mbe sɛ na sisaa wa haa chaa. Na waa ki pe ma kena yurɛ pre kro shiin pre pe cheche, a ki fna mbe u o Tafun Nyiɛkpɔɔ ŋga pe kro shiin. 11 La, na yurɔ ŋmba u n pe cheche paala kolo na, a wa jaa u tɛɛ mbe sra wɔ mbe o Tafun Nyiɛkpɔɔ ŋga naa, kena u sɛ na yurɔ wre ni srawɔfun pan. 12 Kena srawɔfun wre yurɔ wre nyini le, na u nyu, ndee na u n nyu, mbe srawɔfun wre ndrɔ kpiki kun mbe taa u na. 13 A na ufun wre chaa mbe yurɔ wre ndra lɔ naa, kena u ndrɔ ŋga srawɔfun wre taa u na kre yɔ kunɔ, mbe ki yɔm nunu ya swa bie kre na mbe tɔ.

14 Na ki pan na wa u katoo pe cheche mu o Tafun Nyiɛkpɔɔ ŋga, srawɔfun fna mbe katoo kre nyini le, mbe ndrɔ kpiki kun mbe taa ki na, 15 Kena na katoofun wre chaa mbe katoo kre lɔ naa, u fna mbe ndrɔ ŋga pe taa ki na kre tɔ, mbe swa kre yɔ kunɔ, mbe ki yɔm nunu tɔ mbe ya ki na, kena u u katoo kre ta na.

16 A na ndro u sele tra ka kun mu ki pe cheche mu o Tafun Nyiɛkpɔɔ ŋga naa, kena srawɔfun fna mbe yirɛ nyjɛ yie jaa luu tra kre nu ndrɔ le, mbe ndrɔ taa tra kre na. Taha ŋga ni pe yirɛ luuro kra kre damu nunu wa swa fiŋge kɛ. 17 Na yɛliire yɛlɛ kre nu wa u tra pe cheche naa, kena ndrɔ nunu kre ki fna mbe u tɔ. 18 A na yɛlɛ kre waa tro naa, kena srawɔfun wre u yɛlɛ nyjɛ yi kro mbe yɛliire yɛlɛ kre chin da yire le, mbe chin mbe ndrɔ kre kun. 19 A na trafun wre waa na chaa mbe tra kre lɔ naa, kena u tra kre ndrɔ kre tɔ, mbe swa kre yɔ kunɔ, mbe ki yɔm nunu ya ki na. 20 Na ufun wre nsra klu mu tra kre lɔ o Tafun Nyiɛkpɔɔ pan, maa ki prɛ mu ndro fɔŋgɔ ŋga naa, kena u n wa kolo ni mbe jaa tra kre lɔ na. 21 Na yɛliire yɛlɛ kre waa da, a ki fna mbe pra tra kre wru mbe ki fun ŋga kre, tra kre we pe cheche mbe pe o Tafun Nyiɛkpɔɔ wo, kena ki pe srawɔfɛɛnlɛ pre tra.

22 A na wa waa tra lɔ, maa ki pe cheche mu o Tafun Nyiɛkpɔɔ ŋga, a ki n pe u sele leele tra kre, 23 kena srawɔfun wre fna mbe yɛlɛ ŋga ki kro mbe yɛliire yɛlɛ kre chiin da le, mbe ndrɔ taa tra kre na, mbe ufun wre swa kre tɔ ki ble kre lam, mbe swa kre pe o Tafun Nyiɛkpɔɔ wo. 24 Na yɛliire yɛlɛ kre waa da, kena tra kre we jaa pe trafun ŋmba wra ki prɛ wre wo. 25 Yira kro ndrɔ fna mbe da imi na loplombo swa fiŋge kra kre ni.

26 E chin na yurɔ bijlo kro o Tafun Nyiɛkpɔɔ wo wi, kena ndro waa shia wa pe cheche mbe o Tafun Nyiɛkpɔɔ ŋga na, ndee mbe wa tɛɛ mbe wejinyiŋge sra wɔ. Na nuu wi, ndee na mbɔɔ wi, o Tafun Nyiɛkpɔɔ wo wi. 27 La, yurɔ bijlo ŋmba u n pe cheche wre, ee jaa u lɔ na ndrɔ ŋga pie taa u na ni, mbe ki yɔ kunɔ mbe yɔm nunu ya ki na. Na yurɔ fun wre nsra u lɔ naa, kena pe u prɛ ndro fɔŋgɔ pan na ndrɔ ŋga pe kun mu taa u na kre chiin ni. 28 Na ndro waa yira ka wru mu ki pe cheche mu o Tafun Nyiɛkpɔɔ wre ŋga, na ndro wi o, ndee na yurɔ wi o, ndee na sele tra yi o, kena yira kre nyini pe cheche mu o Tafun Nyiɛkpɔɔ ŋga. Kena ki fna mbe pe ki prɛ, ndee mbe kifun wre ndru mbe ki lɔ swa ni. 29 A ndro ŋmba pe wɔ mu Nyiɛkpɔɔ ŋga na pe u gbo kre, ki n fna mbe pe swa tɛɛ mbe u ndra lɔ, wrefun wre fna mbe pe u gbo.

30 E yirɛ nyjɛ ee ta tra kre nu kro, na shɔlɔ yi, ndee na tinyi sɛnyi yi, ki fna mbe e yi yɔ kɛ mbe o Tafun Nyiɛkpɔɔ wre ŋga yɔm nunu. 31 A na ndro chaa mbe yirɛ nyjɛ we Nyiɛkpɔɔ ŋga yire ka lɔ swa ni kre, ki fna mbe u ndrɔ ŋga pie kun mbe taa ki na kre tɔ, mbe swa kre yɔ kunɔ, mbe ki yɔm nunu ya ki na. 32 Na wa katoo yurɛ poorii kre, na waa na pe tɔɔnri, ŋmba u taa kɛ kpan fna mbe pe o Tafun Nyiɛkpɔɔ wo. 33 A na u pe tɔɔnri, waa shia ti mbe fumnɔɛ pre chiin pe o Tafun Nyiɛkpɔɔ wolo, a waa shia wa chinɛ. Na waa wa tɛɛ mu wa chinɛ kena yurɛ pre kro shiin fna mbe pe o Tafun Nyiɛkpɔɔ wolo, a wa ja mbe wa lɔ swa ni na.”

34 Mbra nyjɛ o Tafun Nyiɛkpɔɔ na Moses ŋga Sinai nyua kre na, na u Israel leele pre ŋga yire yi kre.