2 A Aaron na yo pe pan mbo, “E swanyiɛ ndiile yirɛ nyjɛ e chiɛlɛ, na e bichiɛlɛ, na e bibilɛ leni yire wɔ e pan e ni ŋga.” 3 A leele pre kro na pe swanyiɛ ndiile yirɛ wɔ mna pan mu Aaron ŋga. 4 A wra yi shɔ mna sɛ yi nya, mna yi kna mu le yira ŋga wra faanri nu, mna ki tɛɛ mna swanyiɛ nablɛm pɔ pe. A leele pre na kna na yuu peyɛ pan mbo, “Israel leele, o sɛɛn ŋga kra yiri na o ni Egypt tra nu mna pan kre yi kre.”

5 Ŋga Aaron na ki nya ma kre, a wra sragbunu sin swanyiɛ nablɛm ble wre yiɛ, mna yo pe pan mbo, “Baŋga oo ble kpɔɔ li, mbe o Tafun Nyiɛkpɔɔ ŋga mɛɛ.” 6 Ŋga nyiŋge na se bnimi pupu, a leele pre na yurɛ sro sra wɔ, mna nyu nunu sra wɔ. Pra sɛ fni na ble kpɔɔ kre lii, a kra kɔ mu kaari, simi gbɔɔrɔ, na peyɛ chaara.

7 A o Tafun Nyiɛkpɔɔ na yo Moses pan mbo, “Pe nyaanyaa mu tii mu sɛ tra. Ŋgi na hin? Mu leele mblɛ mna wɔ mu yili Egypt tra nu pre, sisaa pe, mu ni je. 8 Pe kolo ŋga ni pe nyina mbe pe tro ki na kre je, mu swanyiɛ nya mu tɛɛ mu nablɛm pɔ pe na ki sumi. Mu na sra woni na ki kaan, na yuu na, ‘Israel leele, o sɛɛn ŋga kra yiri na o ni Egypt tra nu mu pan kre yi kre.’”

9 A Nyiɛkpɔɔ na yo Moses pan mbo, “Le, ni chin imi na leele pre ndie kan mu da. 10 Kena maashia ni gbun nyiŋge, ni krɔ kun na pe ni, a mbe pe kla. Kena mbe ŋu na mu nanae pre pe waŋgra kpɔɔ.”

11 La, Moses na u Tafun Nyiɛkpɔɔ wre tali mna yo u pan mbo, “Ni Tafun Nyiɛkpɔɔ, mni a mu tia mu krɔ kun na mu leele ni ma ŋga hin? Ŋu mu mu faŋga, na mu jaŋga tɛɛ mu pe wɔ mu yili Egypt tra nu. 12 Mu ti mbe Egypt leele pre yo na, mu mu leele pre wɔ Egypt tra nu, na paan mbe pe gbo nyuɛ nyjɛ nu, mbe pe kla poŋgo. Jande, maa ti mbe mu krɔkun, mu jawala chinɛ. Maashia ti kre kee ŋga nyini pe fio. 13 Mu sumifun Abraham sɔɔnri, wre na Isaac, na Jacob ni. Daŋga ŋga mna da mu pe ŋga kre sɔɔnri, mna yo na, mu ti mbe pe kɛ leele nɛɛ na wɔɛlɛɛ nyjɛ yii wa nyiɛ yiɛ na ŋga yi, mna yo na mu pe nanae pre ŋga tra ŋga nyu mna yo na mu pe ŋga mbe ki pe pe wo nyjila kro nu kre.” 14 O Tafun Nyiɛkpɔɔ na u jawala chinɛ, a u n sra tia kee ŋga wra tɛɛ mu pe piɛri kre na pe.

15 A Moses na kna mna tii nyua kre na, na dnɛ kpɛfrɛɛ shiin nyjɛ na pra mbra yire nyunɔ kokoo shiin na yiree wa u kɛɛ. 16 Nyiɛkpɔɔ wre titi wra dnɛ yire gbeele, mna mbra yire nyunɔ yi na.

17 Joshua na leele pre gblee loo, a wra yo Moses pan mbo,

18 A Moses na kna mbo,

19 Moses na pan mna mbra leele pre tnihaa wa, mna nya na pe nablɛm pɔ wa faanri mu yire, na yoo na feni na u kuun, a krɔ na u kun kpɔɔ, a wra yire nyua kre tapan, mna dnɛ kpɛfrɛɛ shiin yire wa mu juari. 20 A wra sɛ nabie ŋmba pe faanri wre sro kanhun ni, mna ki tre a kra pe mimi, a wra ki chaa nyumu nu, mna tia Israel leele pre na ki gbɔ. 21 A wra kna mu yo Aaron pan mbo, “Kee ŋgi leele mblɛ pe mu na, a mu tia pe sisaa ŋga nyini pe ma ŋga hin?”

22 A Aaron na kna mbo, “Maa ti mbe mu krɔ kun na ni ni, mu chin na leele mblɛ praa mu mbe sisaa pe. 23 Ndaa wa wa, a pra pan mu yo ni pan mbo, ‘O n chin kee ŋga ki Moses ŋmba u o wɔ mu yili Egypt tra nu wre ta. Kena sɛɛn pe mu o ŋga, mbe ki yiɛklu o pan.’ 24 Ndaa yo pe pan na pe pe swanyiɛ yirɛ wɔ mbe pan, a mblɛ pan yɛ na nyi pre na pan na yi ni mna ni ŋga, a ndaa sɛ yi wa kanhun, a nablɛm pɔ ŋmba na yili.”

25 Moses na nya na Aaron u tia leele pre fun kolo na, mu na jijiere lii pe loŋgoolo yiɛ. 26 A Moses na yiri mu yire pe tni haa kre jlonwee nyu na mna fuu mbo, “Ŋmba uu wa o Tafun Nyiɛkpɔɔ kro kpan, u tro mbe yire kokoo ŋga na.” A Levi leele pre kro na pan mna yire u jaara, 27-28 a wra yo pe pan mbo, “Kee ŋga o Tafun Nyiɛkpɔɔ, Israel Nyiɛkpɔɔ wre yo yi kre mbo, ‘E kro e sɛ e brɔfiɛnlɛ ŋunu wru, e pan e yire jlonwee ŋga na, e le leele pre nu poŋgo, e e chinlɛ, na e nyjɔɔlɔ bilɛ, na e tnifɛɛnlɛ, na e nɔɔlɔ pre gbo, e sɛ su jlonwee ŋga wa na.’” A Levi leele pre na li kee kre na, mna leele kagbenyi taarɛ gbo ki ble kre. 29 A Moses na yo Levi leele pre pan mbo, “Aŋga e pe cheche na srawɔfɛɛnlɛ lɛ yire, mu tnumu tun mu o Tafun Nyiɛkpɔɔ ŋga, mu yire titi bibilɛ, na e nyjɔɔlɔ, na e chinlɛ bilɛ pre gbo, ki tia o Tafun Nyiɛkpɔɔ wre e dwan.”

30 Ŋga ki nyiŋge na se kre, a Moses na yo leele pre hamblɛ pre pan mbo, “E sisaa kpɔɔ pe. La, mbe ndru mbe sɛ Nyiɛkpɔɔ pan nyua kre na, aada mbe jaa sɛ e sisam tali u pan.”

31 A Moses na ndru mu sɛ o Tafun Nyiɛkpɔɔ pan mna sɛ yo u pan mbo, “Leele pre sisaa kpɔɔ pe. Pe swanyiɛ tɛɛ mu sɛɛn pe na sumi. 32 Kena jande pe sisam ti mu pe ŋga, a na ma ki pe ma naa, kena ni mɛɛ wɔ mu yili hlɛ ŋga nu mu mu leele mɛɛ nyunɔi kre nu.”

33 Bawa o Tafun Nyiɛkpɔɔ na kna mna yo Moses pan mbo, “Leele mblɛ pe sisaa pe ni na pre mɛɛ mbe wɔ mbe yili ni hlɛ kre nu. 34 Kena sɛ leele pre wru mu sɛ lawee ŋga kee ni yo mu pan kre nu. Sɔɔnri na ni nyjeeri bituŋu we yiɛklu na e ni, la, ble kaa wa na paan mbe ni leele mblɛ pe ni pe sisaa pre ndie tini.”

35 Ki tia o Tafun Nyiɛkpɔɔ wre na tia yira na le pe nu. Ŋgi na hin? Pra tia Aaron na nablɛm pɔ pe na swanyiɛ ni mu pe ŋga.