4 Ŋga u nyɛnɛɛ ble yire nyu na to kre, Joseph na yo Pharaoh loplombo pre pan mbo, “E jande, na ni kee e yiɛ nyi, kena e sɛ yo Pharaoh pan ni pan na, 5 ‘Ŋga ni lɛ na yo we ku kre, wra tia ndaa da mu u ŋga, a wra yo ni pan mbo, Ni kumu nyjila dani, kena na ndaa ku, sɛ ni le dnɛ wee ŋga ndaa gbo mu wa Canaan tra nu kre nu. Kena ti mbe ni sɛ ni lɛ le, mbe ndru mbe pan.’”

6 A Pharaoh na kna mbo, “Sɛ mu lɛ le, imi na mna da mu u ŋga kre.” 7 Ki tia Joseph na sɛ u lɛ lehaa. A Pharaoh loplombo pre kro, na u kala li ndoo wa loplombo pre, na Egypt tra kre loplombo kro na ka sɛ. 8 Joseph katoo leele, na u nyjɔɔlɔ, na u lɛ katoo leele kro na ka sɛ. Mblɛ pe nsra ka sɛ na lɛ, pe biile, na pe yurɛ, pre pra kro Goshen na wa. 9 Leele plɛ na tni soo kɛɛ nu, a plɛ na tni soolo na mna ya pe na, ki tia leele tataara pra taa Joseph na mna sɛ kumu kre na.

10 Ŋga pra sɛ da shunshun ŋga praa yeeri Atad na, Jordan lɔɔ kre kro kre, a pra Jacob kumu pe wa ble kɔɔnashin, mna nyɛni mu kuulo tɔɔnri chichie. 11 Ŋga Canaan leele mblɛ praa wa mu tni wa pre, na leele pre kumu pee nya Atad shunshun kre na kre, a pra kna mbo, “Egypt leele kumu pee ŋga nyini rɛ, ki sheli.” Kre ki tia pra lawee kre mɛɛ tɛɛ Abel-Mizraim.

12 Ki tia imi Jacob na yo u biile pan mna chin mu ku kre, pan pra ki pe. 13 Pra u gboo wre tio mna sɛ na u ni Canaan tra nu, mna sɛ u le dnɛ wee ŋga kraa wa Machpelah na, mu mbra Mamre na kre nu. Kre dnɛ wee kre, na tra ŋga nu kra nyi kre, Abraham na ki lɔ Ephron Hittite ndro wre pan mnaa u gboolo leni. 14 Ŋga Joseph na sɛ u lɛ le mu kɔ kre, wre na u lɛ biile pre, na leele mblɛ pra sɛ ya u na kre, na ndru mna sɛ Egypt tra nu.

15 Ŋga Joseph nyjɔɔlɔ pre na nya na pe lɛ ku mu kɔ kre, a praa yuu peyɛ pan mbo, “Aada Joseph waa kɔɔ krɔ yii na o ni, mbaa na chaa na we sisam nyjɛ o na pe u na yire fɔlɔ tɔ o na, mni oo pe hin?” 16 Ki tia pra sɛ yo Joseph pan mbo, “Ŋga o lɛ nsra ta mu ku kre, 17 wra yo o yo mu pan na, ‘Joseph, mu lɛbiile pre punɔɔ na sisam kee nyjɛ pra pe mu na, mna mu fiŋge yire kro ti mu pe kɛ.’ Kena fuŋgaami ŋga jande, sisaa ŋga o pe kro ti mu o kɛ, mu lɛ Nyiɛkpɔɔ wre sumifɛɛnlɛ lɛ wre.” Ŋga Joseph na kre kala ŋga loo ma kre, wra nyɛni.

18 A u lɛbiile pre na pan mu to to mu sni u yiɛ mna yo mbo, “Mu tinlɛ lɛ wre.” 19 La, Joseph na yo pe pan mbo, “Yaa ni fiɛ, Nyiɛkpɔɔ wi mi ra? 20 Sisaa ni e naa ni chaa, la, Nyiɛkpɔɔ ki kaari chichie, mbe ki ti mbe lenɛɛrɛ ŋmaashɔmu ta. 21 Kena yaa shia fiɛ. Mbe yire na e biile kro le.” Ki tia wra pe le gbun, mna nyu kee chichie paara pe pan, a pe gbun na nyjii pe na.

22 Joseph na tni Egypt na wa, wre na u lɛ sele leele pre ni. Wra li yɛlɛ lafaa na kɛ, 23 mna Ephraim nana jelijae nya. A pra Manasseh pɔ Makir biile se mna taa u jeelee na. 24 Joseph na yo u lɛbiile pre pan mbo, “Kia mu mbe ni ku. La, Nyiɛkpɔɔ we ya e na, mbe e wɔ mbe yili tra ŋga nu, mbe sɛ na e ni, tra ŋga kee na wra da na we Abraham, na Isaac, na Jacob ŋga kre na.” 25 A Joseph na tia u lɛ Israel biile pre na da mu u ŋga, a wra yo mbo, “E da na, na mbaa ku, a Nyiɛkpɔɔ waa ya e na, mu e wɔ mu yili tra ŋga nu kre, na ee ni kajle tio mbe yili tra ŋga nu.” 26 Kena Joseph na ku Egypt tra nu, kre nyjila kre, na u li yɛlɛ lafaa na kɛ. A pra u fa tuwe ni, mna u le daka nu mu tɛɛ Egypt na wa.