Jacob Paaraa Haŋa
49
Jacob na u bibilɛ pre yeeri mna yo pe pan mbo, “E pan e fni, mbe ni kee nyjɛ yie e da mbakɔ yo e pan. 2 E pan e tni, e kee ŋga mbe yo e pan ŋga loo.3 Reuben, ŋu wi ni bijlo,
a ni nyanyjɛbim,
na ni faŋga nyjila pɔ wi ŋu.
ŋga kia jaa yire titɛɛ yi.
La, mu kee ma kie shia,
mbe wɛ pe na, ŋgi na hin?
Mna sni na ni bichrɔ ni,
mna ni dɛŋglɛ tɔ nɛɛrɛ ni.
5 Simeon, na Levi, na pe lobiile, a pe pe ŋunɔ wi yirɛ tɛɛ mu kee sisɛɛ pe.
6 Mi na pre wa fni,
ndee mbe tni na pe ni
mbe kee ka jawa. Ŋgi na hin?
Pra krɔkuɔn tɛɛ mu leele gbo.
A pra nui panyi saanla
mu pe tɛɛ na pna.
7 Suŋgɔ ki pe yii. Ŋgi na hin?
Pe krɔ na kun kpɔɔ,
a kra tia pra ndra shelee kee pe.
Mbe pe nyina,
mbe pe tni mbe chaa chaa
Israel leele pre ni tra kre nu poŋgo.
8 Judah, ŋu rɛ,
mu lɛbiile we mu ŋga mɛɛ,
a mu mu loŋgoolo yii yulɔɛ na,
a mu lɛbiile kro,
we kosie ka mu yiɛ.
9 Judah, mu pe na jira
ŋmba u yurɔ yii mu ka,
mu ndru mu sɛ le mu sni u sni haa,
a ndro wa sro mbe u nyi wi.
10 Lebiile kanyie kre,
wa yili Judah kɛɛ.
A u nanae pie na ŋunumu lii,
mbe sɛ su nyjila ŋga
ŋmba wo yi ŋunumu kre we pan.
Wre kee na waŋgrɛ kro we taa.
11 Tre tiŋge klɛ na,
we u bubnɔ pɔ pɔ,
klɛ ŋga na sɛnyi nyi
na we u pɔ.
Tre sɛnyi simi ki nyina,
na nyimi yi nu we u dodoŋgi je.
12 Sigbɔɔrɔ we ti u nyiɛlɛ nyina,
a nɔnɔ gbɔɔrɔ we ti,
mbe u ŋgaala fniŋge u nyuu.
13 Zebulun we tni epo nyu na,
bawa krɔɛ we na paan mbra yire,
a u samu we sɛ su Sidon na.
14 Pan Issachar we pe na,
bubnɔ faŋgafun,
ŋmba u sni u tuuro lalaa wi.
15 Na ndoo ŋga nu u sni
na wuui kre nyu,
a u yiɛshɔ ki na kre,
mu nya na u u kukrɔ kna mu tɛɛ,
mbe tuuro snamu shɔ mbe tio,
mbe kɔɔ tnumu tun jaŋga,
na na tnu wi.
16 Dan we na kpra lii u leele nu,
imi na Israel sele hɛnyi yire pini kre.
17 Dan we pe na wɔɔ ŋmba,
uu wa mu sni kolo na wi,
wɔɔ sisaa ŋmba uu wa mu sni
kolo mbɛɛ na mbe soo nu,
mbe u ye mbe sɛ kro,
mbe u nduufun laa mbe wa tra.
18 O Tafun Nyiɛkpɔɔ ŋu ni sri,
mbe mu ni shɔ.
19 Juolo we sɛ Gad tɔ.
La, we kna mbe pe ni.
20 Asher tra nu sro chichie
ŋga ŋunu we li we yili mbe pan.
21 Naphtali pe na sable,
ŋmba u u yɛ ta,
mu na biile chichiele sii wi.
22 Joseph pe na tre tiŋge,
ŋga kii wa mu yire blo mbɛɛ na,
na sɛni chichie.
A ki klɛ nduu mboo na,
mu kna mu to ki kro.
23 U loŋgoolo we sɛ u tɔ,
na bɛnyi ni,
mbe taa u kro mbra u waari,
snimi ni.
24 La, u bɛŋɛɛ wa mu yire titɛɛ,
wa u kɛnyi n ku u na,
na faŋgaa wa yi nu.
Ŋgi na hin? Jacob Nyiɛkpɔɔ wre,
wi u lefun,
na dnɛ ŋga na u yire,
mu faŋga ta.
25 Mu lɛ Nyiɛkpɔɔ wre
u ya mu na.
Nyiɛkpɔɔ jaŋgafun wre,
u nyjeeri yirɛ tɛɛ mbe mu dwan.
U tra tapan yirɛ tɛɛ,
mbe mu dwan.
U biseere na nyinimi nyumu taan,
tɛɛ mbe mu dwan.
26 Joseph, ni dwamu ŋga
ni mu kaan ŋga,
ki kpɔɔ mbe wɛ
ni tolɛɛlɛ dwamu,
ŋga pra ta kre na,
mbe yirɛ chichiele nyjɛ,
mu ta yire nɛɛ mbe sɛ su,
nyua kpɔɔ kre ndra na.
Kre dwamu ŋga ki pan mu na.
Ŋgi na hin? Ŋu Nyiɛkpɔɔ na wɔ,
mu lɛbiile pre nu,
mbe mu pe pe yɛklo.
27 Benjamin pe na kombo wi,
bnimi we yii mbe gbo,
na yila kɔ,
mbe u yirɛ nyjɛ u ta yɔɔlɛ.”
28 Israel jlom kɛmbɔshiin yire yi kre, a ŋga pe lɛ naa pe dwan kre, yire kee nyjɛ wra yo pe pan. Wra pe kro dwan nununu, na dwamu ŋga ki fna na pe ni.
Jacob Kumu Na U Lemu
29 Jacob na yo u biile pre pan mbo, “Kia mu mbe ni ni tolɛɛlɛ kɔŋgɔ ni kuulo. Na ni waa ku, e sɛ ni le ni tolɛɛlɛ jaara, dnɛ wee ŋga kii wa Ephron Hittite ndro wre tra nu kre nu. 30 Kre Machpelah dnɛ wee ŋga, naa wa tra ka nu, mu mbra Mamre na, Canaan tra nu. A Abraham na tra kre lɔ, Ephron Hittite ndro wre pan, mnaa u gboolo leni. 31 Bawa pra Abraham, na u chɔ Saara le. A bawa pra Isaac, na u chɔ Rebekah le. A bawa chɔɔ ndaa Leah le. 32 Kre dnɛwee kre, na tra kre, ni tolɛɛ Abraham wra yi lɔ Hittite leele pan.”
33 Ŋga Jacob na paara u biile pan na mu kɔ kre, a wra to mu sni u dɛŋglɛ na mna ŋu fɛɛn to, mna fii.