Israel Na Ephraim, Na Manasseh Dwan
48
Mbakɔ, pra yo Joseph pan mbo, “Mu lɛ yaa.” Ki tia wra u bibilɛ shiin, Manasseh na Ephraim wru, a pra sɛ Jacob lehaa. 2 Ŋga Israel na loo na, u pɔ Joseph pan u le haa kre, wra gbeŋmba mna yiri mu tni u dɛŋglɛ na. 3 Jacob na yo Joseph pan mbo, “Nyiɛkpɔɔ Jaŋgafun wre na u yɛ wɔ mna ni nyina Luz na Canaan tra nu, bawa wra ni dwan, 4 mna yo ni pan mbo, ‘Le, mbe ti mu biile na mu nanae nɛɛ, mbe sɛ su na mu pe waŋgrɛ yɛ tolɛɛ, a mbe tra ŋga wru mbe mu nanae ŋga, mbe ki pe pe wo nyjila kro nu.’”5 Jacob na ndru mna yo mbo, “Joseph, mu biile shiin mblɛ mu se Egypt na a ni chin mu pan mna kre, Ephraim na Manasseh we pe ni biile, imi na Reuben, na Simeon pe ni biile kre. 6 La, biile mblɛ mu se pre kɔkro kre we pe ŋu titi biile, a krɔ yira ŋga pre we ta kro we yire Ephraim na Manasseh na. 7 Ŋga ndaa yiri Mesopotamia na na paan kre, Rachel na ku, a fooro kpɔɔ na ni yii Canaan tra nu, na ki kro chiɛri mbe o le Ephrath na. Ki tia ndaa u le kolo mbɛɛ na Ephrath kolo.” Ephrath kre chɔɔ pe yeeri Bethlehem kre.
8 Ŋga Israel na Joseph bibilɛ pre nya kre, a wra wie mbo, “A ŋmbi wolo lɛ mblɛ hin?” 9 A Joseph na kna mu yo u lɛ pan mbo, “Bibilɛ mblɛ Nyiɛkpɔɔ ni ŋga Egypt tra nu mna lɛ kre.”
A Israel na yo mbo, “Pan na pe ni mu ni ŋga mbe ni pe dwan.” 10 Kre nyjila kre na Israel lɛ, a u n naa nyaa chichie, ki tia Joseph na biile pre flo mu da u na, a wra pe fa mu yii maa pe gbenyi shiun shiun. 11 Israel na yo Joseph pan mbo, “Ka ni nsra shɔnli na mbe mu nya na fio, a fuŋgaami, Nyiɛkpɔɔ tia ni mu nya, mu mu biile nya na.” 12 A Joseph na biile pre laa Israel jekpɔlɔ na, mna kosie kan, mu yiɛ juule tra u lɛ yiɛ.
13 Joseph na Ephraim tɛɛ Israel kamɛŋɛ, mna Manasseh tɛɛ u kalie, mna pe flo mu da u na. 14 La, Israel na u kɛnyi paari yi yɛ na, mna u kalie kɛ taa Ephraim ndra na, ande na wre wi pɔ ble. Mna u kamɛŋɛ kɛ taa Manasseh ndra na, a na Manasseh wi pɔ lopom.
15 A Israel na Joseph dwan mbo,
“Nyiɛkpɔɔ ŋmba nyu kee na
ni lɛ Isaac,
na ni tolɛɛ Abraham na li kre,
Nyiɛkpɔɔ ŋmba u ni le,
mu pan mu su aŋga na kre,
16 nyjeeri bituŋu ŋmba u ni shɔ,
mu yili kanyana kro nu wre,
u biile mblɛ dwan.
Nyiɛkpɔɔ u ti mbe ni mɛɛ,
na ni lɛ Isaac mɛɛ,
na ni tolɛɛ Abraham mɛɛ taa pe na,
mbe pe biile,
na pe nanae
nɛɛ tataara tra yiɛ na.”
17 Ŋga Joseph na nya na u lɛ u kalie kɛ taa Ephraim na kre, u yiɛ nsra shɔ. A wra to u lɛ kɛ na, mna ki laa mbe sɛ taa Manasseh ndra na. 18 Joseph na yo u lɛ pan mbo, “Ndoo, pan ma, Pɔ lopom wre wi kre, mu kalie kɛ taa u ndra na.”
19 La, u lɛ na je mna yo mbo, “Ni pɔ, ni chin kee ŋga ni pini. Manasseh nanae chɔɔ we kaari waŋgra kpɔɔ. La, imi na kie pe kpan, Ephraim we pe lekpɔɔ mbe wɛ Manasseh na, a Ephraim nanae we pe waŋgrɛ waŋgrɛ yɛ leele.”
20 Israel na pe dwan ki ble kre mna yo mbo,
“Mu mɛɛ Israel leele we tɛɛ mbra
leele dwan mbra yuu mbo,
‘Nyiɛkpɔɔ u mu pe na Ephraim,
na Manasseh wi.’”
Pan kra pe a Israel na tia Ephraim,
na yiɛklu Manasseh pan,
kala kro na.