A pra kna mbo, “Tolɛɛ, yurɛ lefɛɛnlɛ lɛ wre, imi na o tolɛɛlɛ na nyi kre.” 4 A pra ndru mu yo ŋunu wre pan mbo, “O pan mbe paan tni waŋgra ŋga nu chiɛri. Ŋgi na hin? Klo kre nyu sheli titi Canaan tra nu, a mu sumifɛɛnlɛ yurɛ n nyaa ta mbe ka wa, kena tolɛɛ, ti mbe o tni Goshen tra nu wa.” 5 A Pharaoh na yo Joseph pan mbo, “Ŋga mu lɛ, na mu lɛbiile kro ta mu le mna ŋga, 6 mu chin na Egypt tra ŋga kroo wa mu kɛɛ, kena ti pe sɛ tni Goshen tra nu. A na leele plɛɛ wa pe nu mbe jaa yurɛ le chichie naa, kena ni yurɛ pre wru mu le pe kɛɛ na.”

7 A Joseph na sɛ u lɛ Jacob ni mu sɛ ŋunu Pharaoh nyina. Ŋga Jacob na Pharaoh dwan mu kɔ kre, 8 Pharaoh na u wie mbo, “Yɛlɛ mni mu li hin?”

9 A Jacob na yo Pharaoh pan mbo, “Ŋga ni yiri na kila waŋgrɛ nu na tro yɛlɛ lafaa na fulo na kɛ yi kre, a kanyana bribri nu ni nyi, a pan ni tolɛɛlɛ na pe chɔɔ, a ni yɛlɛ n ta mu da na pe wee ni tun.” 10 A Jacob na Pharaoh dwan, mna chin mu yili u yiɛ mu sɛ. 11 Ki tia Joseph na u lɛ, na u lɛbiile pre tɛɛ Egypt tra nu, mna pe ŋga tra ŋga ki tna titi Rameses lawee yire nu, imi na Pharaoh na yo kre. 12 A Joseph naa u lɛ, na u lɛbiile pre, na u lɛ leele pre kro kaan sro, imi na pe biile pre nɛɛmu na da.

13 Yirɛ nsraa nyɔɔ Egypt na Canaan tra kre kro nu na, ki tia klo kre nyu na sheli mu ya. 14 Ŋga Joseph naa shɔlɔ prɛ kre na tia, wra Egypt na Canaan tra kre swɛ kro shɔ mna tɛɛ Pharaoh katoo. 15 Ŋga Egypt na Canaan leele pre na pe swɛ li mu kɔ kre, a Egypt leele pre kro na pan mu yo Joseph pan mbo, “Fuŋga rɛ, o swɛ kɔ, kena o ŋga sro mbe o li, na kre ma klo we o gbo.”

16 A Joseph na yo mbo, “Na e swɛ kɔ e kɛɛ, kena e pan na e yurɛ ni e sro chinɛ.” 17 A pra sɛ pan na pe soolo, na mbaala, na sikaala, na nui, na bubunlɔ ni mna sro chinɛ Joseph pan. Kre yɛlɛ kre na, wra sro tɛɛ mna pe pɔɔri yurɛ pre chinɛ peii.

18 Ŋga yɛlɛ na kna kre, a pra ndru mna pan mu yo Joseph pan mbo, “O Tafun, waa kala ka ndra mu na. Fuŋgaami, ki pe kpra na o swa kɔ o kɛɛ, a o yurɛ kro sɛ pe mu wolo. Yaka n wa mbe o ta mbe mu ŋga na, na ŋga oo oyɛ, na o trɛ wru mbe mu ŋga bɔkɔ. 19 Maa o le mbe o ku mbe o trɛ yire ti waara, o ŋga shɔlɔ mbe o sɛ li, mbe mu wre na o trɛ yire kro wru, mbe o pe Pharaoh tinlɛ, mbe o trɛ yire pe u wee.”

20 Ki tia Joseph na Egypt tra kre kro lɔ mna Pharaoh ŋga. Egypt leele pre kro na pe trɛ prɛ. Ŋgi na hin? Na klo kre nyu sheli titi. Ki tia tra kre kro na pan mu pe ŋunu Pharaoh wo. 21 Pan kra pe a Egypt tra kre leele kro na pan mu pe Pharaoh tinlɛ. 22 Tra ŋga u nsra lɔ na yi sɛɛn kɔmfoɔe pre tra kre. Ŋgi na hin? Na Pharaoh pe kaan swa, a pra tɛɛ na sro loni, kre ki tia pe sɛɛn kɔmfoɔe pre nsra pe tra kre prɛ. 23 A Joseph na yo leele pre pan mbo, “Ŋga ni ta mu yire na e trɛ lɔ mu Pharaoh ŋga mu kɔ ŋga, e yirɛ bie shɔ e sɛ luu tra kre nu. 24 La, nyjila ŋga nu ee yirɛ kun kpan, ee yi yɔ kunɔ, mbe paan Pharaoh ŋga nunu. Mbe e jijirɛ nyjɛ yi kro yire wru, mbe eyɛ pe luuro, mbe hɛnyi tɛɛ mbe yire na e katoo leele, na e biile na lii.”

25 A leele pre na kna mbo, “O tafun, mu o ŋmaa shɔ, kena ti mbe mu yiɛ shɔ o na, oo pe Pharaoh tinlɛ.” 26 Ki tia Joseph na ki le mbra Egypt tra nu, na ndro kro fna mbe yirɛ nyjɛ we ta u see yɔ kunɔ, mbe Pharaoh ŋga nunu. Kre mbra ŋgaa wa na tnumu tuni, hali mu pan mu su aŋga. Pe sɛɛn kɔmfoɔe pre tra kre chiin ki nsra pe Pharaoh wo.

27 Israel leele pre na tni Egypt tra nu, Goshen na. Pra pe yɛ ta, mna biile se tataara. 28 Jacob na tni Egypt tra nu wa yɛlɛ kɛmbɔkɔɔnashin, mna sɛ su nyjila ŋga nu wra li yɛlɛ lafaa na fuloe shiin na kɔɔnashin. 29 Ŋga Israel kumu nyjila na da kre, wra u pɔ Joseph yeeri mna yo u pan mbo, “Na ni kee mu yiɛ nyi wala, kena mu kɛ le ni jesiŋge tapan mu da mu ni ŋga, na mu nyu ni na, mbe kpra li, na na ni ku ma ni le Egypt tra nu. 30 La, ni chaa na mbaa ku, mbe mu ni wɔ Egypt tra nu mbe sɛ ni le ni tolɛɛlɛ le haa wa.”

A Joseph na yo mbo, “Mbe ki pe imi na mu yo kre.” 31 A Israel na ndru mu yo mbo, “Da mu ni ŋga, na mu ki pe ma.” A Joseph na da mu u ŋga, a Jacob na Nyiɛkpɔɔ ŋga mɛɛ u dɛŋglɛ na wa.