Israel Na U Sele Leele Sɛ Egypt Tra Nu
46
Israel na u yirɛ kro koli mna to kolo na shie Egypt na, ŋga wra sɛ da Beersheba na kre, a wra sra wɔ mna u lɛ Isaac Nyiɛkpɔɔ wre ŋga. 2 Bawa Nyiɛkpɔɔ na u yeeri blee mbo, “Jacob, Jacob!” A wra kna mbo, “Mi wi kre.”3 A Nyiɛkpɔɔ na yo u pan mbo, “Mi wi Nyiɛkpɔɔ, mu lɛ Nyiɛkpɔɔ wre, maa shia fiɛ na mu sɛ Egypt tra nu. Bawa mbe ti mbe mu pe waŋgra kpɔɔ ka. 4 Mbe sɛ na mu ni Egypt tra nu. Mbe le na mbe ndru mbe pan na mu nɔɔ leele ni tra ŋga nu na, a Joseph yiɛ na mu ku.”
5 Jacob na yili Beersheba na, a u biile pre na u wru na soo kɛɛ nyjɛ Egypt ŋunu na pe ŋga yire ni, pre na pe biile, na pe chiɛlɛ. 6 Ŋga praa shie kre, Jacob na sɛ na u nanae kro, na pe yurɛ, na yirɛ nyjɛ pra ta Canaan tra nu kro ni Egypt tra nu. 7 Jacob bichiɛlɛ, na bibilɛ, na pe bichiɛlɛ, na pe bibilɛ kro na ka sɛ Egypt tra nu wa.
8 Israel, ndee ŋmba praa yeeri Jacob wre sele leele mblɛ pre na wre na sɛ Egypt tra nu wa pre na lɛ kre,
u pɔ lopom na wi Reuben,
9 A Reuben bibilɛ na lɛ,
Hanoch, na Pallu, na Hezron, na Carmi.
10 Simeon bibilɛ na lɛ,
Jemuel, na Jamin, na Ohad, na Jakin, na Zohar, na Shaul ŋmba wra se Canaan chlɔ na wre.
11 Levi bibilɛ na lɛ,
Gershon, na Kohath, na Merari.
12 Judah bibilɛ na lɛ,
Er, na Onan, na Shelah, na Perez, na Zerah. La, Er na Onan rɛ, pre na ku Canaan na.
Perez bibilɛ na lɛ, Hezron, na Hamul.
13 Issachar bibilɛ na lɛ,
Tola, na Puah, na Jashub, na Shimron.
14 Zebulun bibilɛ na lɛ,
Sered, na Elon, na Jahleel.
15 Bibilɛ mblɛ Jacob na se Leah na Mesopotamia tra nu, mu ya u bichlɔ Dinah na pre mɛɛ yi kre. U biile na u nanae mblɛ wra ta mu yire Leah na pre kro naa fulo na kɛmbɔtaarɛ.
16 Gad bibilɛ na lɛ,
Zephon, na Haggi, na Shuni, na Ezbon, na Eri, na Arodi, na Areli.
17 Asher bibilɛ na lɛ,
Imnah, na Ishvah, na Ishvi, na Beriah, na pe jaa Serah.
A Beriah na yiri mna bibilɛ shiin se, pre na lɛ, Heber, na Malkiel.
18 Pre leele kɛmbɔkɔɔnanu mblɛ na lɛ Jacob biile na u nanae mblɛ wra ta mu yire u chɔ Zilpah, tnu na wi, a Laban na u wru mu bichlɔ Leah ŋga.
19 Jacob chɔ Rachel, na bibilɛ shiin se mna u ŋga, pre na lɛ,
Joseph, na Benjamin. 20 Joseph na bibilɛ shiin se, Egypt tra nu, pre na lɛ, Manasseh, na Ephraim. Kɔmfoɔ ŋmba praa yeeri Potiphera wre, u bichlɔ Asenath na, wra pe se, chia ŋga praa yeeri On kre na.
21 Benjamin bibilɛ na lɛ,
Bela, na Becher, na Ashbel, na Gera, na Naaman, na Ehi, na Rosh, na Muppim, na Huppim, na Ard.
22 Pre leele kɛmbɔjijirɛ mblɛ na lɛ, Jacob biile na u nanae mblɛ wra ta mu yire u chɔ Rachel na.
23 Dan biblɔ na wi Hushim.
24 Naphtali bibilɛ na lɛ,
Jahziel, na Guni, na Jezer, na Shillem.
25 Pre leele kɔɔnashin mblɛ na lɛ Jacob bibilɛ, na u nanae mblɛ wra ta u chɔ Bilhah ŋmba wra pe u tnichlɔ ŋmba Laban na u bichlɔ Rachel ŋga wre na.
26 Jacob biile na u nanae titi mblɛ pra sɛ Egypt tra nu pre naa fuloe taarɛ na kɔɔnanu, u biile pre chiɛlɛ nsra chaa. 27 Joseph na bibilɛ shiin se Egypt na, pre pra ya a Jacob sele wolo mblɛ pra sɛ wa pre na, a pra pe fuloe taarɛ na kɛ.
Jacob Na U Sele Wolo Na Sɛ Le Egypt Tra Nu
28 Jacob na Judah tun mbe u sɛ yo Joseph pan na pee wa kolo na paan, na ki kro chiɛri mbe pe le Goshen na, kena u u fni wa. 29 Ŋga Joseph na mandiɛ kre loo kre, a wra yiri mu le u soo kaa nu mna sɛ u lɛ fni Goshen na wa. Ŋga wra u lɛ nya to, a wra sɛ u fa mu yii, mna nyɛni chiin. 30 Israel na yo Joseph pan mbo, “Ŋga ni mu nya ŋmaa ni ŋga, na ni ku fuŋgaami kuraa ki nyu.”
31 A Joseph na yo u lɛbiile pre, na u lɛ sele wolo pre pan mbo, “Ki fna mbe ni sɛ yo ŋunu Pharaoh pan na, ‘Ni lɛbiile, na ni lɛ sele leele mblɛ praa wa Canaan tra nu pre kro pan ni jaara, 32 a yurɛ pɔɔrifɛɛnlɛ lɛ, a pe pan na pe yurɛ, na pe yirɛ kro ni.’ 33 Na ŋunu Pharaoh waa e yeeri mu e wie na, ‘A tnumu ŋgi e tuni hin?’ 34 E le na ee yo u pan na, ‘Mu sumifɛɛnlɛ, yurɛ lefɛɛnlɛ lɛ wre mu yire o bimi, imi na o tolɛɛlɛ naa pini kre.’ Na e yo ma, we ti mbe e tni Goshen tra nu mna. Ŋgi na hin? Yurɛ lee tnumu na pe Egypt leele pan afuŋgo.”