Joseph Na Uyɛ Wɔ Mu U Lɛbiile Pre Nyina
45
Joseph nsra ja mbe uyɛ yii u sumifɛɛnlɛ pre yiɛ na. Wra fuu mbo, “E kro e yili mna e sɛ!” Ki tia leele pre na yili, a kra kro wre na u lɛbiile pre chiin, a wra chin mu uyɛ nyina pe pan. 2 Joseph na nyɛni badaaŋga a Egypt leele pre na ki loo, a pra sɛ ki yo ŋunu katoo wa leele pan. 3 Bawa Joseph na yo u lɛbiile pre pan mbo, “Mi wi Joseph! Kena ndoo wa na le tɛɛ?” La, u lɛbiile pre nsra ja mna kala ŋga wra wie kre nyu wɔ. Ŋgi na hin? Fiɛrɛ na pe yii kpɔɔ u yiɛ na wa. 4 A Joseph na yo pe pan mbo, “E flo e da ni na.” Ŋga pra flo mu da u na kre, a wra kna mbo, “Mi wi e lɛ pɔ Joseph ŋmba e na prɛ mna Egypt leele pre ŋga kre. 5 Fuŋgaami, yaa shia ti mbe ki e yaa, a yaa shia na baa e yɛ na, na e na ni prɛ mna leele ŋga. Ŋgi na hin? Leele ŋmaashɔmu na Nyiɛkpɔɔ na yila mna tia ndaa yiɛklu e na mu pan mna. 6 Ŋga klo to tra ŋga nu yɛlɛ shiin yi kre, a yɛlɛ kunɔɔ wa yiɛ, mbe ndro wa jaa fali, ndee mbe yaka ta mbe kun. 7 La, kre kawako kolo ŋga na Nyiɛkpɔɔ yila mna tia ndaa yiɛ klu mbe paan yire na e nanae ŋmaa shɔ. 8 Kena ki n pe na yire e na pan na ni ni mna, la, Nyiɛkpɔɔ na wi. Ŋunu wre ni pe u lopom titi. Mi kɛɛ u katoo yira kro nyi. A mi wi Egypt tra ŋga kro lefun.9 Kena e ndru e sɛ nyaa nyaa e sɛ yo ndoo pan na, ‘Kala ŋga mu pɔ Joseph yuu yi kre, Nyiɛkpɔɔ ni pe Egypt tra kro lefun. Kena pan ni jaara fuŋgaami. 10 Mu pan mu tni Goshen tra nu, mu mbra ni na, ŋu na mu biile, na mu nanae, na mu mbaala, na mu sikaala, na mu nui, na mu yirɛ kro ni. 11 Na e pan mu tni wa mbe na e le. Ŋgi na hin? Klo kree wa o yiɛ mbe sɛ su yɛlɛ kunɔ nyu na. Na kre ma, klo we ŋu na mu katoo leele, na yurɛ mblɛ pee wa e pan kro gbo.’”
12 A Joseph na ndru mu yo mbo, “Fuŋga rɛ, yire titi we ni shɔ mbe li, a pan ni chunu Benjamin titi we jaa chin na mi wi Joseph, a ndaa paara na e ni. 13 E sɛ ni jaŋga ŋga ni ta Egypt na mna kre kee yo ndoo pan, mbe e kee nyjɛ e nya ŋga kro yo u pan, mbe u wru mbe pan nyaa nyaa.”
14 A wra Benjamin fa mu yii, a pe kro shiin naa nyɛni. 15 Wra u lɛbiile pre fa mu yii nununu, mna pe gbenyi shiun shiun, mna nyɛni chichie. Ŋga wra nyɛni mu kɔ kre, a u lɛbiile pre na chin na paara na u ni.
16 Ŋga mandiɛ kre na le Pharaoh katoo na Joseph lɛbiile le kre, Pharaoh na u leele pre kro yiɛ na shɔ. 17 Ŋunu Pharaoh na yo Joseph pan mbo, “Yo mu lɛbiile pre pan mbe pe shɔlɔ pɔ pɔ, mbe taa taa pe yurɛ pre na, mbe ndruu sɛ Canaan tra nu, 18 na pe sɛ, mbe pe pan na e lɛ, na e sele leele ni mbe ni ŋga. Mbe e ŋga tra ŋga ki nyu, mu tna titi Egypt na mna, mbe e taa tni mbra lii. 19 Yo pe pan mbe pe soo kɛɛ bali Egypt na mna, mbe sɛ pe chiɛlɛ na pe biile wru mbe pan. Na pe paan mbe praa paan na pe lɛ ni. 20 Yo pe pan na pia shia kawa yirɛ nyjɛ pie yiri mbe ti wa yire kee ni. Egypt tra kre mna ki nyu, mu tna titi nu pie paan tni.”
21 Israel biile pre na kee ŋga ŋunu wre na yo pe pan kre pe, a Joseph na pe ŋga soo kɛɛ, imi na ŋunu wre na yo kre, a wra ndru mu pe ŋga sroe nyjɛ pie na lii mbra shie. 22 Joseph na pe kro ŋga wejiyirɛ nyjɛ pie na leni nununu, la, Benjamin rɛ, wra wre ŋga wejiyirɛ kunɔ nyjɛ we na leni mbra chinɛ, mna ndru mu u ŋga swafiŋge lafɛɛ taarɛ mu ya. 23 A wra tia pra Egypt yirɛ chichiele pɔ pɔ mu taa taa bubunlɔ kɛ na, mna ndru mu shɔlɔ na paanu, na sroe bɛɛlɛ nyjɛ u lɛ we na lii mbra paan Egypt tra nu yire pɔ pɔ mu taa taa bubunlɔ chiɛlɛ kɛ na na. 24 A wra pe wa kolo mna yo mbo, “Yaa shia sɛ na tuni kolo.”
25 Pra yili Egypt na, mna sɛ pe lɛ Jacob pan Canaan tra nu. 26 Ŋga pra sɛ le kre, a pra yo pe lɛ pan mbo, “Ndoo, jaa Joseph wa na le, u n ku. Wre u Egypt tra kro le.” Jacob yiɛ nsra shɔ. Ŋgi na hin? U nsra pe shɔ mu li.