Joseph Gbɔyira Na Fun
44
Joseph na yo u sumifun wre pan mbo, “Sroe nyjɛ pie ja mbe tio le le leele pre bɔtɔe yire nu pe pan, mu pe swɛ nyjɛ ni pe pan yire le le pe bɔtɔe yire nu. 2 Mbe mu ni swafiŋge gbɔyira kre le pe ble wre bɔtɔ nu, kre na u swa kre ni.” A u sumifun wre na pe imi na Joseph na yo kre. 3 Ŋga nyiŋge na se bnimi pupu, a Joseph nyjɔɔlɔ pre na pe bubunlɔ pre wru mna to kolo. 4 Ŋga pra yili chia kre mbookrɔ to, a Joseph na yo u sumifun wre pan mbo, “Pe nyaanyaa mu leele pre kɔŋgɔ ni. Na maa sɛ pe da, pe wie na, ‘Ŋgi ki tia e sisaa tɛɛ mu chichie fɔlɔ tɔ ŋga hin? 5 Mni a e ni tafun swafiŋge gbɔyira ju hin? Kre gbɔyira ŋga ni u gboo, a kre ni u chlɛ. Kala sisaa titi e pe kre.’”6 Ŋga sumifun wre na sɛ pe da kre, a wra kee nyjɛ u tafun wre na yo yire chɔɔ yo pe pan. 7 A pra kna mbo, “Ei! O tafun, yira ŋgi kee mu yuu ŋga hin? Nyiɛ we o kisi na mu sumifɛɛnlɛ we kre kee ŋga sembremu pe. 8 Mu chin na o na ndru mu pan mu mu ŋga swɛ nyjɛ o na nya o bɔtɔe nu kree? Kena yira ŋgi kie ti mbe o swafiŋge, ndee swanyiɛ ju mu tafun katoo na hin? 9 O tafun, ndro ŋmba pan mu gbɔyira kre nya o nu, ti mbe pe ufun gbo, mbe o mblɛ oo kro pre pe mu tinlɛ.”
10 A wra kna mbo, “Ni loo, la, e ti mbe ki pe imi na e ki yo ŋga. Ŋmba pan mbe ki nya wre chiin we pe ni tnu, mba e hamblɛ pre wa gasi na.” 11 Ki tia pe kro na pe tuuro yire laa laa mu tɛɛ tra, mna yi nyu saanla. 12 Joseph sumifun wre na pe tuuro yire zaanri, wra yire pe lopom wre na, mna sɛ su pe ble wre na, mna ki nya Benjamin tuuro. 13 Fooro na Joseph nyjɔɔlɔ pre yii, a pra pe dodonyi tini mu wla peyɛ na, mna pe tuuro yire pɔ pɔ pe bubunlɔ pre na, mna ndru mu sɛ kakpɔɔ kre na.
14 Ŋga Judah na u wolo pre na sɛ le Joseph katoo wa kre, na Joseph wa katoo wa tɛ, a pra sɛ to na gbila u yiɛ. 15 A wra kna mbo, “Yira ŋgi kee e pe ŋga hin? E n chin na imi na ni nyi ŋga, mbe jaa chlɛ mbe kee ŋga e pe ŋga chin ree?”
16 A Judah na kna mbo, “Ni tafun kala ŋgi o ta mbe yo hin? Na waa ja mbe kaala mbe ki nyu. Nyiɛkpɔɔ mu sumifɛɛnlɛ sisam wɔ fimi na. Ki tia o kro we kaari mu tinlɛ, wre na ŋmba pan mu gbɔyira kre nya wre kro.”
17 A Joseph na kna mbo, “Nyiɛ we ni kisi na mbe kre kee ŋga sembremu pe! Ŋmba pan ni gbɔyira kre nya wre chiin we pe ni tnu, mbe e hamblɛ pre ndru mbe sɛ e lɛ pan na wejinyiŋge ni.”
Judah Na Tali Mu Benjamin Ŋga
18 A Judah na flo mu da Joseph na mna yo mbo, “Jande ni tafun, ni chin na pan mu nyi na ŋunu Pharaoh wi, kena ti mbe mi na ŋu kee fiɛ ŋga paara, maa shia ti mbe mu krɔkun na ni ni. 19 Ni tafun, mna da mu o wie na, ‘Oo wa lɛ, ndee chunu wa nii?’ 20 A o na yo, ‘O lɛ wre lɛ blɛlɔɔ, a oo wa na o chunu ble wa ni ŋmba o lɛ na se u blɛlɛm nyjila. A biblɔ ŋmba na pra wre pɔ wre se mu taa wre ku. A wre nunu wi u lo pɔ ŋmba u kro, a o lɛ u kori titi.’ 21 Ki tia mna yo o pan mbo, ‘E sɛ pan na u ni mbe ni u nya.’ 22 A o na yo mu pan na, ‘Pɔ wre wa jaa flo u lɛ jaara, na u yili u jaara, u lɛ wre we ku.’ 23 La, mna yo mu sumifɛɛnlɛ pan mbo, ‘Na e n shia pan na e chunu wre ni, mba e yiɛ le na.’
24 O tafun, ŋga o na ndru mu sɛ o lɛ pan wa kre, o na kee ŋga mu yo kre yo u pan. 25 A o lɛ na yo o pan na, ‘O ndru mbe paan sro chiɛri lɔ mbe sɛ.’ 26 La, o na yo, ‘Waa sɛ fio, fɔna o chunu wre ya o na. Na o chunu wre n ya o na a o sɛ blɔ wre wa o yiɛ le.’ 27 A o lɛ wre na yo o pan mbo, ‘E chin na bibilɛ shiin ni chɔ Rachel se mu ni ŋga. 28 Nunu na yili ni kɛɛ, a ndaa yo na yurɔ wra u yii mna u pile bujibuji, a mu yire kre nyjila kre nu ni u nya na. 29 Na e ndru mu ŋmba bali mu sɛ, a yaka waa sɛ u ta na, ee ti mbe ni ku ni blɛlɛm ŋga nu na fooro ni.’
30 Kena fuŋgaami ŋga, na wre na pɔ wre n ndru mu sɛ mu sumifun o lɛ wre pan, we ku. Ŋgi na hin? O lɛ wre u gbun pɔ wre kori titi. 31 Ki tia ni tafun, na o lɛ n pɔ wre nya o nu, oo ti mbe u ku u blɛlɛm nu na fooro ni. 32 A kee ŋga kii wa mu ya yi na, ndaa yo o lɛ pan na ‘Mbe ni ŋmaa tɛɛ mbe pɔ wre ndra lɔ, na ni n shia ndru mu pan na u ni, kena o lɛ ndro sisaa wi mi nyjila kro nu.’ 33 Ki tia fuŋgaami ni tafun, jande, ti mbe ni tni mu jaara pɔ wre titɛɛ, mbe pe mu tnu, mbe mu ti pɔ wre na u nyjɔɔlɔ pre ndru mbe sɛ.
34 Mni mbe pe mbe ndruu sɛ ni lɛ wre pan, na mi na pɔ wre ma hin? Mba ki ja. Maa ti mbe ni sɛ ni lɛ nya kanyana ka sembremu nu.”