3 La, Judah na yo u pan mbo, “Blɔ wre na o jaari nyibinyiɛ ni mbo, ‘Na yire na e chunu wre n shia pan, mba e yiɛ le.’ 4 Na mu ti mbe wre na o chunu wre sɛ, kena oo sɛ sro lɔ mbe paan mu ŋga. 5 La, na ma ti u sɛ naa, kena waa sɛ. Ŋgi na hin? Blɔ wre na yo o pan mbo, ‘Na yire na e chunu wre ma e pan, mba e yiɛ le.’”

6 A Israel na pe wie mbo, “Yira ŋgi kala e na cha mu ni ŋga, mna yo blɔ wre pan na ee wa na chunu ni na ŋga hin?”

7 A pra kna mbo, “Blɔ wre na o wie kaalɛɛ mu wru wre na o sele leele haa mbo, ‘E lɛɛ wa ŋmaa ni woo? A ee chunu wa ni ra?’ A o na u kawiere yire nyu wɔ, na o n chin na we yo o sɛ na o chunu ni.”

8 A Judah na yo u lɛ Israel pan mbo, “Ti mbe pɔ wre pan mbe mi na wre sɛ, na mu ti u sɛ wala, oo sɛ fuŋgaami, mbe ki ti klo wa wre na ŋu na o biile gbo. 9 Mbe mi titi ŋmaa tɛɛ mbe u ndra lɔ. Ŋga kie pan kro, ki wru mu ni tio. Na ni n shia ndru mu pan na u ni mu le mu kɛɛ, kena mu leesaa wi mi nyjila kro nu. 10 Ŋga o kro mu yire na nyjila klai ŋga, kaa o sɛ mu pan, mu ndru mu sɛ shiinwo mu pan.”

11 A pe lɛ wre na yo pe pan mbo, “Na pan ki nyi rɛ, kena e sɛ na tra ŋga yirɛ chichiele yɛ ni e sɛ lopom wre ŋga. E tuwe ndiom tɛɛn nyini nyini wru chɛchiɛri, na srɛ chiɛri, na tlade na kroboo chiɛri, na boŋgrɛ chiɛri, na ndɛmbie chiɛri wru e sɛ u kɛ. 12 E Swɛ wru mbe yi da na nyjɛ ni e na sɛ jle kre ni ma gbee shiin. Ŋgi na hin? Ki fna e swɛ nyjɛ e na nya e bɔtɔe nu yire ndro mbe blɔ wre ŋga. Aada punu wra punu. 13 Fuŋga rɛ, e sɛ na e chunu wre ni. 14 Jaŋgafun Nyiɛkpɔɔ wre u ti mbe blɔ wre sɛ e fooro chin, mbe ti e ndruu pan na Benjamin, na e chunu wre ni. Na mbe biile la o, kena laa mbe pe la, e sɛ na u ni.”

15 A pra Benjamin wru mu ya yirɛ nyjɛ pie sɛ blɔ wre kɛ yire na, mna swa wru a kra da na ŋga ni pra sɛ jle kre ma gbee shiin to, mna to Egypt kolo. Ŋga pra sɛ le kre, a pra sɛ peyɛ wɔ mu Joseph nyina. 16 Ŋga Joseph na Benjamin nya pe nu kre, a wra yo u sumifun ŋmba wraa wa u katoo wa wre pan mbo, “Sɛ na bilɛ mblɛ ni ni katoo wa, mu yurɔ gbo mu sro pe. Mi na pre oo chaa mbe li lafo ŋga na.” 17 A sumifun wre na pe wru mna sɛ Joseph katoo wa.

18 Nyjila ŋga nu praa lee katoo wa kre, fiɛrɛ na pe yii, a praa jawa mbo, “O swɛ nyjɛ pra le o pan bɔtɔe nu jle kre na pe paan na o ni lawee ŋga nu kre. O chin na we o yii mbe o bubunlɔ mblɛ shɔ, mbe o pe u tinlɛ.” 19 Ki tia katoo kre salegu krɔ kre nyu na wa pra yire, mna yo sumifun wre pan mbo, 20 “Ndoo kafra, o na pan mna jle mna sro lɔ. 21 La, ŋga o na da lawee ŋga nu yila na kɔ mbe o ŋunu wa kre, o na o bɔtɔe nyu saanla mna nya na swɛ nyjɛ ni o yirɛ lɔ yiree wa o tuuro yire nu. Ki tia o ndru mu pan na yi ni. 22 O n chin ndro ŋmba wra ndru mu yi le le o bɔtɔe yire nu. A o pan na swɛ fɔnyi ni mbe paan sro lɔ na.”

23 A sumifun wre na kna mbo, “Yaa ti mbe fiɛrɛ e yii. E Nyiɛkpɔɔ ŋmba wi e lɛ Nyiɛkpɔɔ wre wra ndru mu swɛ yire le le e bɔtɔe yire nu. Mi rɛ, e na fɔlɔ tɔ mu ni ŋga.” A sumifun wre na sɛ Simeon wɔ mu pan mu pe ŋga.

24 Sumifun wre na le na pe ni katoo wa, mna pe ŋga nyumu a pra pe jeelee je, mna pe bubunlɔ pre ŋga sro. 25 A pra pe yirɛ nyjɛ pie Joseph kɛ yire wɔ mu tɛɛ na u sri. Ŋgi na hin? Na pe loo na wre na pre pie chaa mbe li lafo kre na. 26 Ŋga Joseph na pan katoo kre, pra yirɛ nyjɛ pie u kɛ yire wru mna u ŋga, mna to mu yiɛ juule juule tra u yiɛ. 27 Wra pe wie imi na pe nyi, mna yo mbo, “E lɛ blɛlɔɔ ŋmba kee e na yo ni pan kre, mni u nyi hin? Uu wa ŋmaa ni tɛɛ?”

28 A pra kna mbo, “Mu sumifun o lɛ wree wa, a uu gbaŋmba.” A pra lɛɛlɛ mu ndra soo u yiɛ.

29 Ŋga Joseph na u lo pɔ Benjamin nya kre, a wra pe wie mbo, “Kena e chunu ŋmba kee e na yo ni pan wre wi ŋmbaa?” A wra ndru mu yo mbo, “Ni pɔ, Nyiɛkpɔɔ u mu dwan.” 30 Joseph na flo u chunu wre jaara nyaanyaa. Ŋgi na hin? U chunu wre fooro na u yii kpɔɔ, a u yotunyi na chaa wo, ki tia wra sɛ le u nyuŋgo mna nyɛni chichie. 31 Ŋga wra yiɛ je mu kɔ kre, a wra yili fimi na, mna uyɛ yii mna yo mbo, “E pan na sro ni mbe o li.” 32 Pra pan mu Joseph sro taa tebru ka na kiyɛ, mna u nyjɔɔlɔ pre sro taa tebru ka na yiyɛ, mna Egypt leele mblɛ pra wa wa pre sroe taa tebru ka na yiyɛ na. Ŋgi na hin? Hebrew leele sro pe afuŋgo yira mu Egypt leele ŋga. 33 Joseph na tia pra tni tni lopom lopom mu yiɛ kan u na, pra tni mu yire pe lopom na mna sɛ su pe ble wre na, a kra pe pe kawako ni, a pra kna na peyɛ yiɛ le. 34 Sroe nyjɛ yiraa wa Joseph tebru na yire yɛ pra pe ŋga, Benjamin sro na kpɔɔ mu wɛ hamblɛ pre wee na ma gbee kunɔ, a pe kro na yɛshɔɔrɔ tɛɛ mna li, mna simi gbɔ.