6 Ŋga Joseph wra pe Egypt tra kre lopom ŋmba u taa shiinwo ŋunu wre na, mnaa shɔlɔ prɛ ndro kro pan kre ndra na, ŋga pra da u na kre, a pra to mu yiɛ juule tra u yiɛ. 7 Ŋga Joseph na u nyjɔɔlɔ pre nya kre, wra pe chin titɛɛ kre nu, la, wra yiɛ wɔ pe na na u n pe chin, mna pe wie pɔɔrɔ ni mbo, “Sena e yiri hin?” A pra kna mbo, “Canaan tra nu o yiri mu pan sro lɔ haa.”

8 Joseph na u nyjɔɔlɔ pre chin, la, pre nsra u chin. 9 Bawa wra ŋunɛ nyjɛ wra ŋunu na pe ni yire sɔɔnri, mna kna mu yo pe pan mbo, “O waŋgra ŋga e pan mbe ju mbe le, mbe chin mna ee yire mbe paan o tɔ.”

10 A pra kna mbo, “O tafun, pan ma ki nyi. Sro lɔ haa mu sumifɛɛnlɛ pan. 11 Ndro nunu biile lɛ wre, a mu sumifɛɛnlɛ kprafɛɛnlɛ lɛ wre. Waŋgra kre ma o pan mbe ju mbe le.”

12 A Joseph na kna mbo, “E fni! Kolo ŋga na ee tro mbe o ta mbe tɔ waŋgra ŋga nu, kre e chaa.” 13 La, pra kna mbo, “Mu sumifɛɛnlɛ, o naa bibilɛ kɛmbɔshiin, a ndro nunu biile lɛ wre Canaan tra nu. Ndro nunu na ku o nu, a fiɛn wre wa o lɛ jaara fuŋgaami.”

14 A Joseph na kna mbo, “Imi na ni yo kre, kpra yi. Tra ŋga e paan mbe ju mbe le. 15 Kolo ŋga na mbe yire mbe chin na kee ŋga e yuu ŋga pe kpra yi kre. Ni tolɛɛ Pharaoh da na yaa yili chia ŋga na mbe sɛ su na e chunu fiɛn wre we pan. 16 E wa u ndru mbe sɛ pan na u ni. Mbe e hamblɛ pre le nyuŋgo mbe sɛ su na mbe kpra ŋga kii wa kala ŋga e yo kre nu nya. Na ki waa pan na e n ja mu pan na e chunu wre ni, kena ni tolɛɛ Pharaoh da na, tra ŋga e paan mbe ju mbe le.” 17 Wra yire kre kee ŋga na mna pe kro le nyuŋgo ble taarɛ.

18 Ble taarɛ ble kre na, Joseph na yo pe pan mbo, “Mi rɛ, ni pe Nyiɛkpɔɔ fiɛ fun, a kee nunu ka na mbe jaa yire mbe e ŋmaa ta. 19 Na kprafɛɛnlɛ lɛ yire wala, kena e ti mbe e wa kro nyuŋgo mna, mbe hamblɛ pre sɛ na sro nyjɛ e pan mu lɔ yire ni e chia, mbe sɛ e leele mblɛ klo kuu pre ŋga. 20 La, e pan na e chunu wre ni e ni ŋga. Na e pe ma, kre kie nyina na e kpra li, a yaa ku na.” A pra ki nɔɔloo. 21 A pra kna mna yo pe yɛ pan mbo, “Kpra na, kala ŋga o na taa o chunu wre na kre ki tia o na kala nyaa imi kre. O na u kanyana ŋga nu wra nyi nya, a wra o tali mbe o u wa, a o na je. Kre ki tia o na kala nyaa aŋga kre.”

22 A Reuben na kna mbo, “Ni nsra yo e pan na yaa shia sisaa ka pe pɔ ŋmba naa? La, e nsra li ki na. Fuŋgaami u kumu kre fɔtɔɔrɔ o taa kre.” 23 Pe nsra chin na yolo nyjɛ pe yuu kre Joseph yi ndru, ŋga ndro wraa shio na yuu pe pan kre ndra na. 24 Joseph na pe ti wa mna sɛ nyɛni lawee ka nu. La, wra ndru mu pan mu paara na pe ni na, mna tia pra Simeon yii mna u pɔ na mɛnyi ni pe yiɛ na wa.

25 Joseph na tia pra shɔlɔ le u nyjɔɔlɔ bɔtɔe yire nu a yira nyi nyi, mna tia pra pe swɛ yire le le pe bɔtɔe yire nu, mna pe ŋga sroe nyjɛ pie li kolo. 26 U nyjɔɔlɔ pre na pe tuuro yire pɔ pɔ mu taa pe bubunlɔ na, mna yili chia kre na. 27 Ŋga pra sɛ da lawee ŋga nu pie ŋunu kre, pe wa na u bɔtɔ nyu saan mbe shɔlɔ wɔ mbe u bubnɔ ŋga to, mna u swa ŋga ni wra sɛ sro lɔ kre nya na kii wa mu taa shɔlɔ yire na. 28 A wra kna mbo, “Wolo, pe ndru mu ni swa kre le ni bɔtɔ kre nu. Kre yi kre.” Ŋga pra swa kre nya kre, gbun na yɔ pe na, a pra yire na seeri, mna kna na yuu mbo, “A kala ŋgi Nyiɛkpɔɔ pe o na ŋga hin?”

29 Ŋga pra sɛ le Canaan tra nu pe lɛ Jacob pan wa kre, pra kala ŋga pra nya kro bɔ u pan. A pra yo mbo, 30 “Egypt tra lopom ŋmba u taa ŋunu wre na shiinwo wre krɔ na kun na o ni, a wra paara o pan krɔ ni, mna yo o pan na o sɛ tra kre ju mu le. 31 La, o na yo u pan na tra ma o sɛ ju mbe le, leele chichiele lɛ wre, 32 a o naa lɛbiile bibilɛ kɛmbɔshiin, a nunu ku o nu, a ble titi wree wa o lɛ jaara Canaan na. 33 A tra kre lopom wre na yo mbo, ‘Ŋga kie ti ni chin na kprafɛɛnlɛ lɛ yire yi na, e wa we kro ni pan mna, mbe e hamblɛ sɛ na sro nyjɛ e ta yire ni mbe sɛ e leele mblɛ klo kuu pre ŋga. 34 La, e pan na e chunu wre ni e ni ŋga. Na e pe ma, kre kie ti ni chin na waŋgra kre ma e paan mbe ju mbe le, la, kprafɛɛnlɛ lɛ yire, a mbe ndru mbe e chunu wre wru mbe e ŋga, na e chaa ee jaa na paan mbra jafa lii mna.’”

35 Ŋga pra pe bɔtɔe yire nyu saanla, mna shɔlɔ yire kna na woni kre, pe kro na nya na swɛ nyjɛ ni pe sɛ shɔlɔ lɔ yiree wa pe bɔtɔe yire nu. Ŋga pre na pe lɛ na ki nya ma kre fiɛrɛ na pe yii. 36 A pe lɛ Jacob na kna mu yo pe pan mbo, “E tia ni biile yili ni kɛɛ. Joseph sɛ, a Simeon sɛ, a fuŋgaami Benjamin ni e chaa mbe sɛ kre. Kena mi mbe na kala nyaa.” 37 A Reuben na yo u lɛ pan mbo, “Na ni n shia ndru mu pan na Benjamin ni mu mu ŋga, mu jaa ni biile shiin pre gbo. U le ni kɛɛ rɛ! Mbe ndru mbe pan na u ni mbe mu ŋga.”

38 La, Jacob na yo mbo, “Mba ti mbe ni pɔ ŋmba taa e na mbe sɛ wa, Joseph ku, a Benjamin u kro ni jaara, na kala ka waa u ta kolo ŋga e kuun ŋga nu, ee ti mbe ni ku ni blɛlɛm ŋga nu fooro ni.”