2
Imi Nyiɛkpɔɔ na nyjeeri, na tra, na yirɛ nyjɛ yii wa ki nu kro gbeele yi kre. 2 Nyiɛkpɔɔ na wuu ble kɔɔnashin ble kre na. Ŋgi na hin? Na u yirɛ kro pe mu kɔ. 3 A Nyiɛkpɔɔ na ble kɔɔnashin ble kre dwan, mna ki pe cheche. Ŋgi na hin? Na u yirɛ kro gbeele mu kɔ, mna wuu.4 Kena imi Nyiɛkpɔɔ na waŋgra ŋga na yirɛ nyjɛ yii wa ki nu gbeele yi kre.
Eden Tra Kre Kee
Ŋga o Tafun Nyiɛkpɔɔ na nyjeeri na tra gbeele kre, 5 na tinyi n wa, a yaka n fin tra yiɛ na tun. Ŋgi na hin? Na u n tia nyiɛ pan tun. A na ndro n wa mbe tra kre fali. 6 La, nyumu naa blo na yilii tra mbe ki ti tra yiɛ nyjii.
7 A Nyiɛkpɔɔ na pooro kun mna ki tɛɛ mu lewo faanri, mu ŋmaa ŋumu ŋu mna le u maweele, a wra ŋmaa ta. 8 A Nyiɛkpɔɔ na yirɛ luu Eden tra kre yila finhaa wa, bawa wra lewo ŋmba wra faanri wre tɛɛ.
Sisampee
9 Wra tia tinyi chichiele nyini nyini na fin wa, a yi sɛnyi na nyu, mu pe niŋge ni, mbe jaa li. Lawee kre lalaa wa, bawa wra tia tiŋge ŋga kraa lewo kaan ŋmaa, na tiŋge ŋga ki tii mbe lewo chichie na sisam chin yire na fin.
10 Lɔɔ ka naa fuu na tro Eden tra kre lalaa, mnaa lawee kre nyiŋgei. Mu yire Eden na wa na shie, lɔɔ kre na yɔɔlɛ mu pe lɔɛ jijirɛ. 11 Lɔɔ ŋga ki yiɛklu kre mɛɛ yi Pishon, kre ki fuu mu Havilah waŋgra ŋga nu swanyiɛ titi nyi kre fɛ mu kun. 12 Swanyiɛ titi, na tlade ŋga pe yeeri bdellium, na dnɛ nyjɛ pe yeeri onyx yiree wa wa. 13 Lɔɔ shiinwo kre mɛɛ yi Gihon, kre ki fuu mu Cush waŋgra fɛ mu kun. 14 Lɔɔ taarɛwo kre mɛɛ yi Tigris, kre ki fuu na shie Assyria yila finhaa, a lɔɔ jijirɛwo kre mɛɛ yi Euphrates.
15 Nyiɛkpɔɔ na sɛ lewo tɛɛ Eden tra kre nu mbe wra fali, mbe pe ki lefun. 16 A wra yo u pan mbo, “Mu jaa na tinyi yire kro sɛnyi lii, 17 fɔna tiŋge ŋga ki ndro kaan kachindɛ, mbe ti u chichie na sisam chin kre. Maa shia kre tiŋge kre sɛŋgɛ ka li, ki ble ŋga mu ka li, ki ble kre lamu, mu ku.”
18 A o Tafun Nyiɛkpɔɔ na yo mbo, “Ki n nyu na lewo wre nunu chom we tni ma. Mbe yafun ŋmba u fna na u ni gbeele mbe u ŋga.” 19 Ŋga o Tafun Nyiɛkpɔɔ na pooro tɛɛ mna yurɛ, na hanyiɛlɛ kro gbeele mu kɔ kre, a wra pan na pe ni lewo wre pan na u pe mɛɛ tɛɛ, pan kra pe a yurɛ kro pe mɛɛ ta ka. 20 Ki tia lewo wre na hanyiɛlɛ, na yurɛ kro kro mɛɛ tɛɛ, la, pe wa nsraa wa mbe jaa ya lewo na. 21-22 A o Tafun Nyiɛkpɔɔ na tia lewo na sni mna ŋunu mu tro. Nyjila ŋga wraa ŋunu kre, Nyiɛkpɔɔ na u kotikaan nunu wɔ, mna ndru mu ki lawee wulɔ mu tɔ. Wra chlɔ gbeele na kotikaan kre ni mna blɔ wre ŋga.
23 A blɔ wre na yo mbo,
“Fuŋga rɛ,
ni ni ŋmbrɔ ta.
Mi titi kajle,
na ni wejikaara kokoo ka wi.
U mɛɛ yi chlɔ.
Ŋgi na hin?
Blɔ nu u yili.”
24 Kre ki tia mbe blɔ laa u lɛ na u lo na, mbe sɛ mbra u chɔ na, mbe pe pe wejikaara nunu kre.
25 Blɔ wre, na u chɔ wre naa tro wejiwaara, ande ki nsra pe pe nyifɛɛrɛ.