Lewo Ndikana Pee
3
Wɔɔ na pe yurɔ ŋmba yiɛ kra kun yurɛ mblɛ o Tafun Nyiɛkpɔɔ na gbeele pre kro nu. Wɔɔ wre na chlɔ wre wie mbo, “Kena yɛŋgɛ titi Nyiɛkpɔɔ na yo na yaashia lawee ŋga tinyi nyjɛ ka sɛŋgɛ li ŋgaa?”2 A chlɔ wre na yo mbo, “Oo jaa tinyi nyjɛ yii wa mna kro sɛnyi li, 3 fɔna tiŋge ŋga ki yire lalaa wa ŋga. Nyiɛkpɔɔ na yo o pan na waa shia kre tiŋge kre sɛŋgɛ ka li, a waa shia kɛ taa ki na. Mbo na o kɛ taa ki na, oo ku.”
4 A wɔɔ wre na kna mbo, “Kpra ma, ki n pe na kuu ee ku, yaa ku. 5 Nyiɛkpɔɔ ki yo ma, ŋgi na hin? U chin na na e ki li, e nyiɛlɛ we nyaa, mbe e kala chin mbe pe na wre Nyiɛkpɔɔ wi, mbe chichie na sisaa chin.”
6 Chlɔ wre na yiɛ wa mna tiŋge kre sɛŋgɛ le, mna nya imi na ki nyu mu pe niŋge ni mu da, na imi kie ti mbe u kala chin mbe ya. Ki tia wra ki sɛŋgɛ ka kun mna li, na u plɔɔ wa wa, a wra u ŋga ka a wra li na. 7 Ŋga pra ki li mna kɔ to, titɛɛ kre nu, a pe nyiɛlɛ na nyaa, a pra nya na wejiwaara pe tro. Ki tia pra fig tiŋge wrɛ fra fra, mna pe fɛɛrɛ tɔ.
8 Ki ble kre yilakɔŋgɔ, Nyiɛkpɔɔ na pan na nyaari na tro lawee kre nu wa, a pra ki loo mna fɛ mu sɛ ndra tinyi yire ndoolo. 9 La, o Tafun Nyiɛkpɔɔ na blɔ wre yeeri mbo, “Adam, sena mu nyi hin?”
10 A wra kna mbo, “Ŋga ni mu gbrakun kre, fiɛrɛ ni yii, a ni fɛ mu ndra mu na. Ŋgi na hin? Ni nya na ni tro wejiwaara.”
11 A Nyiɛkpɔɔ na u wie mbo, “Ŋmbi u yo mu pan na wejiwaara mu tro hin? Tiŋge sɛŋgɛ ŋga ndaa yo maa shia li kre, mu ka li ree?”
12 A wra yo mbo, “Chlɔ ŋmba mu ni ŋga wre u ni ŋga ka a ni li.”
13 A o Tafun Nyiɛkpɔɔ na chlɔ wre wie mbo, “Mni a mu pe ma hin?” A chlɔ wre na kna mbo, “Wɔɔ wre u ni fana mu tia ni ka li.”
Nyiɛkpɔɔ Suŋgɔ
14 A o Tafun Nyiɛkpɔɔ na yo wɔɔ wre pan mbo,
“Mbe mu ndie tini kala
ŋga mu pe ŋga na.
Yurɛ kro nu, ŋu nunu chom wo
yi kre suŋgɔ ŋga.
Mu yire aŋga na shie,
lɛɛ na mu na fulo,
mbra tra kaa mbe sɛ
su mu kumu ble.
15 Mbe loŋgooro le,
ŋu na chlɔ wre lalaa,
mbe mu nanae,
na chlɔ wre nanae,
peyɛ yii loŋgo,
nyjila kro nu.
Chlɔ wre nana,
we mu ndra gbun mbe ja,
mbe mu u nu yeŋmbele na.”
16 A wra yo chlɔ wre pan mbo,
“Mbe ka ya mu kanyana na,
mu siire ta nyjila,
na mu seble.
Nyjɛ krɛrɛ kɔkro ni,
mu plɔ la we mu ta,
a we jaŋga ta mu na.”
17 A wra yo Adam pan mbo, “Ŋga mu mu chɔ nyu kee loo, mu tiŋge sɛŋgɛ ŋga ndaa yo maa shia li kre ka li kre ndra na, mbe ti mu kala nya. Kee ŋga mu pe kre ndra na, ni tra sun.
A mu tnimu nu,
tnumu kpakpaa tun,
mbe chin mbe yaka ta mbe ka,
mbe sɛ su mu kumu ble.
18 A wuuro na nyaa,
we fin tra yiɛ na,
a nyaa tinyi sɛnyi mu na kaa,
19 Mu kafue kun mbe wa,
mbe chin mbe yaka ta mbe ka,
mbe sɛ su na mu ndruu sɛ
pooro ŋga ni ndaa mu faanri kre nu.
Pooro ni ndaa mu faanri,
a kre nu mu ndruu sɛ na.”
20 Adam na u chɔ wre mɛɛ tɛɛ Eve. Ŋgi na hin? Na wre we pe leele kro lo. 21 A o Tafun Nyiɛkpɔɔ na yurɛ hlɛ tɛɛ mna yonyi pe mna Adam na u chɔ Eve tɔ tɔ.
Nyiɛkpɔɔ Adam Na Eve Ni Eden Tra Kre Nu
22 A o Tafun Nyiɛkpɔɔ na yo mbo, “Fuŋga rɛ, leele pre pan mu pe na wre lɛ, pe chichie na sisam kro chin. Kena ki n fna pe ŋmaa tiŋge kre sɛŋgɛ ka li, na kre ma, pie tni mbe pia ku na.” 23 Ki tia o Tafun Nyiɛkpɔɔ na pe ni mu yili Eden tra kre nu, mna yo Adam pan na u sɛ mbra tra ŋga ka ni u u faanri kre fali mbra lii. 24 Ŋga Nyiɛkpɔɔ na pe ni wa mu kɔ kre, a wra tia nyjeeri bitumblɔ mblɛ pe yeeri Cherubim naa lawee kre sri ki yila finhaa wa. A wra tia brɔfiɛn yiɛ shiin ka naa nyini kanhun na shie, na paan lawee kre nu, mbe ndro wa jaa tro mbe sɛ ŋmaa tiŋge kre sɛŋgɛ ka li na.