Cain Na Abel
4
Adam na sni na u chɔ Eve ni, a wra siire ta, mna biblɔ se, mna yo mbo, “Nyiɛkpɔɔ ya ni na, a ni biblɔ se.” A wra u mɛɛ tɛɛ Cain. 2 Mbakɔ, wra biblɔ se na, mna wre mɛɛ tɛɛ Abel. Abel na pe mbaala lefun, a Cain na pe falifun. 3 Ki ble ka, Cain na u see yirɛ yire yɛ tɛɛ mna sra wɔ mu Nyiɛkpɔɔ ŋga.4 A Abel na u mbaala pre wa pɔ jlo wɔ, mna u gbo, mna u katɛɛn nyjɛ nu nyina nyi yire wɔ mna yi tɛɛ mu sra wɔ na. Nyiɛkpɔɔ yiɛ na shɔ Abel, na u sra ŋga wra wɔ kre na, 5 la, Cain na u sra ŋga wra wɔ kre rɛ, wra ki je. Kra tia Cain krɔ na kun titi, a wra yiɛ san. 6 A Nyiɛkpɔɔ na Cain wie mbo, “Yira ŋgi ki mu krɔkun, a mu yiɛ san ma hin? 7 Na chichie mna pe, kaa mu yiɛ wra shɔ. La, ŋga mu sisaa pe kre ndra na, sisam sɛ pe na yurɔ ŋmba u nyaa wi na mu chaa mbe yii, la, gbeŋmba mu wi mu mu yɛ shɔ.”
8 A Cain na yo u chunu Abel pan mbo, “Pan mbe o sɛ nyaa.” Ŋga pra sɛ da wa kre, a wra u chunu wre gbun mu gbo. 9 A Nyiɛkpɔɔ na Cain wie mbo, “Sena mu chunu Abel nyi hin?” A wra kna mbo, “Ni n chin. Mi wi u lefun ra?”
10 A Nyiɛkpɔɔ na yo mbo, “Yira ŋgi kee sisaa mu pe ŋga hin? Mu chunu nyimi nyjɛ mu kna mu wo tra kre ni yeeri. 11 Ŋga mu mu chunu gbo mu u nyimi wo tra, a ki u nyimi gbɔ kre ndra na, suŋgɔɔ wa mu na. 12 Ki tia na mu yirɛ luu, tra kre wa yaka nyu mu pan na. A kila mu na kila mbra tro, ma titɛɛ ta mbe tni.”
13 A Cain na yo Nyiɛkpɔɔ pan mbo, “Kre ndie tiniɛ ŋga nyini wɛ ni na titi, mba ki ja. 14 Fuŋgaami, mu ni nini tra ŋga nu, a mba mu nya na, kena kila mbe na kila mbra tro, mba titɛɛ ta mbe tni. A ndro ŋmba we ni nya kro gboo we ni gbo.”
15 La, Nyiɛkpɔɔ na yo mbo, “Pan ma ki nyi, ndro ŋmba we mu gbo kpan, ufun ndie tiniɛ we da na mu wo ŋga ni gbee kɔɔnashin.” Ki tia Nyiɛkpɔɔ na Cain tnɔ imi kie pe na ndro u fni, mbe wa u gbo. 16 Ki tia Cain na yili o Tafun Nyiɛkpɔɔ yiɛ mna sɛ tni tra ŋga praa yeeri Nod na. Tra kre naa wa Eden tra kre yila fin haa.
Cain Nɔɔ Leele
17 Cain na u chɔ, na biblɔ se mna u mɛɛ tɛɛ Enoch. A Cain na kakpɔɔ ka kun mna u pɔ wre mɛɛ taa ki na. 18 Enoch na biblɔ se mna u mɛɛ tɛɛ Irad, wre na wi Mehujael lɛ, a Mehujael na biblɔ se mna u mɛɛ tɛɛ Methushael, wre na wi Lamech lɛ. 19 Lamech chiɛlɛ naa shiin, pre na lɛ Adah, na Zillah. 20 Adah wra Jabal se, a Jabal biile na lɛ leele mblɛ praa yurɛ poorii, na sni yonyi nyinyi nu kre. 21 Jabal chunu na wi Jubal, wre wi mɛkɔmblɔ kro lɛ ŋmba wraa juru gbuun, na bnɔ foo kre. 22 Zillah wra Tubal-Cain ŋmba wra pe tutuŋu wre se. Wre wraa yirɛ nyini nyini gbeele na tɔɔnrɔ, na swanyiɛ fre ni. Tubal-Cain jaa na wi Naamah.
23 Lamech na yo u chiɛlɛ pan mbo,
“Adah, na Zillah e loo ni pan.
Ndro ni gbun yira ni mu pra,
a ni u gbo.
24 Kena na Cain we u ndro gboo
kre fɔtɔɔrɔ ta gbee kɔɔnashin,
kena mi Lamech we ndie tiniɛ,
fɔtɔɔrɔ ta,
gbee fuloe taarɛ,
na kɛmbɔkɔɔnashin.”
Seth Na Enosh