2 A ndro wa na sɛ yo Jericho ŋunu pan mbo, “Tolɛɛ, Israel leele pre plɛ ju mu le chia ŋga na blee ŋga, mbe paan o tra kre ju mbe le.” 3 A Jericho ŋunu wre na leele tun Rahab pan na, “Ni loo na leele plɛ pan mu tuu mu pan mu katoo mna, pe wɔ mu pan na pe ni, ŋgi na hin? O tra kre pe paan mbe ju mbe le.”

4 Kre nyjila kre, na chlɔ wre bilɛ shiin pre wru mu sɛ ndra. Ki tia wra na yo pe pan mbo, “Yɛŋgɛ yi, leele pre na le ni pan mna, a ni n pe yiri haa chin. 5 Ŋga ndram naa koo, a praa paan mbe chia jlonwee krɔ tɔ kre, kre pra yili, ni n chin kolo ŋga pe yii, e pe kɔŋgɔ ni nyaanyaa, ee pe yii kolo.” 6 Kre nyjila kre, na chlɔ wre klu mu nduu na bilɛ shiin pre ni lahoo ndra na, mu sɛ pe ndra kɛɛn bɛɛlɛ nyjɛ wra kun mu taa lahoo na mbe yi yuwa yire nu. 7 A ŋunu bitumblɔ pre na Jordan lɔɔ kolo yii, mna leele pre kɔŋgɔ ni mna sɛ da lɔɔ kre kun haa, ŋga pra yili chia kre na to, a pra chia kre jlonwee krɔ kre tɔ.

8 Bilɛ shiin pre nsra ta mu sni, a chlɔ wre na nduu pe kro lahoo kre ndra na, 9 mna sɛ yo pe pan mbo, “Ni chin na e Tafun Nyiɛkpɔɔ tra ŋga le e kɛɛ, a ki tia e fiɛrɛ o yii, a tra ŋga leele kro na seeri. 10 Ŋga e na yili Egypt tra nu kre, o na loo imi na e Tafun Nyiɛkpɔɔ na tia epo nyiɛ kre na yua e yiɛ, a e na tro. Na imi e na Sihon, na Og, Amora ŋulo shiin pre praa wa Jordan lɔɔ kro, na shie yila finhaa tra nu pre gbo. 11 Ŋga o na kre kee ŋga loo kre, gbun na yɔ o na, a o dankna kro na kɔ, ŋgi na hin? O chin na e Tafun Nyiɛkpɔɔ wre wi nyjeeri na tra tafun. 12 Kena fuŋgaami, e jande, e e Tafun wre mɛɛ tɛɛ e da e ni ŋga, na chichie ŋga ni e pe ŋga kre ndra na, ee mi na ni sele kro fooro chin, mbe ni ŋga dansiɛrɛ yira ka, 13 mbe ki nyina na, na e waa le mna, yaa ni lɛ, na ni lo, na pe biile kro, yaa o wa gbo.”

14 A bilɛ shiin pre na kna mbo, “Na yaka waa e wa ta, o Tafun Nyiɛkpɔɔ u o gbo. Na mu n shia kee ŋga o paan mbe pe ŋga yo ndro pan, a ki waa pan na o Tafun Nyiɛkpɔɔ tra ŋga le o kɛɛ kre, oo kpra li, mbe nyu mu na.”

15-16 Rahab na u nyuŋgo sin mu chaa chia kre mboo ŋga pra sin mu ki fɛ mu kun kre nu, a wra maŋa cha mu leele pre tre nyuŋgo kre vromboo nu, mbe pe sɛ, a ki tia wra yo pe pan mbo, “Na e waa yili na shie, e sɛ nyambie yire nu, mbe ki ti mblɛ pe e kɔŋgɔ ni ni pre wa e nya. E sɛ ndra wa ble taarɛ, mbe sɛ su na mblɛ pe e chaa pre we ndru pe kro tun, mbe e chiin sɛ e kolo na.”

17 Ŋga Rahab na yo pe pan ma kre, a bilɛ pre na kna mna yo u pan mbo, “Daŋga ŋga mu tia o da ŋga, waa to ki nu. 18 Kena maŋa nyiɛ ŋga shɔ, na o waa na paan tra ŋga nu, ki pɔ vromboo ŋga nu mu o tre tra ŋga nyu na. Mu mu lɛ, na mu lo, na pe sele leele pre kro ble mu katoo mna. 19 Ŋmba we yili mbe sɛ na kila lete na, kena wre fun u u kumu cha, wre wa ki pimi shɔ mbe tio, la, na ndro waa kɛ taa leele mblɛ pee wa mu katoo lam wa kre wa na, kena u mapinii wa o na. 20 A na maa kee ŋga o paan mbe pe ŋga bɔ ndro pan kre, kena o danyi yire n o pɔ na.”

21 A Rahab na kna mbo, “Ni loo, la, e ti mbe ki pe imi e ki yo ŋga.” A wra pe wa kolo a pra sɛ. A wra maŋa nyiɛ kre pɔ tokro kre nyu na.

22 Ŋga bilɛ pre na yili wa kre, a pra sɛ ndra nyambie yire ndra na ble nununu taarɛ, mna sɛ su na, mblɛ praa pe chaa pre na sɛ tro koelee yire kro na, mna pe cha mu la, mna ndru mu sɛ katoo. 23 A bilɛ shiin pre na chin mna tii nyambie yire na, mna lɔɔ kun mna sɛ Nun pɔ Joshua wre pan, mna sɛ kee ŋga kra pe da wa kro bɔ u pan. 24 Pra yo Joshua pan mbo, “Kpra na, o Tafun Nyiɛkpɔɔ tra kre kro wru mu le o kɛɛ. O ndra na, fiɛrɛ leele pre kro yii pra seeri poŋgo.”