Pra Jordan Lɔɔ Kre Kun
3
Ŋga nyiŋge na se bnimi pupu kre, Joshua na Israel leele pre kro na yili Shittim na mna sɛ Jordan lɔɔ kre nyu na. Pra tni wa ble chiɛri, mna chin mu lɔɔ kre kun. 2 Ble taarɛ kɔkro kre, pe loplombo mblɛ praa wa pe nyu na pre na kila pe tnihɛɛ yire nu mna yo pe pan mbo, 3 “Na e waa o Tafun Nyiɛkpɔɔ Nyu Nunu Daka kre nya, a srawɔfɛɛnlɛ pre ki tio na shie kre, e yiri e e yirɛ kro tio, e taa pe kro. 4 Na e n da mu tro mna tun, kena na e taa pe kro, pie e nyina kolo ŋga na ee tro, la, e lalaa wa daka kre pan mbe pe kɔnsni yɔɔ, yaa shia da ki na.”5 A Joshua na yo pe pan mbo, “e eyɛ pe cheche, ŋgi na hin? Baŋga Nyiɛkpɔɔ we kawako kee pe e nu.”
6 A Joshua na kna mu yo srawɔfɛɛnlɛ pre pan mbo, “E Nyu Nunu Daka kre wru e yiɛklu,” a pra ki wru mna yiɛklu leele pre pan.
7 A o Tafun Nyiɛkpɔɔ wre na yo Joshua pan mbo, “Aŋga mbe mu kpɔɔ Israel leele pre kro yiɛ na, mbe ki ti pe chin na nii wa mu kro, imi na ndaa wa Moses kro kre. 8 Yo srawɔfɛɛnlɛ mblɛ pe daka kre tio pre pan na, na e waa da Jordan lɔɔ kre na, pe tii ki nu.”
9 A Joshua na yo Israel leele pre pan mbo, “E pan e kee ŋga o Tafun Nyiɛkpɔɔ wre yo loo. 10 Kee ŋga kie pe ŋga na ee yire mbe chin na o Tafun Nyiɛkpɔɔ ŋmba wraa ku wree wa e lalaa, a we Canaan leele, Hittite leele, na Hivite leele, na Perizzite leele, na Girgash leele, na Amora leele, na Jebusite leele, pre kro ni mbe flo yiɛ. 11 E le, waŋgra kro Tafun wre Nyu Nunu Daka kre we yiɛklu e pan mbe le Jordan lɔɔ kre nu. 12 Kena e bilɛ kɛmbɔshiin wɔ Israel sele kɛmbɔshiin yire kro nu e ni ŋga.” 13 Kena na srawɔfɛɛnlɛ mblɛ pe waŋgra kro Tafun Nyu Nunu Daka kre tio kre waa jele kan Jordan lɔɔ kre nu to, lɔɔ kre we peeri mbe ki tapan haa kre flo mbe sɛ, mbe ki nyjeeri haa kre yire titɛɛ.
14 Srawɔfɛɛnlɛ pre na Nyu Nunu Daka kre wru mna yiɛklu, a leele pre na yiri mna pe yirɛ kro wru mu taa. 15 Kre nyjila kre na sro fɔnyi lee, a kre nyjila kre nu lɔɔ kre naa nyini yɛlɛ nyini, nde ŋga srawɔfɛɛnlɛ mblɛ pra Nyu Nunu Daka kre tio pre jeelee na le lɔɔ kre nu to, 16 a kra peeri, a nyumu kre na yire na nyini na shie nyjeeri, mna lawee shɔ badaaŋga. Kra nyi mna sɛ su chia ŋga praa yeeri Adam, a kraa wa mu mbra Zarethan chia kre na kre. A nyumu ŋga kraa wa tapan haa kre na fo mna sɛ le epo weŋge wo kre nu. A leele pre na nyaari lɔɔ lam waara kre nu, mna kun lawee ŋga nu Jericho na nyi kre nu. 17 Nyjila ŋga ni praa kuun kre, na srawɔfɛɛnlɛ pre pe Nyu Nunu Daka kre tio pree wa mu yire tra waara na, lɔɔ kre lalaa, mna sɛ su na leele pre kro kun mu kɔ.