Pra Dnɛ Ble Wa Mbe Tɛɛ//Mbra Ki Sɔɔnri
4
Ŋga leele pre kro na Jordan lɔɔ kre kun mu kɔ kre, o Tafun Nyiɛkpɔɔ wre na yo Joshua pan mbo, 2 “Bilɛ kɛmbɔshiin wɔ sele kɛmbɔshiin yire kro nu mu ni ŋga, 3 mu yo pe pan na, pe sɛ lawee ŋga nu srawɔfɛɛnlɛ pre na yire lɔɔ kre lalaa wa kre, mbe sɛ dnɛ nununu wru wa, mbe yili na yi ni fimi na, mbe sɛ yi ble mna ee sɛ ŋunu blee ŋga kre.”4 A Joshua na bilɛ kɛmbɔshiin pre wra wɔ pre yeeri pe jlom yire nu, 5 mna yo pe pan mbo, “E yiɛklu e Tafun Nyiɛkpɔɔ Nyu Nunu Daka kre pan, e sɛ lɔɔ kre lalaa, e dnɛ nununu wru e taa patiɛ na, imi na Israel sele yire nyu da kre. 6 Dnɛ yire we na e sɔɔnri kee ŋga Nyiɛkpɔɔ na da mu pe e nu. Na e biile waa e wie mbakɔ, na ŋgi ki tia pra yire dnɛ nyjɛ ble wa kre, 7 mbe e yo pe pan na, Jordan lɔɔ kre na peeri leele mblɛ pra o Tafun Nyu Nunu Daka kre tio pre yiɛ, ki tia yire dnɛ nyjɛ ni o tɛɛ na ŋga kra pe kre sɔɔnri nyjila kro nu.”
8 A leele pre na kee ŋga Joshua na yo pe pan kre pe. Pra sɛ dnɛ nununu kɛmbɔshiin tio Jordan lɔɔ kre lalaa, imi na Israel sele yire na da kre, pan chɔɔ o Tafun Nyiɛkpɔɔ na yo Joshua pan na pe pe, a pra yi tio mna yili, mna sɛ na yi ni mna pra sɛ tuu ki ble kre blee, bawa pra sɛ yi ble titɛɛ. 9 Joshua na le lɔɔ kre nu, mna sɛ dnɛ kɛmbɔshiin koli mu ble Jordan lɔɔ kre lalaa wa, lawee ŋga nu srawɔfɛɛnlɛ pre na Nyu Nunu Daka kre tio mu yire kre. A yii wa wa mu pan mu su aŋga na.
10 Srawɔfɛɛnlɛ mblɛ pra Nyu Nunu Daka kre tio pre na yire Jordan lɔɔ kre lalaa, mna sɛ su na pra kee nyjɛ o Tafun Nyiɛkpɔɔ na yo Joshua pan, na leele pre pe pe yire kro pe, imi na Moses na klu mu ki yo Joshua pan kre. Ŋga kra pan ma kre, leele pre na pe nyaanyaa mna lɔɔ kre kun. 11 Ŋga pra kun mu kɔ kre, srawɔfɛɛnlɛ pre pra o Tafun Nyu Nunu Daka kre tio pre na yili, mna pan lawee ŋga nu leele pre na nyi kre, mna pan mu yiɛ klu pe pan. 12 A Reuben leele, na Gad leele, na Manasseh sele kre yɔɔ, na pe ŋunɔ wiyirɛ wru mna taa srawɔfɛɛnlɛ pre na, a leele pre hamblɛ na chin mu taa, imi na Moses na ki yo pe pan kre. 13 Praa ŋunɔwifɛɛnlɛ kagbenyi fuloe shiin, a pra tro na pe ŋunɔwiyirɛ ni mu yiɛklu O Tafun Nyiɛkpɔɔ wre pan, mbe sɛ wi Jericho tra mbrɛrɛ kre nu.
14 Ki ble kre o Tafun Nyiɛkpɔɔ na tia Joshua na buuro ta kpɔɔ Israel leele pre kro yiɛ na. Pra u ŋga buuro mna sɛ su u kumu ble. Imi na praa Moses kaan buuro kre, pan pra u pe.
15 O Tafun Nyiɛkpɔɔ na yo Joshua pan mbo, 16 “Yo srawɔfɛɛnlɛ mblɛ pe Nyu Nunu Daka kre tio pre pan na pe yili Jordan lɔɔ kre nu.”
17 A Joshua na ki yo pe pan.
18 Ŋga srawɔfɛɛnlɛ pre na yili mu to fimi na to, a lɔɔ kre na ndru na fuu. Kra fo a ki mbɛɛlɛ yire kro na nyi imi na kra nyi jle kre.
19 Nyiɛpɔ jle wo kre, ki ble kɛ na pra Jordan lɔɔ kre kun, mna sɛ tni chia ŋga praa yeeri Gilgal kre na, kraa wa na shie Jericho yila fin haa.a 20 A Joshua na tia pra dnɛ kɛmbɔshiin nyjɛ pra tio mu yili Jordan lɔɔ kre nu yire ble titɛɛ Gilgal na wa. 21 A wra yo Israel leele pre pan mbo, “Na e nanae waa yiri mbakɔ maa pe lɛɛlɛ wie dnɛ nyjɛ kee, 22 e yo pe pan na Israel leele na nyaari tra waara na Jordan lɔɔ kre lam mu kun. 23 Ŋgi na hin? O Tafun Nyiɛkpɔɔ na tia Jordan lɔɔ kre na yua o yiɛ, a o na lɔɔ kre kun imi na wra tia epo nyiɛ kre na yua, a o tolɛɛlɛ na tro kre. 24 Wra kre kee ŋga pe mbe lewo ŋmba uu wa tra na kro chin na o Tafun Nyiɛkpɔɔ wre jaŋga kpɔɔ, mbe ki ti o u fiɛ nyjila kro nu.”